22.10.2022, 14:07 11946

Тоқаев: тіл мен этносаралық қатынастарды саяси құралға айналдыруға жол берілмейді

Мемлекет басшысы Қазақстан халқын ұйыстыратын құндылықтардың бірі – мемлекеттік тіл екенін айтты.
Тоқаев: тіл мен этносаралық қатынастарды саяси құралға айналдыруға жол берілмейді
Сурет: Telegram/БОРТ №1
Астана. 22 қазан. KAZAKHSTAN TODAY - Мемлекет басшысы Қасым-Жомарт Тоқаев Республика күніне орай Ақордада бір топ азаматқа мемлекеттік наградалар мен мемлекеттік сыйлықтар тапсырды, деп хабарлайды Ақорданың баспасөз қызметі.
 
Қасым-Жомарт Тоқаев өз сөзінде Қазақстан халқын ұйыстыратын құндылықтардың бірі – мемлекеттік тіл екенін айтты.
 

Қазақ тілі мәңгілік мемлекеттік тіл тұғырында болады. Қазақ тілінің қолданыс аясын арттыра беру – мемлекеттің міндеті. Бұл жұмыс еш тоқтамайды, жалғаса береді. Жақында мен "Өз тілің – бірлік үшін, өзге тілдер – тірлік үшін" деп айттым. Жастарымыз көп тіл білген сайын бәсекеге қабілетті, білікті маман болады", - деді Тоқаев.

 
Ол тіл, ұлтаралық қатынас – ішкі тұрақтылыққа ықпал ететін өзара тығыз әрі маңызды факторлар екенін атап өтті. Сондықтан мұндай маңызды мәселелерден саяси құрал жасауға болмайды.
 

Осындай қоғамдық тұрғыдан сезімтал мәселелерді саясиландырудың кесірінен кейбір елдер қасіретті жағдайға ұшырады. Бұл – біздің жол емес", – деді Президент.

 
Тоқаев үш жарым жыл ішінде "сындарлы диалог пен азаматтық консолидацияның арқасында біз елді саяси жаңғырту мен демократияландыруда айтарлықтай табыстарға қол жеткіздік" деп атап өтті.
 
Мемлекеттік аппаратты түбегейлі өзгерту және жаңарту процесі іске қосылды. Жасампаз қоғамдық белсенділік пен саяси қатысу мүмкіндігі едәуір кеңейтілді.
 

Біз азаматтардың өмір сүру сапасын арттыру, экономиканы монополиясыздандыру, адал және ашық бәсекелестікті дамыту үшін түбегейлі қадамдар жасадық. Конституциялық түзетулер үшін республикалық референдумда дауыс беру арқылы біз оған шынайы әділеттілік пен шынайы демократия рухын бердік", - деді ол.

 
Президенттің айтуынша, Қазақстан бейбітшілік пен ынтымақтастық, өзара құрмет пен сенім құндылықтарын үнемі ілгерілете отырып, өңірлік және жаһандық саясаттағы өз рөлін дәйекті түрде нығайтып келеді.
 

Бұрын-соңды болмаған геосаяси шиеленіс жағдайында біз бейбітшілікті сүйетін және сындарлы сыртқы саяси бағыттың іргелі принциптерін берік ұстанамыз. Көптеген рухани көшбасшылар, ірі мемлекет қайраткерлері, көрнекті ғалымдар мен кәсіпкерлер адамзаттың үйлесімді болашағы мен тұрақты прогресін құруға қосқан бірегей үлесімізді үнемі атап өтеді. Мұның бәрі халқымыздың бірлігі мен ынтымағы, қоғамдағы тұрақтылық пен келісімнің арқасында мүмкін болды", - деді Тоқаев.

 

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.


тақырып бойынша жаңалықтар

Ең көп оқылғаны