Қазақстан Черногория бизнесінің ел нарығында кеңеюін құптайды - Тоқаев
Қасым-Жомарт Тоқаев пен Яков Милатович кеңейтілген құрамда келіссөз жүргізді. Екі елдің ресми делегация мүшелерінің қатысуымен жалғасқан келіссөздер барысында саяси, сауда-экономикалық және мәдени-гуманитарлық ынтымақтастық перспективасы талқыланды, деп хабарлайды Ақорданың баспасөз қызметінен.
Мемлекет басшысы Черногорияны Қазақстанның Балқан түбегіндегі сенімді серіктестерінің бірі ретінде атады. Сонымен қатар ел басшылығының Еуропа Одағына мүше болуды көздеген сындарлы әрі дәйекті саясатына жоғары баға берді.
Президент мырза, Сіз реформаларды ілгерілетіп, Еуропа Одағы мүшелігіне үміткер саналатын Черногорияның позициясын нығайтуда маңызды рөл атқарып келесіз. Осы ұлттық стратегиялық мақсатқа жету жолында табыс тілейміз", - деді Қасым-Жомарт Тоқаев.
Президент Қазақстанның Черногориямен серіктестік қарым-қатынасты жандандыруға ниетті екенін жеткізіп, соңғы жылдары тұрақты сипат алған жоғары деңгейдегі саяси байланыстардың арқасында ынтымақтастық қарқынды дамып келе жатқанына тоқталды.
Қасым-Жомарт Тоқаевтың айтуынша, Подгорицада Қазақстан Бас консулдығының ашылуы Астананың екіжақты байланыстарды барынша кеңейтуге бейіл екенін көрсетеді.
Осы орайда Президент елордамызда Черногорияның дипломатиялық миссиясын ашу, сондай-ақ парламентаралық байланыстарды күшейту жөніндегі қарымта қадамдардың маңызын атап өтті.
Мемлекет басшысы бизнес өкілдерінің бүгінгі кездесуі мен сауда палаталары арасында қол қойылатын Өзара түсіністік туралы меморандум іскерлік қатынастарды дамытуға септігін тигізетініне сенім білдірді.
Қазақстан нарығына кіргісі келетін черногориялық компанияларды қуана қарсы аламыз. Кәсіпкерлеріңізге қолайлы жағдай жасауға дайынбыз", - деді Президент.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан БҰҰ-ның халықаралық хабы ретіндегі позициясын нығайтуда
Сурет: Kazakhstan Today
Қазақстан маусым айының алғашқы жартысында халықаралық ынтымақтастықтың өңірлік орталығы ретіндегі рөлін нығайтуға бағытталған бірнеше маңызды қадам жасады.
Соңғы апталардағы іс-шаралар елдің халықаралық бастамаларға қатысушы ғана емес, БҰҰ жүйесінің ұйымдарымен және жаһандық даму институттарымен өзара іс-қимылдың дербес инфрақұрылымын қалыптастырып келе жатқанын көрсетеді.
Осы кезеңдегі басты оқиғалардың бірі - Алматыда Орталық Азиядағы БҰҰ Жаһандық шарты алғашқы өңірлік кеңсесінің ашылуы болып табылмақ. Жаңа құрылым жауапты бизнес қағидаттарын, тұрақты даму мақсаттарын және корпоративтік басқару стандарттарын ілгерілету алаңына айналмақ. Кеңсе арқылы компаниялар халықаралық комплаенс стандарттарына, экологиялық және әлеуметтік жауапкершілік тәжірибелеріне, сондай-ақ БҰҰ-ның Тұрақты даму мақсаттарын іске асыру құралдарына қол жеткізе алады.
Бұл кеңсенің ашылуы символдық қадам ғана емес, БҰҰ Жаһандық шарты әлемнің 160-тан астам еліндегі мыңдаған компаниялар мен ұйымдарды біріктіретін тұрақты бизнес саласындағы ең ірі халықаралық бастама болып саналады. Оның өңірлік өкілдігінің Алматыда орналасуы Қазақстанның Орталық Азиядағы халықаралық экономикалық және сарапшылық белсенділіктің маңызды орталығына айналып келе жатқандығының куәсі.
Бұл бағыттағы жұмыс маусым айының ортасында жалғасын тапты. Қазақстан Президенті Қасым-Жомарт Тоқаев Қазақстан Республикасы Үкіметі мен Біріккен Ұлттар Ұйымы арасындағы Орталық Азия мен Ауғанстан үшін Тұрақты даму мақсаттары жөніндегі БҰҰ-ның Өңірлік орталығын құру туралы келісімді ратификациялау жөніндегі заңға қол қойды. Сонымен қатар жаңа орталықтың жұмыс істеу қағидаттарын айқындайтын өзара түсіністік туралы меморандум да ратификацияланды.
Іс жүзінде бұл Қазақстан аумағында Орталық Азия елдері мен Ауғанстанды қамтитын өңірдегі Тұрақты даму мақсаттарына қол жеткізу жөніндегі қызметті үйлестіретін жаңа халықаралық алаңның құрылуын білдіреді. Орталық ұлттық үкіметтер, халықаралық ұйымдар, сарапшылар қауымдастығы және даму институттары арасындағы өзара іс-қимыл тетігіне айналмақ.
Маусым айында қабылданған шешімдер Қазақстанның халықаралық аренадағы рөлін күшейтуге бағытталған кең ауқымды стратегияның бір бөлігі болып табылады. Соңғы жылдары ел халықаралық ұйымдардың қатысуын кеңейтіп, келіссөздер мен өңірлік диалог алаңы ретінде танылып келеді. Сонымен қатар Қазақстан БҰҰ, Азиядағы өзара іс-қимыл және сенім шаралары жөніндегі кеңес, Шанхай ынтымақтастық ұйымы және басқа да халықаралық бірлестіктер аясында бастамалар көтеріп келеді.
Осы үдерістерге Қазақстанның Сыртқы істер министрі Ермек Көшербаев де жоғары баға берді. Kazakhstan Today агенттігінің сұрағына жауап бере отырып, ол Қазақстанның Біріккен Ұлттар Ұйымының өңірлік хабы ретінде сенімді түрде қалыптасып келе жатқанын мәлімдеді.
Бүгінде Алматыда 60-тан астам халықаралық ұйым жұмыс істейді. Бұл Қазақстанның халықаралық ұйымдар үшін өңірлік орталыққа айналып келе жатқанын көрсетеді. Біз бұл үрдісті жан-жақты қолдаймыз", - деді Ермек Көшербаев.
Министрдің айтуынша, халықаралық ұйымдардың Қазақстандағы қатысуын кеңейту елдің түрлі халықаралық бағдарламаларға қатысу мүмкіндіктерін арттырады.
Сондай-ақ ол Алматының халықаралық құрылымдарды орналастыру үшін қолайлы қала екенін атап өтті. Бұған дамыған инфрақұрылым, қауіпсіздік деңгейі және қажетті қызметтердің қолжетімділігі ықпал етеді.
Сыртқы саясат тұрғысынан алғанда, қазіргі үдерістер Қазақстанның халықаралық субъектілігін нығайтуға деген ұмтылысын көрсетеді. Егер тәуелсіздіктің алғашқы жылдарында негізгі міндет қолданыстағы халықаралық құрылымдарға интеграциялану болса, бүгінде Қазақстан өңірлік бастамалардың ұйымдастырушысы әрі үйлестірушісі ретінде жиі көріне бастады. Алматыда БҰҰ-ның жаңа институттарының ашылуы осы үрдістің айқын дәлелі саналады.
Сонымен қатар дипломатия мен экономикалық даму арасындағы байланыс та күшейіп келеді. Халықаралық ұйымдардың қатысуы инвестиция тартуға, сарапшылық әлеуетті дамытуға, халықаралық байланыстарды кеңейтуге және елдің жаһандық деңгейдегі танымалдылығын арттыруға ықпал етеді. Осылайша халықаралық қызмет сыртқы саясат құралы ғана емес, экономиканы және адами капиталды ұзақ мерзімді дамыту факторы ретінде де қарастырыла бастады.
Осы тұрғыдан алғанда, соңғы апталардағы оқиғалар Қазақстан сыртқы саясатының жаңа бағыты қалыптасып келе жатқанын көрсетеді. Оның негізінде халықаралық ұйымдармен жүйелі серіктестік, өңірлік үйлестіру функцияларын күшейту және БҰҰ инфрақұрылымының маңызды бөлігіне айналу мақсаты жатыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Черногория Президенті Қазақстанға алғаш рет ресми сапармен келді
Сурет: Ақорда
Президент елімізге ресми сапармен келген Черногория Президентімен шағын құрамда келіссөз жүргізді, деп хабарлады Ақорданың баспасөз қызметінен.
Кездесу барысында мемлекет басшысы мәртебелі мейманға ілтипат танытып, Черногория Президентінің сапары тарихи мәнге ие екенін атап өтті.
Президент мырза, Қазақстанға ресми сапармен келгеніңізге өте қуаныштымын. Черногория мемлекеті басшысының алғашқы тарихи сапарына ерекше мән беріп отырмыз. Сондай-ақ мұны еліміз үшін өте маңызды уақиға ретінде қарастырамыз. Келіссөздеріміздің нәтижесі екіжақты қарым-қатынасқа тың серпін беретініне сенімім кәміл. Черногорияны халқымыз жақсы біледі. Көптеген азаматымыз жыл сайын Сіздің елде демалып, жақсы әсермен оралады. Орайлы сәтті пайдалана отырып, еліңіздің тәуелсіздік алғанына 20 жыл толуымен құттықтаймын. Осы жылдарда біз жақсы қарым-қатынас орнаттық. Өзара ынтымақтастығымыздың мазмұнын байыта түсу керек деп ойлаймын. Оған ешқандай кедергі жоқ. Сіздің іскерлік делегацияңыздың құрамы өте салмақты. Бұл экономикалық және іскерлік байланыстардың ауқымын арттыра түсуге ниетті екеніңізді көрсетеді", - деп атап өтті Қасым-Жомарт Тоқаев.
Мемлекет басшысы Қазақстан Черногориямен өзара қызығушылық танытқан барлық бағытта тығыз ықпалдастық орнатуға дайын екенін растады. Президенттің айтуынша, сауда-инвестиция, көлік байланысы, цифрлық шешімдер, ауыл шаруашылығы, туризм және тағы басқа салалар бірлескен жұмыстың басым векторы болуға тиіс.
Құрметті Президент! Ең алдымен Қазақстанға шақырғаныңыз үшін алғыс айтамын. Өзіңіз атап өткендей, бұл - Черногория Президентінің Қазақстанға алғашқы ресми сапары. Бүгін біз екіжақты ынтымақтастықтың көкжиегін кеңейте түсеміз деп сенемін. Бұл сапар байланыстарымыздың жоғары деңгейге көтерілгенін көрсетеді. Мен мұнда достас елдің өкілі ретінде келдім. Черногорияның іскерлік орта өкілдері де осында. Екі елдің сауда палаталары бизнес форум өткізеді, бірқатар меморандумға қол қойылады. Черногория Қазақстан азаматтары үшін танымал бағыттардың бірі екенін білеміз. Осы тараптағы байланыстарымызды күшейте түскіміз келеді. Сізбен саяси ынтымақтастықты ғана емес, экономикалық серіктестікті кеңейту мүмкіндіктерін де талқылаймыз, - деді Черногория Президенті Қасым-Жомарт Тоқаевқа көрсеткен қонақжайлық үшін алғыс білдіре отырып.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанның халықаралық гуманитарлық құқық жөніндегі бастамасы БҰҰ аясында 110-нан астам елдің басын қосты
Біріккен Ұлттар Ұйымы штаб-пәтерінде БҰҰ Экономикалық және әлеуметтік кеңесінің гуманитарлық сегменті аясындағы отырыс өтті. Қатысушылар гуманитарлық көмекті үйлестіру, жаһандық дағдарыстарға ден қою және қарулы қақтығыстар аймақтарындағы бейбіт тұрғындарды қорғау мәселелерін талқылады, деп хабарлайды Қазақстан Республикасының БҰҰ жанындағы Тұрақты өкілдігінің баспасөз қызметінен.
Қазақстанның БҰҰ жанындағы тұрақты өкілі Қайрат Омаров Халықаралық гуманитарлық құқық жөніндегі жаһандық бастаманың негізін қалаған алты мемлекет атынан бірлескен мәлімдеме жасады. Бұл елдердің қатарында Бразилия, Қытай, Франция, Иордания, Қазақстан және Оңтүстік Африка Республикасы бар.
Мәлімдемеде мемлекеттер қарулы қақтығыстар аймақтарындағы бейбіт тұрғындарды қорғау жағдайына алаңдаушылық білдіріп, барлық тараптарды халықаралық гуманитарлық құқық нормаларын сақтауға шақырды.
Отырыс барысында 2026 жылғы 7 желтоқсанда Амман қаласында өтетін жоғары деңгейдегі Humanity in War ("Соғыс жағдайындағы гумандылық") халықаралық конференциясының ұйымдастырылатыны жарияланды.
Форум қатысушылары алты мемлекеттің бастамасы әртүрлі саяси ұстанымдағы елдер арасындағы ынтымақтастықтың тиімді алаңына айналғанын атап өтті. Қазіргі уақытта бастамаға ресми түрде 113 мемлекет қосылған, ал 160-тан астам елдің өкілдері мемлекетаралық консультацияларға қатысқан.
Сонымен қатар БҰҰ Қауіпсіздік Кеңесінде "Әйелдер, бейбітшілік және қауіпсіздік" тақырыбында ашық пікірталастар өтті.
Қайрат Омаров халықаралық қауымдастықтың әзірге әйелдердің бейбіт келіссөздер мен шешім қабылдау процестеріне толыққанды қатысуын қамтамасыз ете алмағанын айтты. Ол тұрақты даму мен жаһандық қауіпсіздік үшін инклюзивті бейбітшілік процестерінің маңыздылығын ерекше атап өтті.
Дипломат сондай-ақ Қазақстанның осы бағыттағы жұмысына тоқталды. Оның айтуынша, ел БҰҰ Қауіпсіздік Кеңесінің әйелдердің құқықтарын қорғау және олардың бейбітшілік процестеріне қатысуын кеңейтуге арналған 1325-қарарын іске асыру жөніндегі алғашқы Ұлттық іс-қимыл жоспарын табысты жүзеге асырды.
Қазіргі уақытта Қазақстан әйелдердің бейбітшілік пен тұрақтылықты нығайтудағы мүмкіндіктерін кеңейтуге бағытталған екінші ведомствоаралық жоспарды әзірлеуге кірісті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Бельгия арасындағы ынтымақтастық жаңа қарқын алды
Қазақстанның Бельгиядағы Елшісі Роман Василенко Брюссель астаналық өңірінің Министр-президенті Борис Дильеспен кездесті. Кездесу барысында тараптар Қазақстан мен Брюссель астаналық өңірі арасындағы ынтымақтастықты дамыту перспективаларын талқылап, сауда-экономикалық байланыстарға, инвестицияларға, цифрландыруға, инновацияларға және өңіраралық өзара іс-қимылға ерекше назар аударды, деп хабарлайды ҚР СІМ баспасөз қызметінен.
Р.Василенко Бельгияның Қазақстан үшін маңызды саяси әрі экономикалық серіктестердің бірі екенін атап өтті. 2025 жылдың қорытындысы бойынша екіжақты сауда көлемі 583 млн АҚШ долларына жетіп, 28%-ға артқаны, ал Бельгияның Қазақстан экономикасына салған инвестицияларының жалпы көлемі 14,5 млрд АҚШ долларынан асқаны атап өтілді. Бұл көрсеткіш Бельгияны еліміздің экономикасына инвестиция салатын он ірі инвестордың қатарына қосады.
Инвестициялар тарту және кәсіпкерлікті дамыту мәселелеріне ерекше көңіл бөлінді. Осы тұрғыда тараптар Қазақстан мен Брюссель астаналық өңірінің іскер топтары арасындағы ынтымақтастықты кеңейту мүмкіндіктерін, сондай-ақ инвестицияларды және шағын және орта бизнесті қолдау институттары арасындағы өзара іс-қимылды талқылады.
Келіссөздердің жеке блогы цифрландыру, инновациялар және жасанды интеллект мәселелеріне арналды.
Тараптар сондай-ақ "ақылды қалаларды" дамыту, цифрлық басқару және қалалық инфрақұрылым мәселелері бойынша пікір алмасты. Осы контексте Қазақстанның қоғамдық қауіпсіздік пен жол қозғалысын басқаруға арналған "Сергек" зияткерлік жүйесі таныстырылды. Бұл жүйе еліміздің ірі қалаларында табысты түрде енгізілуде.
Б. Дильестің Брюссельдегі Уккел коммунасының мэрі ретіндегі көпжылдық тәжірибесін және қалалық басқару саласындағы қызметін атап өте отырып, тараптар қазақстандық өңірлермен әріптестік байланыстар орнату мүмкіндігін қарастырды. Ықтимал ынтымақтастық урбанистика, муниципалдық басқару, мемлекеттік қызметтерді цифрландыру, инвестициялар тарту және қалалардың тұрақты дамуы салаларындағы тәжірибе алмасуды қамтуы мүмкін.
Өз кезегінде Б. Дильес Қазақстанның Орталық Азия өңіріндегі маңызды рөлін және еліміздің қарқынды дамып келе жатқан экономикасын атап өтіп, сауда-экономикалық және мәдени ынтымақтастықты одан әрі нығайтуға жәрдемдесуге ниетті екенін білдірді. Осы тұрғыда сұхбаттастар Қазақстандағы Брюссель компанияларының қатысуының оң динамикасын қанағаттанушылықпен атап өтті. Олардың қатарында Алматы мен Астанада жұмыс істейтін танымал Le Pain Quotidien наубайхана-мейрамханалар желісі ерекше аталды.
Тараптар сондай-ақ мәдени-гуманитарлық ынтымақтастық мәселелерін талқылап, осы саладағы бірлескен жобаларды іске асырудың маңыздылығын растады. Осыған байланысты жақында құрылған Алматы өнер мұражайы мен Брюссельдегі "KANAL - Centre Pompidou" мұражайы арасындағы жоба атап өтілді. Жоба көрмелермен алмасуды, тәжірибе бөлісуді және мәдени бастамаларды жүзеге асыруды көздейді.
Кездесу барысында Елші Министр-президентті Қазақстанда жүргізіліп жатқан ауқымды саяси реформалар және 2026 жылғы 1 шілдеден бастап күшіне енетін жаңа Конституцияның қабылдануы туралы хабардар етті. Реформалардың мемлекеттік басқару жүйесін одан әрі жетілдіруге, заң үстемдігін нығайтуға және азаматтардың қоғамдық-саяси өмірге қатысуын кеңейтуге бағытталғаны атап өтілді.
Кездесу қорытындысы бойынша тараптар практикалық ынтымақтастықты дамытуға өзара мүдделілігін растады және инвестициялық, инновациялық және өңіраралық бағыттардағы бірлескен бастамаларды іске асыру бойынша байланыстарды жалғастыруға келісті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Орталықазиялық бизнес өкілдері Оңтүстік Африкадағы іскерлік байланыстарын кеңейтуде
Сурет: СІМ
Йоханнесбург қаласында Орталық Азия елдері мен Ресейден келген кәсіпкерлердің қатысуымен жұмыс бизнес-форумы өтті. Іс-шараны Давлатов компаниялар тобы Орталық Азия Тобы консалтингтік компаниясымен серіктестікте және Қазақстан Республикасы, Әзербайжан Республикасы мен Грузияның Оңтүстік Африка Республикасындағы Елшіліктерінің қолдауымен ұйымдастырды, деп хабарлайды ҚР СІМ баспасөз қызметінен.
Іс-шараға өнеркәсіп телекоммуникациялар, бөлшек сауда, агроөнеркәсіп кешен, логистика, құрылыс, білім беру, дистрибуция және зергерлік өнеркәсіп саларында қызмет атқаратын Қазақстан, Қырғызстан, Тәжікстан және Ресей бизнес қауымдастықтарының өкілдері қатысты. Оңтүстік Африка тарапының іскерлік және сарапшылық орта өкілдері қатысты.
Форум барысында Қазақстан Республикасының Елшісі Еркін Ахинжанов Оңтүстік Африка елдерімен сауда-экономикалық және инвестициялық өзара іс-қимылды кеңейту жөніндегі дәйекті жұмысты атап өтіп, Орталық Азия елдері мен Африка құрлығы мемлекеттері арасындағы өңіраралық ынтымақтастықтың өсіп келе жатқан әлеуетіне назар аударды.
Кездесу аясында өңірлер арасындағы көлік-логистикалық өзара байланыстарды дамытуға ерекше назар аударылды. Қатысушылар жаһандық жеткізу тізбектерінің тұрақтылығын арттыруға, көлік ағындарын әртараптандыруға және жаңа нарықтарға қолжетімділікті кеңейтуге бағытталған стратегиялық бағыт ретінде Орта дәліздің маңызын талқылады.
Форум қорытындысы бойынша Оңтүстік Африка-Қазақстан сауда-мәдени қауымдастығы (SAKTCA) мен Орталық Азия Тобы (CAG) арасында ынтымақтастық туралы Меморандумға қол қойылды. Құжат бизнес қауымдастықтар арасындағы тұрақты өзара іс-қимыл алаңын дамытуға, сондай-ақ сауда-экономикалық, инвестициялық, мәдени және білім беру байланыстарын нығайтуға бағытталған.
Сапар бағдарламасы аясында делегация Гаутенг және Батыс Кейп провинцияларындағы Оңтүстік Африка экономикасының негізгі секторларын қамтитын кәсіпорындар мен инфрақұрылым нысандарының қызметімен танысты. Олардың қатарында тау-кен өнеркәсібі, агроөнеркәсіп кешені және экспортқа бағдарланған логистика салалары бар. Сонымен қатар Кейптаун Сауда-өнеркәсіп палатасының өкілдерімен кездесу өтіп, оның барысында тікелей іскерлік байланыстарды кеңейту және іскер топтар арасындағы экономикалық ынтымақтастықты одан әрі дамыту мүмкіндіктері талқыланды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Астана әзербайжандық пациенттер үшін жаңа мүмкіндіктер ашуда
Бакуда өткен Астана қаласының медициналық туризміне арналған халықаралық роуд-шоуға Қазақстан мен Әзербайжанның жетекші медициналық ұйымдарының, туристік саласының және екі елдің кәсіби қоғамдастығының өкілдері қатысты. Іс-шараны Қазақстан Республикасының Әзербайжан Республикасындағы Елшілігінің және Әзербайжанның Медициналық және термалды туризмді қолдау қауымдастығының қолдауымен Astana Tourism туризмді дамыту орталығы ұйымдастырды, деп хабарлайды ҚР СІМ баспасөз қызметінен.
Қазақстан Республикасының Әзербайжандағы Елшісі Әлім Байел роуд-шоудың Қазақстан мен Әзербайжан арасындағы денсаулық сақтау және медициналық туризм саласындағы ынтымақтастықты нығайтудың маңызды алаңына айналғанын атап өтті. Іс-шараның басты мақсаты - Қазақстан астанасының заманауи медициналық қызметтерін халықаралық нарықта таныту, екі елдің клиникалары мен туристік компаниялары арасындағы серіктестік байланыстарды дамыту, сондай-ақ шетелдік пациенттерді Астанада емделуге тарту.
Іс-шара барысында елорданың жетекші медициналық ұйымдары өз жетістіктерін таныстырып, диагностика мен емдеудің озық әдістері туралы баяндап, сондай-ақ бүгінгі таңда Астана медицинасының қолданысындағы жоғары технологиялық шешімдерді көрсетті.
Бүгінде Астана Орталық Азиядағы медициналық туризмнің жетекші орталығы ретіндегі мәртебесін сенімді түрде нығайтып келеді. Елордамызда Joint Commission International (JCI) халықаралық стандарттарына сәйкес аккредиттелген 9 медициналық ұйым қызмет көрсетеді. Бұл медициналық көмектің сапасы мен қауіпсіздігінің жоғары деңгейін растайды.
Нейрохирургия, онкологиялық ауруларды емдеу, балаларды оңалту, репродуктивті медицина және эстетикалық хирургия бағыттары қатысушылардың ерекше қызығушылығын тудырды. Дәл осы салалар бүгінде Әзербайжаннан келетін пациенттер арасында ең жоғары сұранысқа ие бағыттардың қатарында.
Астана қаласы делегациясының құрамында Балаларды оңалту ұлттық орталығы, Ұлттық нейрохирургия орталығы, Ұлттық ғылыми онкология орталығы, Ecomed репродуктивті медицина және Tulip Medicine пластикалық хирургия клиникаларының өкілдері болды. Олар өз мүмкіндіктерін таныстырып, әзербайжандық әріптестерімен бірлескен жұмыстың перспективаларын талқылады.
Роуд-шоу бағдарламасы Астана қаласының медициналық ұйымдарының таныстырылымдарын, екі елдің медицина қауымдастығы өкілдері арасындағы B2B кездесулер, сондай-ақ медициналық туризм саласындағы серіктестікті одан әрі дамытуға бағытталған ынтымақтастық туралы меморандумдарға қол қою рәсімін қамтыды.
Іс-шараның жалғасы ретінде 17 маусым күні Баку тұрғындары үшін Citomed клиникасының базасында тегін алғашқы консультациялар ұйымдастырылды. Астаналық жетекші мамандар пациенттерді қабылдап, диагностика және емдеу мәселелері бойынша кәсіби кеңес алу мүмкіндігін ұсынды.
Бакуда өткен халықаралық роуд-шоу Астана қаласының медициналық туризмін дамыту стратегиясын іске асырудағы және елордамызды сапалы әрі жоғары технологиялық медициналық көмектің халықаралық орталығы ретінде ілгерілетудегі кезекті маңызды қадам болды. Осындай бастамаларды дамыту Қазақстан мен Әзербайжан арасындағы ынтымақтастықтың жаңа мүмкіндіктерін ашып, өңір тұрғындарының әлемдік деңгейдегі заманауи медициналық технологияларға қолжетімділігін кеңейтуге ықпал етеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Словакияда еліміздегі әйелдер құқықтарын ілгерілету мәселелері талқыланды
Сурет: СІМ
Қазақстанның Словакиядағы Елшісі Жанна Сағынова Словакия әйелдер қауымдастығының төрайымы Моника Дюреховамен кездесу өткізіп, Қазақстандағы әйелдерді қолдау шаралары мен гендерлік теңдік мәселелері талқылады, деп хабарлайды ҚР СІМ баспасөз қызметінен.
Кездесу барысында Елші Қазақстан Президенті Қасым-Жомарт Тоқаев бастамасымен жүзеге асырылып жатқан әйелдерді қолдауға бағытталған реформалар туралы ақпарат берді. Атап айтқанда, әйелдердің елдің қоғамдық-саяси өміріндегі рөлін арттыру, әйелдер кәсіпкерлігін дамыту, сондай-ақ әйелдер мен балалардың құқықтарын қорғау жөніндегі шараларға ерекше назар аударылды.
М.Дюрехова Қазақстанда әйелдерді жан-жақты қолдауға және олардың мемлекеттік басқару саласындағы басшылық қызметтерге ілгерілеуіне бағытталған мемлекеттік саясатқа жоғары баға берді.
Қауымдастық басшысы елде қабылданған гендерлік теңдікті қамтамасыз ету, тұрмыстық зорлық-зомбылықтың алдын алу және отбасылық-тұрмыстық зорлық-зомбылық үшін жауапкершілікті күшейту жөніндегі заңдардың маңыздылығын атап өтті. Сондай-ақ ол Қазақстан Парламенті құрамындағы әйелдердің үлесі 18 пайызды құрайтынын жоғары бағалап, бұл көрсеткішті әйелдердің саяси белсенділігін арттыру жолындағы елеулі жетістік ретінде бағалады.
Өз кезегінде М.Дюрехова ұйымының басым бағыттарымен таныстырды. Аталған ұйым Словакия қоғамындағы әйелдердің ықпалын арттыруға белсенді түрде атсалысып, қайырымдылық және гуманитарлық қызмет жүргізеді, соның ішінде мұқтаж отбасыларға, әйелдер мен балаларға көмек көрсетеді.
Тараптар әйелдер құқықтарын ілгерілету мәселелері бойынша тәжірибе және озық практикалар алмасудың маңыздылығын атап өтіп, өзара байланыстарды одан әрі дамытуға қызығушылық білдірді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.