27.04.2023, 08:46 73266

Қазақстан Премьер-Министрі мен Иран Президенті екіжақты ынтымақтастық мәселелерін талқылады

Сауда-экономикалық, инвестициялық және шекара маңы ынтымақтастығын дамытудағы өзекті мәселелері талқыланды

Сурет: primeminister.kz

Тегеран. 27 сәуір. KAZAKHSTAN TODAY - Тегеранда Қазақстан Республикасының Премьер-Министрі Әлихан Смайылов пен Иран Ислам Республикасының Президенті Ибрахим Раисидің кездесуі өтті, деп хабарлады Үкіметтің баспасөз қызметі.

Кездесу барысында Әлихан Смайылов Мемлекет басшысы Қасым-Жомарт Тоқаевтың сәлемін жеткізіп, Қазақстан-Иран қарым-қатынастарын дамыту мәселесі еліміздің күн тәртібінде ерекше орын алатынын атап өтті.

Қазір екі елдің үкіметтері жоғары деңгейде алға қойылған міндеттерді нақты жүзеге асыру бойынша белсенді жұмыс жүргізіп жатыр. Биылғы жыл екіжақты және көпжақты форматтағы ынтымақтастығымыздың жоғары нәтижелерімен ерекшеленетініне сенімдімін", - деді Премьер-Министр.

Атап айтқанда, биыл Тегеранда ауыл шаруашылығы бойынша Қазақстан-Иран жұмыс тобының бірінші отырысын өткізу жоспарланған. Бұл екі ел арасындағы АӨК саласындағы ынтымақтастықты дамытуға қосымша серпін бермек. Сонымен қатар сауда бағытындағы жұмысты күшейту мақсатында Қазақстанның Ирандағы елшілігіне арнайы сауда өкілін тағайындау туралы шешім қабылданды.

Тараптар сауда-экономикалық, инвестициялық және шекара маңы ынтымақтастығын дамытудағы өзекті мәселелерді, сондай-ақ мәдени-гуманитарлық бағыттағы ортақ бастамаларды жүзеге асыру жайын талқылады.

Естеріңізге сала кетейік, Премьер-Министр кеше Иранға ресми сапармен келген болатын. ҚР Премьер-Министрінің сапары аясында 24-26 сәуір аралығында Қазақстанның Ирандағы үшінші сауда-экономикалық миссиясы өтті. Оған тамақ, химия, құрылыс, жеңіл өнеркәсіп және металлургия бойынша 20 отандық тауар өндіруші қатысты.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

02.05.2024, 16:37 6841

Бакуде Түркі мәдениеті мен мұрасы қоры кеңесінің бірінші отырысы өтті

Бакуде Түркі мәдениеті мен мұрасы қоры кеңесінің бірінші отырысы өтті, деп хабарлайды ҚР Мәдениет және ақпарат министрлігінің баспасөз қызметінен.

Кездесуде қорға қатысушы елдердің мәдениет министрліктерінің басшылары бас қосты.

Түркі мәдениеті мен мұрасы қоры 2015 жылы Әзербайжан Президенті Ильхам Әлиевтің бастамасымен құрылды және оны Қазақстан, Қырғызстан және Түркия мемлекеттерінің басшылары қолдады.

Қор құрудағы негізгі мақсат – түркі мәдениеті мен мұрасын сақтауға, зерделеуге және насихаттауға арналған бағдарламалар мен жобаларды қолдау және қаржыландыру.

Әзірбайжан Мәдениет министрі Әділ Керимли қор алдында Түркі әлемі үшін өзекті жаһандық және өңірлік жағдайға сай жаңа бағыттарды дамытуда ауқымды міндеттер тұрғанын атап өтті.

Түркі мәдениеті және мұрасы қорының президенті Ақтоты Райымқұлова қор нәтижелерімен бөлісіп, алдағы жаңа бағыттар мен 2024-2025 жылдарға арналған жұмыс жоспарымен таныстырды.

Жалпы, қордың жұмыс жоспарын барлық қатысушы елдер қолдады. Аталған жоспарды жүзеге асыру ұйым қызметіне жаңа серпін берері сөзсіз.

Қазақстанның мәдениет және ақпарат министрі Аида Балаева өз сөзінде Түркі мәдениеті мен мұрасы қоры түркі мемлекеттерінің халықаралық аренадағы бірлігінің үлгісі екенін атап өтті.

«Қор біздің мәдениетімізді де, елімізді де бір-бірімен одан әрі жақындастыра түседі. Мәдени және ғылыми іс-шаралар, оның ішінде Қордың ұйымдастыруымен өтетін көрмелер байланысымызды нығайтады және тығыз ынтымақтастыққа мүмкіндік туғызады», – деді Аида Балаева. Министр отырысқа қатысушыларды Таңбалы петроглифтеріне арналған ғылыми-практикалық конференцияға шақырды.

Биыл Қазақстанда өтетін конференцияға түркі әлемінің ғалымдары жиналады.

Министр Түркі мемлекеттері ұйымы, Халықаралық Түркі мәдениеті ұйымы, Халықаралық Түркі академиясының және Халықаралық Түркі мәдениеті мен мұрасы қорының түркі мұрасын сақтауға және насихаттауға бағытталған қызметтерінің нақты функцияларын бірге атқару және айқындау үшін жоспарларды талдау керектігін атап өтті.

Осыған байланысты, оның пікірінше, ескерткіштерге сараптама жүргізу, реставрация жасау, сондай-ақ оларды ЮНЕСКО тізіміне енгізу бойынша бірыңғай топ құрған жөн.

Сонымен қатар Аида Балаева 6-шы Дүниежүзілік мәдениетаралық диалог бойынша форумға қатысты. Форум Әзербайжан Президенті Ильхам Әлиевтің қатысуымен өтті.

Іс-шараға 110-нан астам елден жүздеген қатысушы келді.

Панельдік пікірталастар мен пленарлық отырыстарда білім, жастар, климаттың өзгеруі, жасанды интеллект, мәдени мұраны қорғау, заңсыз көші-қон сияқты тақырыптар талқыланды.

02.05.2024, 16:34 7116

Елімізде қаржы пирамидалары мен заңсыз ойын бизнесіне қарсы іс-қимыл жөніндегі алдын алу шаралары талқыланды

ҚМА Төрағасының орынбасары Қайрат Бижанов қаржы пирамидалары мен заңсыз ойын бизнесіне қарсы іс-қимыл жөніндегі алдын алу шаралары аясында ҚР Парламенті Мәжілісінің депутаты Нартай Сәрсенғалиевпен кездесті, деп хабарлайды ҚМА баспасөз қызметінен.

Агенттік қызметкерлері депутатты "Қаржы пирамидаларына қарсы іс-қимыл", "Қорғау" және басқа да әлеуметтік жобалардың іске асырылу барысы туралы хабардар етті.

Төрағаның орынбасары Қ. Бижанов лудомания тәуекелдерін сәйкестендіру жөніндегі мемлекеттік платформаны енгізу туралы баяндады. Бұл жаңашылдық арқылы кәмелетке толмағандардың, лудомандардың, шамадан тыс кредиттелген азаматтар мен әлеуметтік осал топ мүшелерінің бәс тігу мүмкіндігін шектеуге болады. Сонымен қатар, қылмыстық кірістерді жылыстату және заңдастыру фактілерінің алдын алуға бағытталған.

Нартай Сәрсенғалиев Агенттік дайындаған ҚР "Ойын бизнесі туралы", "Қылмыстық кірістерді жылыстатуға және терроризмді қаржыландыруға қарсы іс-қимыл туралы" Заңдарына түзетулермен танысты.

Депутат оларды қарауға және сараптамалық-әдістемелік қолдау көрсетуге дайын екенін айтты.

Тараптар кездесудің жемісті екенін атап өтіп, одан әрі ынтымақтастыққа дайын екендіктерін білдірді.

02.05.2024, 15:49 8311

Туризм және спорт министрі Алматының туристік әлеуетімен танысты

Туризм және спорт министрі Ермек Маржықпаев Алматыға жасаған жұмыс сапары аясында Dedeman International Hotels & Resort-қа барып, қонақ үйдің жұмысымен танысты, деп хабарлайды ҚР Туризм және спорт министрлігінің баспасөз қызметінен.

Бұл - жуырда ғана оңтүстік астанада өзінің алғашқы қонақ үйін ашқан және жыл сайын әлемнің түкпір-түкпірінен мыңдаған қонақты қабылдайтын ең ірі халықаралық желі. Елімізде шетелдік қонақ үй желілерінің ашылуы нарықта бәсекелестікті дамытуға мүмкіндік береді. Осылайша, барлық туриске қолайлы жағдай жасалмақ.

Сонымен қатар Алматы халықаралық әуежайының жаңа терминалының құрылысымен танысты. Жоба қазір аяқталуға жақын. Терминал биылғы жазда жұмысын бастауға тиіс. Жаңартудан кейін әуежай жылына 10 миллионнан аса жолаушы қабылдай алады.

Сондай-ақ осы жылдың соңына қарай қала тұрғындары мен қонақтары үшін Көк-Төбеде жерасты паркингі бар жаңа конгресс-холл ашылуға тиіс. Мұндай жобаны жүзеге асыру мегаполиске әртүрлі деңгейдегі іс-шараларды өткізуге мүмкіндік береді. Бұл - қаланың туристік тартымдылығына ықпал етеді.

02.05.2024, 15:24 8966

Үкімет маусымаралық кезеңде көкөніс бағасының өсуіне жол бермеу үшін алдын ала шаралар қабылдады

Премьер-Министр Олжас Бектеновтің төрағалығымен өткен кеңесте маусымаралық кезеңде әлеуметтік маңызы бар азық-түлік пен көкөністер бағасының тұрақтылығын қамтамасыз ету жөніндегі шаралар талқыланды, деп хабарлайды Үкіметтің баспасөз қызметінен.

Қазақстанда әлеуметтік маңызы бар азық-түлік тауарларының баға индексі үш апта қатарынан төмендеп келеді. Бағаның төмендеуі қарақұмық жармасы, пияз, күнбағыс майы, ұн және басқа да өнімдер бойынша байқалып отыр.

Маусымаралық кезеңде көкөніс бағасының анағұрлым ауытқуына жол бермеу үшін Үкімет Өзбекстан және Тәжікстан жеткізушілерімен тікелей келісімшарт жасау мүмкіндіктерін алдын ала пысықтады. Сауда және интеграция министрлігінің ведомстволық бағыныстағы ұйымы - "QazTrade" АҚ өзбек және тәжік серіктестерімен тиісті шарттарға қол қойды.

Көкөністер Қазақстан нарығына "жасыл дәліз" арқылы және делдалдар мен алыпсатарларсыз тиімдірек бағамен жеткізілетін болады.

9 ӘКК-мен жалпы көлемі 4 мың тонна болатын импорттық көкөністерді, оның ішінде 2 060 тонна картоп пен 1 940 тонна пияз жеткізуге шарттар жасалды.

Қазақстанның барлық өңірінің қажеттіліктерін қамтамасыз ету және маусымаралық кезеңде көкөністер бағасының ауытқуын болдырмау үшін Премьер-Министр келісімшарттарды уақтылы бекітуді және өнімнің үздіксіз жеткізілуін қамтамасыз етуді тапсырды.

Жалпы алғанда, әкімдіктерге кемінде 18,6 мың тонна картоп, 7,2 мың тонна сәбіз және 5 мың тонна пиязға алдын ала келісімшарт жасау қажет. Қазіргі уақытта қолда бар қорлардан 81 мың тонна көлемінде көкөніс өнімдері пайдалануға берілді.

02.05.2024, 15:15 9451

Президентке биылғы І тоқсанда жұмсалған республикалық бюджет қаражаты туралы есеп берілді

Сурет: akorda

Мемлекет басшысы Қаржы министрі Мәди Такиевті қабылдады, деп хабарлайды Ақорданың баспасөз қызметінен.

Президентке мемлекеттік қаржының негізгі параметрлері, оның ішінде биылғы І тоқсанда жұмсалған республикалық бюджет қаражаты туралы есеп берілді. Осы ретте 3 айдың қорытындысы бойынша мемлекеттік бюджетке 4,5 триллион теңгеге жуық кіріс кірген.

Қасым-Жомарт Тоқаевқа өнімсіз бюджет шығындарын оңтайландыру жұмыстары жөнінде мәлімет берілді. Мәди Такиевтің айтуынша, жүргізілген сараптама нәтижесінде биыл 300 миллиард теңгеден астам соманы қысқарту ұсынылған. Бұл қаражат экономикалық қайтарымы барынша жоғары шараларға жұмсалады.

Мемлекет басшысына бюджетті басқару тиімділігін арттыру бағытында қабылданып жатқан жұмыстар туралы баяндалды. Аталған шаралар жаңа Бюджет кодексіне енгізілген.

Бұдан бөлек Президентке салықтық-кедендік әкімшілендіру ісіндегі жаңа бастамалар таныстырылды. Министрдің айтуынша, жаңа Салық кодексінің жобасында салықтық әкімшілендірудің сервистік моделі енгізілген, тексерулер санын қысқарту жөніндегі нормалар қарастырылған, камералық бақылау және салық берешегін өндіріп алу тәсілдері өзгертілген.

Сонымен қатар Қасым-Жомарт Тоқаевқа Еуразиялық экономикалық одақтың үшінші елдермен кедендік шекарасындағы инфрақұрылымды жаңғырту жұмыстары жөнінде ақпарат берілді. Жобаның жүзеге асырылуы өткізу мүмкіндігін 6 есеге дейін ұлғайтып, өту уақытын 2 есе қысқартуға, сондай-ақ тауарлар мен көлік құралдарын тексеру ісін тәулік бойы онлайн режимде бақылауға мүмкіндік береді. Барлық өткізу пунктін реконструкциялау жұмыстарын жыл соңына қарай аяқтау жоспарланып отыр.

Мәди Такиев мемлекеттік сатып алу жүйесін реформалау жоспары жөнінде айтты. Оның мәліметінше, "Мемлекеттік сатып алу туралы" жаңа Заң жобасында сатып алу рәсімдерін жеңілдету және бюрократиядан арылту, құрылыс нарығында монополияға жол бермеу, барлық мемлекеттік және квазимемлекеттік ұйымның сатып алуларын бірыңғай платформаға көшіру көзделген.

Кездесу соңында Президент мемлекеттік қаржының жағдайын жақсарту, атап айтқанда, бюджеттің теңгерімділігін қамтамасыз ету, сондай-ақ салықтық және кедендік әкімшілендіру салаларын цифрландыру арқылы жетілдіру жөнінде бірқатар тапсырма берді.

02.05.2024, 12:14 13741

Сенат жаңа туған нәрестеге бірден ЖСН беретін заң нормасын мақұлдады

Сенат депутаттары кейбір заңнамалық актілерге байланыс, цифрландыру, инвестициялық ахуалды жақсарту және артық заңнамалық регламенттеуді болғызбау мәселелері бойынша өзгерістер мен толықтырулар енгізуді көздейтін заңды мақұлдады, деп хабарлайды ҚазАқпарат палатаның баспасөз қызметіне сілтеме жасай отырып.

Палата депутаты Бауыржан Қаниев аталған құжат Қазақстанның 38 заңнамалық актісіне, оның ішінде 9 кодекс пен 29 заңға өзгерістер мен түзетулер енгізетінін айтты.

Олар:

- байланыс операторларының байланыс инфрақұрылымына тең қолжетімділігін қамтамасыз ету;

- елді мекендердің бас жоспарлары мен егжей-тегжейлі жоспарлау жобалары шеңберінде байланыс желілерін орналастыру орындарын айқындау;

- ауыл шаруашылығы және өнеркәсіп объектілерінде цифрландыру кезінде шығыстардың бір бөлігін өтеу бойынша байланыс қызметтерін субсидиялау;

- жаңа туған нәрестелердің дербес деректерін жоғалту тәуекелдерін болдырмау үшін бала туғаннан кейін бірден жеке сәйкестендіру нөмірлерін беру;

- байланыс операторларын мүгедектігі бар адамдарға жеңілдікті тарифтер беруге міндеттеу

- алаяқтық белгілері бар төлем транзакциялары бойынша деректер алмасу үшін антифрод-орталықтың құқықтық мәртебесі мен функцияларын бекіту.

Жер қойнауын пайдаланушылардың келісімшарт талаптарын сақтауын бақылауға қажет ғарыштық мониторинг жүйесі арқылы орман қорын қорғау, сақтау, пайдалану, ормандарды молықтыру және орман өсіру саласындағы заңнаманың бұзылуы туралы ақпарат алу да осы заңның аясында қарастырылған. Сондай-ақ, облыстың, республикалық маңызы бар қаланың, астананың әкімдіктеріне телекоммуникация желілері мен кабельдік кәріздерді бюджет есебінен түгендеу құзыреті беріледі. Заң мақұлданған жағдайда байланыс желілерінің құрылысы жеделдетіледі. Байланыс қызметтерінің сапасы жақсарып, қамту аймақтары кеңейеді және абоненттер саны артады. Сонымен қатар, байланыс операторлары арасында бәсекелестік дамып, спутниктік байланыс жұмыс істей бастайды. Инвестициялық ахуал жақсарып, экономикадағы инновациялардың үлесі артады", - деді Бауыржан Қаниев.

02.05.2024, 12:08 14046

Шымкент қаласында жаңа технологияларды қолдана отырып ірі қойма кешені мен жылыжай ашылады

Отандық өндірісті қолдау жөніндегі Премьер-Министрдің тапсырмасы аясында 1 мамыр күні вице-премьер Серік Жұманғарин Шымкент қаласына барып, жұмыс істеп тұрған ірі өндірістік және ауыл шаруашылығы нысандарының жұмысымен және құрылысы барысымен танысты, деп хабарлайды Үкіметтің баспасөз қызметінен.

Шымкент көлік-логистикалық орталығының аумағында ауданы 5 га "НМИ-Юг" ЖШС көпфункционалды қойма кешені салынып жатыр, жобаның құны - 10,2 млрд теңгені құрайды. Құрылыстың бірінші кезеңін биыл аяқтау жоспарланып отыр, аталған кезеңнің құрылыс-монтаждау жұмыстары 90%-ға орындалған. Қойма үй-жайларының жалпы ауданы 22 мың шаршы метрді құрайды. "НМИ-Юг" ЖШС құрылтайшысы Айжан Наимбекованың айтуынша, бұл климаттық бақылаудың икемді жүйесі, тоңазытқыш камераларының температурасын -18-ден +4 градусқа дейін реттеу мүмкіндігі бар А+ санатындағы қойма болады. Ол тауарлардың кең ассортиментін сақтауды қамтамасыз етеді.

Мұнда вице-премьерге "Alsera kz" ЖШС жылыжай кешенін салу жобасы таныстырылды. Құны $650 млн болатын инвестициялық жобаны "Бозарық" индустриялық аймағында "Alarko Holding" түрік компаниясы жүзеге асыруда. Бұл жаңа технологияларды қолдана отырып, 500 га алаңда кезең-кезеңімен іске асырылатын болады. Мұнда қияр, қызанақ, бақша дақылдары, тамыр жемісті көкөністер мен басқа да ауылшаруашылық өнімдерін өсіру жоспарланған. Бұл Шымкенттегі қызанақ пен қияр өсіретін ең үлкен жылыжай кешені болмақ, мұнда 2000-ға жуық жаңа жұмыс орны ашылады.

Қала әкімі Ғабит Сыздықбеков КЛО аумағында жүзеге асырылатын басқа да жобалар туралы мәлімдеді. Серік Жұманғарин іске асырылып жатқан жобалардың келешегін жоғары бағалап, мемлекет тарапынан барлық қажетті қолдау көрсетілетінін, өйткені, жобалар АӨК саласындағы мемлекеттік саясаттың мақсаты - ауыл шаруашылығы өнімдерін терең өңдеуді 70%-ға дейін жеткізуге мүмкіндік беретінін атап өтті.

Вице-премьер "AZALA Textile" ЖШС дайын тоқыма өнімдерін өңдеу және шығару бойынша Қазақстандағы ірі әрі жалғыз толық циклді тоқыма фабрикасына барды. Онда 475 адам жұмыс істейді. Бірегей тоқыма комбинаты иірілген жіптен тоқыма бұйымдарына дейін бірнеше ондаған өнім түрін шығарады. Кәсіпорынның қуаттылығы жылына 6 800 тоннадан астам иірілген жіп пен 14 млн сызықтық метр өңделмеген мата шығаруға жетеді. Бұл экспортқа бағытталған кәсіпорын, AZALA Textile өз өнімдерінің шамамен 70%-ын таяу шет елдерге, Литваға, Германияға, Италияға, Польшаға, Бельгияға, Данияға, Латвияға және Түркияға тасымалдайды.

Өндірістік цехтарды аралау және зауыт басшылығымен әңгімелесу қорытындысы бойынша Серік Жұманғарин мемлекет мұқтаждықтары үшін отандық тоқыма өндірушісінің өнімін сатып алуды арттыру мүмкіндігін пысықтауды тапсырды.

Қазақстан Премьер-Министрі мен Иран Президенті екіжақты ынтымақтастық мәселелерін талқылады

тақырып бойынша жаңалықтар

Ең көп оқылғаны

Өзекті

Шымкент қаласында жаңа технологияларды қолдана отырып ірі қойма кешені мен жылыжай ашылады