Көкшетауда жүргізуші куәлігінсіз адам өліміне әкеп соқтырған жол апатына кінәлі әйелге қатысты үкім шықты, деп хабарлайды соттың баспасөз қызметінен.
Қайғылы оқиға 2026 жылдың мамыр айында болған. Жеңіл көлікті басқарған әйел тұрғын үй ауласына бұрылу кезінде жаяу жүргіншіні қағып кеткен. Зардап шеккен адам ауыр жарақат алып, кейінірек ауруханада көз жұмған болатын.
Сотта айыпталушы өз кінәсін мойындады. Оның айтуынша, жұбайының денсаулығының күрт нашарлауына байланысты және оның рұқсатымен көлік тізгініне отырған. Алайда оның жүргізуші куәлігі болмаған.
Көлік иесіне қатысты, яғни жүргізуші куәлігі жоқ адамға көлік басқаруға рұхсат берген тұлғаға қатысты қылмыстық іс бөлек өндіріске бөлінді.
Сот айыпталушыны 2 жыл 6 ай мерзімге бас бостандығынан айыру жазасына кесті. Алайда, сотталған әйелдің кәмелетке толмаған екі баласының бар екендігі ескеріле отырып, жазаны орындау үш жылға кейінге қалдырды.
Үкім заңды күшіне енген жоқ.
Естеріңізге сала кетсек, бұған дейін Әл-Фараби даңғылындағы жол-көлік оқиғасына кінәлі азамат 10 жылға бас бостандығынан айырылған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.