Қазақстан мен Қытай арасындағы тауар айналымы 31,5 млрд АҚШ долларына жетті
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан "Бір белдеу, бір жол" бастамасын дамытудың жаңа бағыттарын ұсынды
Сурет: Үкімет
Қазақстан Премьер-министрі Олжас бектенов Қытайға жұмыс сапары барысында "Бір белдеу, бір жол" бастамасына арналған сессияға қатысып, оны одан әрі дамытудың басым бағыттарын белгіледі, деп хабарлайды Үкіметтің баспасөз қызметі.
Оның айтуынша, бастаманы одан әрі дамытудың негізгі бағыттары инфрақұрылымдық өзара байланысты нығайту, цифрлық орта дәлізді қалыптастыру, "жасыл" күн тәртібін ілгерілету, сондай-ақ сауданы, инвестицияларды және қаржы тетіктерін кеңейту болуға тиіс.
Отырыста сөз сөйлеген Олжас Бектенов Еуразия жүрегінде орналасқан Қазақстан шамамен 1,7 млрд тұтынушысы бар нарыққа қолжетімділікті қамтамасыз ететінін атап өтті. Соңғы 7 жылда көлік-транзит инфрақұрылымын дамытуға $35 млрд-тан астам қаржы жұмсалды, Ақтаудағы контейнерлік хаб, Сиань құрғақ порты, "Достық - Мойынты" теміржолының екінші жолдары секілді ірі жобалар жүзеге асырылды.
"Бір белдеу, бір жол" бастамасы өзара байланыстардың кеңеюі жаңа мүмкіндіктерге жол ашатынын айқын көрсетті. Бүгінде Қазақстан мен Қытай осының жарқын мысалы болып отыр. Жібек жолы әрдайым ашықтық, сенім және күш-жігер біріктіруге дайын болудың арқасында өркендеп келеді. Қазақстан осы қағидаттарға берік. Біз өзімізді Қытайдың сенімді серіктесі әрі өңірлерді байланыстыратын маңызды көпір ретінде көреміз. Сонымен қатар осы көзқарасты бөлісетін барлық серіктеспен өзара тиімді әрі ауқымды жобаларды жүзеге асыруға ашықпыз. Түптеп келгенде, өзара байланыс инфрақұрылым ғана емес, бұл - адамдардың әл-ауқаты мен ортақ прогресс", - деп атап өтті Қазақстан Премьер-министрі Олжас Бектенов.
Сондай-ақ, тараптар жоғары деңгейде қол жеткізілген уағдаластықтардың жүзеге асырылу барысын, қазақ-қытай ынтымақтастығын одан әрі нығайту перспективаларын, оның ішінде сауданы дамыту, инвестициялық өзара іс-қимылды кеңейту, АӨК, көлік-логистика және басқа да салалардағы ынтымақтастық мәселелерін талқылады.
ҚР Премьер-министрі Қазақстан дамудың жаңа кезеңіне қадам басқанын атап өтті. Жалпыұлттық референдум қорытындысы бойынша қабылданған Конституцияда Мемлекет басшысы Қасым-Жомарт Тоқаевтың Әділетті әрі Прогрессивті Қазақстан құруға бағытталған бастамалары бекітілген. Атап айтқанда, "Заң және Тәртіп" қағидаты аясында шетелдік инвесторлардың құқықтары мен заңды мүдделерін қорғау, инвестициялық ортаның тұрақтылығын қамтамасыз ету және заң үстемдігі кепілдіктерін арттыру жөніндегі шаралар күшейтілді.
Қазақстан мен Қытайды өзара құрмет пен қолдауға негізделген достық және ынтымақтастық байланыстырады. Бүгінде екіжақты қатынастар мәңгілік әрі жан-жақты стратегиялық серіктестік рухында дамып, жаңа "алтын отызжылдық" кезеңіне қадам басты. Мемлекеттеріміздің көшбасшылары Қасым-Жомарт Кемелұлы Тоқаев пен Си Цзиньпин арасындағы берік сенімге негізделген сындарлы диалог серіктестіктің үлгілі моделіне айналған мемлекетаралық қатынастардың орнықты дамуының негізгі қозғаушы күші болып отыр", - деп атап өтті Қазақстан Премьер-министрі Олжас Бектенов.
ҚХР Мемлекеттік кеңесінің Премьері Ли Цян стратегиялық өзара іс-қимылдың жоғары деңгейін атап өтіп, екіжақты қатынастарды одан әрі нығайтуға дайын екенін жеткізді.
Кейінгі жылдары екі ел арасында жоғары деңгейде тығыз байланыс орнады, ҚХР Төрағасы Си Цзиньпин мен Қазақстан Президенті Қасым-Жомарт Тоқаев жыл сайын кездеседі. Бүгінде Қазақстан мен Қытай арасындағы жан-жақты стратегиялық серіктестік өзара қолдау мен тату көршілік үлгісіне айналып, ұдайы тереңдей түсуде. Қазіргі халықаралық жағдайда екі ел сенімді серіктестер ретінде ортақ дамудың игілігі жолында бірлесіп жұмыс істеу үшін өзара үйлестіруді нығайтуы қажет. Қытай тарапы саяси өзара сенімді нығайтуға, даму стратегияларын үйлестіруге және екі ел халқының игілігі үшін көпқырлы ынтымақтастықты кеңейтуге бағытталған бірлескен жұмысты жалғастыруға дайын", - деп атап өтті Ли Цян.
Қытай Қазақстанның негізгі сауда және инвестициялық серіктестерінің бірі саналады. 2025 жылдың қорытындысы бойынша өзара сауда көлемі $48 млрд-тан асты, ҚХР-дан тартылған тікелей инвестиция көлемі - $2,8 млрд.
Агроөнеркәсіп кешендегі екіжақты сауда көрсеткіштері тұрақты өсім көрсетуде. 2025 жылдың қорытындысына сәйкес, аталған бағыт бойынша тауар айналымы 36%-ға өсіп, $1,9 млрд-тан асты. Көлік-логистика саласында Қазақстан Қытай мен Еуропа арасындағы құрлық тасымалында шешуші рөл атқарады: республика аумағы арқылы жүк ағынының 85%-дан астамы өтеді. 2025 жылдың қорытындысы бойынша Қазақстан мен ҚХР арасындағы теміржол тасымалы 11% өсіммен 35,6 млн тоннаға жетті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Бельгия арасындағы тауар айналымы 582 млн доллардан асып жығылды
2025 жылдың қорытындысы бойынша екі ел арасындағы тауар айналымы 582,4 млн АҚШ долларын құрап, алдыңғы жылмен салыстырғанда 27,6%-ға өсті, деп мәлімдеді Қазақстан Сыртқы істер министрлігінің баспасөз қызметінен.
Қазақстанның Бельгияға экспорты 311,5 млн долларға жетіп, 2024 жылмен салыстырғанда 48%-ға артқан. Ал, Бельгиядан импорт көлемі 10,1%-ға өсіп, 270,9 млн долларды құрады.
Көңіл толарлық өсу 2026 жылы да сақталып, биылғы жылдың алғашқы төрт айында екіжақты тауар айналымы 179,5 млн долларға жеткен. Оның ішінде қазақстандық экспорт 100,5 млн долларды, импорт 79 млн долларды құраған.
Бельгия Қазақстан экономикасындағы ең ірі еуропалық инвесторлардың бірі және бірегейі болып қала береді. 2005-2025 жылдар аралығында Бельгиядан тартылған тікелей шетелдік инвестициялар көлемі 14,8 млрд доллардан асса, тек 2025 жылдың өзінде тартылған инвестиция көлемі 1,045 млрд долларды құрады.
Бүгінде Қазақстанда бельгиялық капиталдың қатысуымен 110 кәсіпорын жұмыс істейді. Іскерлік байланыстарды дамытуға 2023 жылдың мамыр айында құрылған "Қазақстан - Бельгия" Іскерлік кеңесі де ықпал етуде.
Экономикалық ынтымақтастықпен қатар мәдени-гуманитарлық байланыстар да дамып келеді. 2025-2026 жылдары Брюссель мен Гент қалаларында қазақ мәдени орталықтары ашылып, Қазақ мәдениеті апталығы өткізілді. Сонымен қатар, Shanyraq Dialogues және Shanyraq Fest жобалары іске қосылды.
Қазақстан мен Бельгия арасындағы дипломатиялық қатынастар 1992 жылғы 25 тамызда орнатылған. Осы уақыт ішінде тараптар берік шарттық-құқықтық базаны қалыптастырып, халықаралық ұйымдар аясындағы өзара іс-қимылды жалғастырып келеді.
Естеріңізге сала кетсек,, 22-23 маусым күндері Қазақстан Президенті Қасым-Жомарт Тоқаев Антониу Коштаның шақыруымен Брюссельге ресми сапармен барды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Halyk және Alatau City Bank Алатау қаласын дамыту бойынша серіктесіп жұмыс істейін болады
Сурет: Halyk Bank
Halyk Bank, Alatau City Bank және Alatau City Authority Қазақстанның жаңа инновациялар, технологиялар, инвестициялар және кәсіпкерлік орталығы ретінде Алатау қаласын кешенді дамытуға бағытталған ынтымақтастық туралы меморандумға қол қойды.
Құжатқа Alatau City Authority бас атқарушы директоры Әлішер Әбдіқадыров, Halyk Bank басқарманың төрайымы Үміт Шаяхметова және Alatau City Bank директорлар кеңесінің төрағасы Қуат Қожахметов қол қойды. Келісімге қол қою Қазақстан Президенті Қасым-Жомарт Тоқаев белгілеген Алатау қаласын дамыту міндеттерін іске асырудағы кезекті қадам болды. Мемлекет басшысы Алатауда инвестициялар, таланттар, технологиялар мен жаңа өндірістерді тартатын заманауи инновациялық экожүйе қалыптастырудың стратегиялық маңызын бірнеше рет атап өткен.
«Алатау қаласы инновация, технология және кәсіпкерлікті біріктіретін Қазақстан экономикасының жаңа өсу нүктесі ретінде құрылуда. Осы мақсаттарға жету үшін мемлекет, қаржы институттары мен бизнес арасында берік серіктестік қалыптастыру маңызды. Қол қойылған келісім заманауи қалалық ортаны дамытуға және Алатаудың инвестициялық тартымдылығын арттыруға бағытталған жобаларды жүзеге асыру үшін тараптардың құзыреттерін біріктіруге мүмкіндік береді», – деді Әлішер Әбдіқадыров.
Меморандум аясында жасанды интеллект, экономика (low-altitude economy), «ақылды қала» технологиялары, заттар ғаламторы (IoT), WEB3, цифрлық активтер, финтех, нақты активтерді токенизациялау және қалалық инфрақұрылымға озық цифрлық шешімдерді енгізу бағыттарындағы ынтымақтастық көзделген.
Алатау қаласын дамыту Мемлекет басшысы қойған экономиканы әртараптандыру және жаңа өсу нүктелерін қалыптастыру жөніндегі стратегиялық міндеттерге сәйкес келеді.
«Елдегі ең ірі қаржы институты ретінде біз цифрлық инфрақұрылымды дамытуға, кәсіпкерлікті қолдауға, инновациялық технологияларды енгізуге және тұрғындардың өмір сүру сапасын арттыруға бағытталған жобаларға белсенді қатысамыз. Мемлекет, қаржы секторы және бизнес күш-жігерін біріктіру Алатауда тұрақты экономикалық даму үшін заманауи экожүйе құруға мүмкіндік беретініне сенімдіміз», – деп атап өтті Үміт Шаяхметова бұл бастаманың маңыздылығына тоқтала отырып.
Сонымен қатар, тараптар жоғары технологиялық өндірістер, көлік және логистика, туризм, білім беру, ғылым және денсаулық сақтау салаларында ынтымақтастық орнатуды жоспарлап отыр. Ынтымақтастық аясында бірлескен жобаларды іске асыруға, инвестициялар тартуға, инновациялық технологияларды енгізуге және халықаралық стандарттарға сай заманауи қалалық ортаны дамытуға қолайлы жағдай жасау көзделген.
Қуат Қожахметов Алатау қаласын дамыту жобасының ел үшін маңыздылығына тоқтала отырып, «Біз Алатау қаласын дамыту сияқты ел үшін маңызды жобаға қатысып отырғанымызға қуаныштымыз. Қазақстанда криптоиндустрия мен дәстүрлі банк жүйесін біріктіру саласының пионері ретінде біз бұл “болашақ қаланы” цифрлық активтерді қоса алғанда, озық қаржылық және технологиялық шешімдерді енгізетін алаң ретінде қарастырамыз. Қол қойылған келісім мемлекет пен қаржы институттарының мүмкіндіктерін жаңа буын жобаларын іске асыру үшін біріктіреді. Мұндай серіктестік Алатаудың дамуын жеделдетіп, оны Орталық Азиядағы инвестициялар мен инновациялардың ең тартымды орталықтарының біріне айналдырады деп сенеміз», – деп атап өтті.
Қол қойылған меморандум рамалық сипатқа ие. Нақты жобалар мен оларды іске асыру тетіктері тараптар арасында қосымша келісіліп, Қазақстан Республикасының заңнамасына сәйкес жеке келісімдер арқылы рәсімделетін болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Атырауда балық шаруашылығын дамытуға арналған 100 гектарлық аквазона құрылады
Сурет: gov.kz
Атырауда "Каспий маңы серіктестігі: балық шаруашылығы мен аквакультураны орнықты дамыту" атты халықаралық салалық форум өтіп жатыр. Іс-шара Каспий маңы мемлекеттерінің өкілдерін, жетекші ғалымдарды, сарапшылар мен сала мамандарын бір алаңға жинады. Н. Балғынбаев атындағы орталықта өткен жиында қатысушылар Каспий теңізінің экожүйесін сақтауға және балық шаруашылығын одан әрі дамытуға қатысты стратегиялық маңызы бар мәселелерді талқылады, деп хабарлайды Атырау облысының әкімдігі.
Форумды ашқан Атырау облысының әкімі Серік Шәпкенов Атырау облысы тарихи тұрғыда балық шаруашылығы саласының орталығы екенін атап өтті. Мұнда бекіре тұқымдас балықтарды көбейту және балық өнімдерін өңдеумен айналысатын негізгі кәсіпорындар шоғырланған.
Атырау облысының бұл саланы одан әрі дамытуға, заманауи технологияларды енгізуге және инвестиция тартуға әлеуеті зор. Өңір кезең-кезеңімен дәстүрлі балық аулаудан тауарлы балық өсіру мен аквакультураны дамытуға көшуді жоспарлап отыр. Осы мақсатта Дамбы ауылдық округі аумағында балық өсіруге қолайлы 100 гектарлық аквазона жобасы әзірленіп жатыр. Бұл бастама табиғи балық қорларына түсетін жүктемені азайтуға, өңірде тауарлы балық өндірісін арттыруға, кәсіпкерлер үшін қолайлы жағдай жасауға және балық шаруашылығы саласын жаңа деңгейге көтеруге мүмкіндік береді. Каспий маңы елдері арасындағы тәжірибе алмасу, мемлекет, ғылым және бизнес арасындағы ашық диалог балық биоалуантүрлілігін сақтауға және саланы орнықты дамытуға жаңа тәсілдер қалыптастырады деп сенемін. Форумға қатысып, ынтымақтастыққа дайындық танытқандарыңыз және сала дамуына қосқан үлестеріңіз үшін алғысымды білдіремін", - деді Серік Шәпкенов.
Пленарлық сессия барысында қатысушылар су биоресурстарын сақтау, балық шаруашылығы кешенін жаңғырту, тауарлы балық өсіруді дамыту және саланың экспорттық әлеуетін арттыру мәселелерін қарастырды.
Аймақтың балық шаруашылығы саласындағы әлеуеті форум аясында ұйымдастырылған балық өнімдері мен тағамдар көрмесінде таныстырылды. Атырау облысынан 7 кәсіпкер өз өнімдерін ұсынды. Көрме жергілікті өндірушілердің мүмкіндіктерін және балық өңдеу саласын одан әрі дамыту перспективаларын айқын көрсетті.
Сонымен қатар бағдарлама аясында фидерлік спорттық балық аулау жарыстары, балық өнімдерінің жәрмеңкесі, "Каспийдің үздік тағамы" аспаздар байқауы, балық шаруашылығы кәсіпорындарына таныстыру сапарлары, Жайық өзенін балық шабақтарымен толықтыруға арналған экологиялық акция және мәдени-ойын-сауық бағдарламалары ұйымдастырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыға Emirates SkyCargo компаниясының алғашқы жүк рейсі келді
Алматыға Emirates SkyCargo компаниясының алғашқы жүк рейсі келді. Бұл - Emirates SkyCargo-ның Орталық Азиядағы алғашқы бағыты, деп мәлім етті Президент кімшілігі бастығының орынбасары Әсел Жанасова.
Жаңа апталық маршрут аптасына 100 тоннадан астам жүк тасымалдауға мүмкіндік беріп, қазақстандық экспорттаушылар мен халықаралық сауда үшін қосымша мүмкіндіктер ашады. Сонымен қатар, Қазақстанның әлемдегі ең ірі логистикалық хабтардың бірі саналатын Дубаймен көлік-логистика байланысын жаңа деңгейге шығарады.
БАӘ-ге жұмыс сапары барысында Emirates әуе компаниясының басшылығымен кездестім. Авиация, жүк тасымалы және көлік-логистика салаларындағы ынтымақтастықты одан әрі кеңейту мәселелерін талқыладық.
Әріптестерімізге сенім мен серіктестік үшін алғыс білдіремін. Бірлескен жұмыс Қазақстан мен БАӘ арасындағы көлік-логистика байланыстарын одан әрі нығайтуға ықпал ететініне сенімдімін.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Еуропалық одақтың тиісті тізбесіне енгізілген аса маңызды шикізат материалдарының 34 түрінің 21-ін өндіреді және өңдейді
Қазақстан Еуропалық одақтың тиісті тізбесіне енгізілген аса маңызды шикізат материалдарының 34 түрінің 21-ін өндіреді және қайта өңдейді. Бұл туралы маңызды шикізат материалдары саласындағы ынтымақтастық жөніндегі қазақ-француз жұмыс тобының отырысы барысында белгілі болды, деп хабарлайды Қазақстан Республикасы Өнеркәсіп және құрылыс министрлігі.
Отырыс барысында Қазақстан мен Францияның мемлекеттік органдары, геологиялық қызметтері және бизнес өкілдері геологиялық картография, деректер алмасу, зертханалық зерттеулер, геологиялық барлау, жер қойнауын пайдалану және заманауи тау-кен өнеркәсібін дамыту бағыттарындағы өзара іс-қимыл перспективаларын талқылады. Сонымен қатар титан және басқа да стратегиялық ресурстарды жеткізу саласындағы серіктестікке, сондай-ақ бизнес құрылымдар арасындағы тікелей байланыстарды кеңейтуге ерекше назар аударылды.
Олжас Әлібеков Қазақстанның Еуропалық одақтың тиісті тізбесіне енгізілген стратегиялық маңызды шикізат материалдарының 34 түрінің 21-ін өндіріп әрі өңдейтінін атап өтті. Сондай-ақ Қазақстандағы инвестициялық ахуалды жақсарту және жер қойнауын пайдалану саласын цифрландыру бағытында жүргізіліп жатқан жұмыстарға назар аударылды.
Өнеркәсіп және құрылыс министрлігінің өкілдері қазақстандық тараптың франциялық серіктестерімен өзара тиімді әрі мазмұнды ынтымақтастықты дамытуға дайын екендерін растап, оларды геологиялық барлау, шикізатты өңдеу және заманауи технологияларды енгізу салаларындағы бірлескен жобаларды іске асыруға белсенді түрде қатысуға шақырды.
Кездесу қорытындысы бойынша тараптар ұзақ мерзімді стратегиялық әріптестікті одан әрі ілгерілетуге өзара мүдделі екендіктерін растады және бірлескен бастамалар мен жобаларды іске асыруды жалғастыра беруге уағдаласты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда 1 шілдеден бастап тауарлық газ бағасы 33%-ға өсуі мүмкін
Сурет: Depositphotos
Елімізде 1 шілдеден бастап тауарлық газдың орташа бағасы 33%-ға өсуі мүмкін. Бұл туралы Орталық коммуникациялар қызметіндегі брифингте Қазақстан Энергетика министрінің орынбасары Қайырхан Тұтқышбаев мәлімдеді.
1 шілдеден бастап тауарлық газдың орташа бағасы 33%-ға өседі деп күтіп отырмыз. Бұл жылыту маусымынан уақтылы өту және газ инфрақұрылымын жаңарту үшін қажет. Сонымен қатар жеке тұлғалар үшін бағаның күрт өсуі жоспарда жоқ", - деді вице-министр.
Сондай-ақ, елімізде бірқатар кен орындарындағы, атап айтқанда Теңіз кен орнында техникалық ақауларға байланысты газ өндіру көлемі төмендеген.
Қайырхан Тұтқышбаевтың айтуынша, газ өндірісінің төмендеуі тұрғындарды газбен қамтамасыз етуге әсер етпегендігін атап өтті.
Газ өндіру көлемінің төмендеуі тұрғындарды газбен қамтамасыз ету әсер еткен жоқ, өйткені ұлттық оператор QazaqGaz транзиттік ресурстар есебінен тұтынуды қамтамасыз етті", - деді ол.
Естеріңізге сала кетсек, бұған дейін Қазақстанда тұрмыстық тұтынушылар үшін газ тұтыну нормасын енгізу жоспарланып отырғаны хабарланған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.