03.04.2026, 14:15 4291

Ереванда Қазақстан мен Армения арасында көпжақты ынтымақтастық мәселелері бойынша консультациялар өтті

Ереванда Қазақстан мен Армения сыртқы саяси ведомстволары арасында көпжақты ынтымақтастық мәселелері бойынша консультациялар өтті, деп хабарлайды Қазақстан Республикасы Сыртқы істер министрлігінің баспасөз қызметінен.

Консультациялар барысында тараптар халықаралық ұйымдар мен көпжақты форматтар шеңберінде өзара іс-қимылдың өзекті мәселелері бойынша жан-жақты пікір алмасты.

БҰҰ мен ЕҚЫҰ шеңберіндегі өзара іс-қимыл мәселелерін, сондай-ақ екі елдің халықаралық алаңдардағы бастамаларын талқылауға ерекше назар аударылды.

Қазақстан Республикасы Сыртқы істер министрлігі Көпжақты ынтымақтастық департаментінің директоры Дидар Теменов 2026 жылғы 22-24 сәуірде Астана қаласында өтетін Өңірлік экологиялық саммитке дайындық барысы туралы хабардар етіп, армян тарапының жоғары деңгейде қатысатынын растағаны үшін алғысын білдірді. Қазақстандық дипломат су ресурстарын ұтымды басқару және су қауіпсіздігін қамтамасыз ету саласындағы жаһандық ынтымақтастықты нығайтуға бағытталған БҰҰ құрылымында Халықаралық су ұйымын құру жөніндегі қазақстандық бастамаға ерекше мән берді.

Өз кезегінде, Армения Республикасы Сыртқы істер министрлігі Көпжақты саясат және даму саласындағы ынтымақтастық департаментінің директоры Д.Князян 2026 жылғы 19-30 қазанда Ереванда жоспарланған БҰҰ Биологиялық алуантүрлілік туралы Конвенциясы тараптарының 17-ші Конференциясына (COP-17) дайындық барысы туралы ақпарат берді.

Тараптар жаһандық экологиялық күн тәртібін талқылау үшін маңызды алаң ретінде ӨЭС пен COP-17 өткізудің өзектілігін атап өтті.

Мемлекеттердің әлеуметтік-экономикалық дамудағы цифрлық технологиялардың өсіп келе жатқан рөлін ескере отырып, қазақ тарапы БҰҰ АзТМЭӘК шеңберінде "Орнықты даму мақсаттары үшін Азия-Тынық мұхиты цифрлық шешімдер орталығын құру" жөніндегі қарар жобасын ілгерілету туралы атап өтті.

Консультациялар қорытындысы бойынша тараптар көпжақты ынтымақтастықтың өзекті мәселелері бойынша диалогты одан әрі нығайтуға өзара міндеттемелерін растады.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

05.04.2026, 16:23 56

Ұлытау облысында инвестиция тарту және өнеркәсіпті дамыту мәселелері талқыланды

Сурет: gov.kz

Сыртқы істер министрінің орынбасары Әлібек Қуантыров Ұлытау облысына жұмыс сапары аясында облыс әкімі Дастан Рыспековтың төрағалығымен өткен Өңірлік инвестициялық штабтың отырысына қатысты, деп хабарлайды Қазақстан Республикасы Сыртқы істер министрлігінің баспасөз қызметінен.

Аталған алаңда инвестициялық ахуал мен жобаларды іске асыру мәселелерін талқылау үшін мемлекеттік органдар мен бизнес өкілдері бас қосты.

Ә.Қуантыров өңірдің жоғары өнеркәсіптік әлеуетін атап өтіп, шикізаттық модельден өңдеуші және жоғары технологиялық өндірістерді дамытуға көшу қажеттігін жеткізді.

Ұлытау облысы мыс, темір кені, марганец, көмір және сирек жер металдарының ірі кен орындарына ие, бұл өнеркәсіптік қайта өңдеу үшін зор әлеует қалыптастырады", - деді ол.

Қатысушылар мемлекеттік қолдау шараларын, соның ішінде салықтық жеңілдіктерді, инвестицияларды кепілдендіру тетіктерін, "бір терезе" қағидаты бойынша жобаларды сүйемелдеуді және инвестициялық омбудсмен институты арқылы инвесторлардың құқықтарын қорғау мәселелерін талқылады.

Кездесуде тараптар минералдық шикізатты терең өңдеу жобаларын, тау-кен металлургия өндірістерін, энергетикалық инфрақұрылымды және ілеспе өнеркәсіптік логистиканы одан әрі дамыту қажеттігіне ерекше назар аударды.

Жезқазған қаласында делегация бірқатар өнеркәсіптік нысандарды, оның ішінде жасанды интеллект технологияларын енгізіп жатқан "Ютария" тігін фабрикасын, сондай-ақ салынып жатқан логистикалық және азық-түлік жобаларын аралады.

Өткен жылдың қорытындысы бойынша негізгі капиталға тартылған инвестициялар көлемі 260 млрд теңгеден асты. Басым бағыттар қатарында химия және өңдеу өнеркәсібін дамыту, агроөнеркәсіптік кластер және индустриялық аймақтар бар. Инвесторларды қолдау және қорғау құралдарына ерекше көңіл бөлінуде. 2030 жылға дейін жалпы құны шамамен 500 млрд теңгені құрайтын 25 жоба пулы қалыптастырылып, 2 мыңнан астам тұрақты жұмыс орны ашылады.

04.04.2026, 16:20 406

Бакуде түркі мәдениеті мен мұрасын сақтау, зерттеу және ілгерілету мәселелері талқыланды

Сурет: gov.kz

Қазақстан Республикасы Сыртқы істер министрінің орынбасары Әлібек Бақаев Түркі мәдениеті және мұрасы қорының (Қор) штаб-пәтеріне барып, Қор Президенті Ақтоты Раиымқұловамен келіссөздер өткізді, деп хабарлайды Қазақстан Республикасы Сыртқы істер министрлігінің баспасөз қызметінен.

Келіссөздер барысында тараптар Қордың ағымдағы қызметін, перспективалық жобаларды іске асыру барысын, сондай-ақ түркі мәдениеті мен мұрасын сақтау, зерттеу және ілгерілету мәселелерін талқылады.

Тараптар түркі мәдениетін әлемнің түрлі өңірлерінде танытуға бағытталған ірі халықаралық іс-шараларды ұйымдастыру мүмкіндіктеріне ерекше назар аударды.

Кездесу аясында сұхбаттастар Қордың институционалдық нығаюын одан әрі қамтамасыз ету және оның қызметін орта және ұзақ мерзімді кезеңге кешенді жоспарлау қажеттілігі жөнінде пікір алмасты.

Түркі мәдениеті мен мұрасын сақтау қоры 2012 жылғы 23 тамызда құрылған. Қордың негізгі міндеттері - түрлі іс-шаралар, жобалар мен бағдарламаларды қолдау және қаржыландыру арқылы түркі мәдениеті мен мұрасын сақтау, зерттеу және ілгерілету.

04.04.2026, 15:18 196

Қазақстанда білім алған түлектер Анкарада алғаш рет бас қосты

Сурет: gov.kz

Қазақстан Елшілігі мен Ясауи атындағы Халықаралық қазақ-түрік университетінің Өкілетті кеңесінің ұйымдастыруымен Қазақстан жоғары оқу орындарын бітірген түлектердің алғашқы кездесуі өтті, деп хабарлайды Қазақстан Республикасы Сыртқы істер министрлігінің баспасөз қызметінен.

Достық және кәсіби байланыстарды күшейтуге бағытталған кездесу барысында қатысушылар қазақ жоғары оқу орындары түлектерінің Қазақстан мен Түркия арасындағы қарым-қатынастарды дамытудағы рөлі жөнінде ой бөлісіп, Қазақстанның білім беру әлеуетін шетелде ілгерілету және түлектер қауымдастығындағы өзара іс-қимылды кеңейту мәселелері талқылады.

Түлектер білім алған ошағын және қазақ тілін ұмытпай Қазақстанмен байланысын ешқашан үзбейтінін жеткізіп, елімізде болып жатқан реформалар мен жаңашылдықтарды, оның ішінде жаңа Конституцияның қабылдануына байланысты оң көзқарастарын білдірді.

Қазақстанның Түркиядағы Елшісі Еркебұлан Сәпиев Қазақстанда білім алған түлектер бауырлас елдер арасындағы алтын көпір ретінде екіжақты ынтымақтастықты дамытуға және өзара түсіністік пен достықты нығайтуға елеулі үлес қосып отырғанын атап өтті.

Өз кезегінде Өкілетті кеңестің төрағасы М.Шимшек түрлі салаларда қызмет атқаратын түлектерді біріктіруге, бірлескен білім және қоғамдық жобаларды жүзеге асыруға, сондай-ақ Қазақстан университеттерінің халықаралық беделін арттыруға бағытталған бастамаларды қолдауға дайын екендігін білдірді.

Іс-шара аясында қатысушылар өзара іс-қимылдың жаңа бағыттары мен бірлескен іс-шаралар туралы жоспарлар жасап, екі ел арасындағы ықпалдастықты кеңейтуге атсалысу мақсатында осындай жиындарды дәстүрге айналдыруға уағдаласты.

03.04.2026, 23:38 1521

ҚР Сыртқы істер министрі Шығанақ елдерінің және Иорданияның елшілерін қабылдады

Сурет: gov.kz

Қазақстан Республикасының Сыртқы істер министрі Ермек Көшербаевтың Шығанақтағы араб елдерінің және Иорданияның елшілерімен кездесуі өтті. Кездесу барысында тараптар Таяу Шығыстағы қазіргі ахуалды талқылап, өңірдегі шиеленіс төңірегінде пікір алмасты, деп хабарлайды Қазақстан Республикасы Сыртқы істер министрлігінің баспасөз қызметінен.

СІМ басшысы эскалацияның жалғасуына, оның ішінде достас араб елдеріне жасалған соққыларға байланысты елеулі алаңдаушылық танытты.

Ол аймақтағы бейбіт тұрғындардың қаза табуына және азаматтық инфрақұрылымға айтарлықтай зиян келтіріп жатқан барлық соғыс қимылдарын тез арада тоқтатудың маңыздылығын атап өтті. Осыған байланысты қазақстандық дипломат миссия басшыларына ҚР азаматтарын эвакуациялауға және олардың елімізге аман-есен оралуына жәрдем үшін алғыс білдірді.

Министр Қазақстан тарапы Шығанақ елдері көшбасшыларының бейбіт саяси диалог орнату жөніндегі күш-жігерін, сондай-ақ Қытай мен Пәкістанның аймақтағы бейбітшілік пен тұрақтылықты қалпына келтіруге бағытталған бірлескен бастамасын құптайтынын айтты. Сонымен қатар, ол Қазақстанның Түркістан қаласында бейбіт келіссөздер үшін алаң ұсынуға дайын екеніне назар аударды.

Өз кезегінде араб дипломаттары аймақтық қауіпсіздікті қамтамасыз ету бойынша халықаралық күш-жігердің, соның ішінде Астанамен байланыстар мен үйлестіруді одан әрі нығайтудың маңыздылығын жеткізді. Олар саяси диалогты нығайту, жан-жақты ынтымақтастықты кеңейту және бірлескен жобаларды жүзеге асыру үшін тығыз өзара іс-қимылды жалғастыруға дайын екендіктерін растады.

03.04.2026, 20:36 1731

ҚР СІМ-де Өңірлік экологиялық саммитке дайындық барысы таныстырылды

Сурет: gov.kz

Қазақстан Республикасы Сыртқы істер министрлігінде 2026 жылғы 22-24 сәуірде Астана қаласында өтетін Өңірлік экологиялық саммитке дайындық мәселелері бойынша дипломатиялық корпус өкілдеріне арналған брифинг өтті, деп хабарлайды Қазақстан Республикасы Сыртқы істер министрлігінің баспасөз қызметінен.

Іс-шара барысында Саммитке дайындықтың барысы туралы, сондай-ақ Қазақстанның халықаралық бастамалары, оның ішінде Су жөніндегі халықаралық ұйым құру туралы ұсыныс және БҰҰ-ның сайланбалы органдарына Қазақстанның кандидатураларын ұсыну мәселелері бойынша ақпарат ұсынылды.

Қазақстан Республикасы Сыртқы істер министрінің бірінші орынбасары Ержан Ашықбаев Саммиттің Қазақстан Республикасы Президенті Қасым-Жомарт Тоқаевтың бастамасымен өткізілетінін атап өтіп, оның өңірлік ынтымақтастықты дамытуға, тұрақты дамуды ілгерілетуге және экология мен климат саласында практикалық шешімдер әзірлеуге бағытталғанын жеткізді.

Ол сондай-ақ Қазақстанда климаттық саясат, атом энергетикасын дамыту, сондай-ақ Арал теңізін қалпына келтіру және биоалуантүрлілікті сақтау бағытында іске асырылып жатқан шаралар туралы хабардар етті. Саммит БҰҰ-мен серіктестікте өткізіледі, 17-ден астам құрылым тақырыптық сессиялардың тең ұйымдастырушысы және салалық бағдарламалар мен жобалардың бастамашылары ретінде қатысады.

Орталық Азия климаттық қоры Жобалық офисінің басшысы Ерлік Қаражан Саммиттің негізгі күн тәртібін таныстырып, өңірлік экологиялық жобалар портфелін қалыптастыру және инвестициялар тарту мәселелерін атап өтті.

Қазақстан Республикасы Сыртқы істер министрлігінің ерекше тапсырмалар жөніндегі Елшісі Зүлфия Сүлейменова БҰҰ жанынан Су жөніндегі халықаралық ұйым құру мәселесі бойынша жүргізіліп жатқан консультациялар туралы хабарлады.

Сонымен қатар дипломатиялық корпусқа Ләззат Қалтаеваның 2027-2030 жылдар кезеңіне БҰҰ-ның Мүгедектердің құқықтары жөніндегі комитетіне сайлану үшін ұсынылған кандидатурасы және оны ұсынудың мақсаттары таныстырылды.

Қазақстандық кандидат өз қызметінің негізгі басымдықтарын баяндап, білім алуға, жұмыспен қамтуға және әлеуметтік интеграцияға қолжетімділік мәселелеріне тоқталды.

03.04.2026, 17:29 1926

Краснодарда Қазақстан-Ресей аймақаралық ынтымақтастықты тереңдету мәселелері талқыланды

Сурет: gov.kz

Краснодар өлкесімен екіжақты байланыстарды дамыту және кеңейту аясында Қазақстан Республикасының Астрахан қаласындағы Бас консулы Қанат Хасеновтың Краснодар қаласына барды, деп хабарлайды Қазақстан Республикасы Сыртқы істер министрлігінің баспасөз қызметінен.

Сапар барысында Краснодар өлкесінің губернаторы Вениамин Кондратьевпен кездесу ұйымдастырылды. Тараптар қазақ-ресейлік аймақаралық ынтымақтастықтың негізгі бағыттарын талқылап, сауда-экономикалық байланыстарды кеңейту, гуманитарлық ынтымақтастық және жоғары оқу орындары арасындағы әріптестік мәселелеріне ерекше назар аударды.

Кездесуде агроөнеркәсіптік кооперацияны нығайтуға, өзара сауда номенклатурасын кеңейтуге және бизнес арасындағы өзара іс-қимылды жандандыруға бағытталған ортақ ниет расталды. Сондай-ақ, арнайы экономикалық аймақтардың инфрақұрылымына қол жеткізу және инвестициялық қызметті қолдаудың қолданыстағы шараларын қоса алғанда, Қазақстанның инвестициялық мүмкіндіктері таныстырылды.

Сапар барысында Бас консул "Юг Текстиль" және "Si Mosaic" тоқыма және интерьерге арналған шыны бұйымдарын өндіруші кәсіпорындарда болды. Қазақстанның әлеуетті серіктестерімен ынтымақтастық перспективалары туралы пікір алмасу жүргізілді.

Сол күні сапар аясында Қ.Хасенов Кубань мемлекеттік университетінің ректоры Михаил Астаповпен кездесті.

Академиялық және гуманитарлық әріптестікті дамыту бағыттары, оның ішінде жоғары оқу орындары арасындағы академиялық алмасу және бірлескен білім беру бастамаларын іске асыру мәселелері талқыланды.

Сонымен қатар, Бас консул университет қабырғасында қазақстандық студенттермен жүздесті. Кездесу барысында дипломат сапалы білім алудың маңыздылығын атап өтіп, студенттерді оқу үдерісінде білімдерін тереңдетуге және кәсіби дағдыларын дамытуға шақырды. Сондай-ақ, студенттерге Бас консулдықтың қызметі, консулдық есепке тұру қажеттілігі және Ресей Федерациясының заңнамасын міндетті түрде сақтау туралы ақпарат берілді. Бұдан бөлек, қазақстандық студенттерді толғандыратын басқа да мәселелер де талқыланды.

03.04.2026, 16:25 2261

Қазақстан мен БАӘ тұрақты даму бағыты бойынша серіктестікті нығайтуда

Қазақстан Республикасының Біріккен Араб Әмірліктеріндегі Елшісі Рауан Жұмабек БАӘ Президенті Аппаратының халықаралық қатынастар кеңсесінің басшысы Мариям бинт Мұхаммед Саид Хареб Әл-Мхейримен кездесу өткізді, деп хабарлайды Қазақстан Республикасы Сыртқы істер министрлігінің баспасөз қызметінен.

Тараптар екіжақты ынтымақтастықтың ағымдағы жай-күйі мен даму перспективаларын талқылап, биік әрі жоғары деңгейлерде белсенді де сенімді саяси диалогты қолдаудың, сондай-ақ ведомствоаралық байланыстарды одан әрі кеңейтудің маңыздылығын атап өтті.

Сонымен қатар, сұхбаттасушылар Қазақстан мен БАӘ-нің негізгі халықаралық және өңірлік мәселелер бойынша ұстанымдарының жақындығын, сондай-ақ БҰҰ, ИЫҰ және басқа да көпжақты алаңдар шеңберіндегі үйлестірудің жоғары деңгейін растады.

Мариям Әл-Мхейридің бұған дейін БАӘ Климаттың өзгеруі және қоршаған орта мәселелері жөніндегі министрі қызметін атқарғанын назарға алып, қазақстандық дипломат оны су ресурстарын басқару және экологиялық саясат саласындағы сарапшы ретінде 2026 жылғы 22-24 сәуірде Астанада өтетін Өңірлік экологиялық саммитке қатысуға шақырып, Қазақстан Республикасы Экология және табиғи ресурстар министрі Ерлан Нысанбаевтың тиісті шақыруын табыстады.

Осы тұрғыда ҚР Президенті Касым-Жомарт Токаев бастамашы болған Халықаралық су ұйымын құру мәселесі, сондай-ақ 2026 жылғы

2-4 желтоқсанда Абу Дабиде өтетін БҰҰ ІІІ Су конференциясына Әмірліктер тарапының дайындығы бойынша конструктивті пікір алмасу болды.

Тараптар жаһандық су дипломатиясын дамыту және табиғи ресурстарды орнықты басқару мақсатында көпжақты ынтымақтастықты нығайту мәселелері бойынша екі ел ұстанымдарының ұқсастығын атап өтті.

Сонымен қатар, Марьям Аль-Мхейри "2PointZero" инвестициялық платформасының вице-президенті ретінде екіжақты сауда-экономикалық және инвестициялық ынтымақтастықты одан әрі дамытудың маңыздылығын мәлімдеді. Компанияның активтерді шоғырландыру және басым секторларға инвестициялар тарту құралы ретіндегі рөлі, оның ішінде орнықты энергетика, озық технологиялар, жасанды интеллект, сондай-ақ азық-түлік және су қауіпсіздігі бағыттарының ерекшелігі айтылды.

Кездесу қорытындысы бойынша өзара қызығушылық тудыратын барлық бағыттар бойынша белсенді іс-қимылды жалғастыру туралы уағдаластыққа қол жеткізілді.

03.04.2026, 15:18 3016

Қазақстан мен Аустрияның көлік және логистика саласындағы ынтымақтастық стратегиясы айқындалды

Сурет: gov.kz

Қазақстанның Аустриядағы Елшісі Мұхтар Тілеуберді Аустрияның іскерлік топтары ұйымдастырған бизнес-ланчқа қатысты. Іс-шара көлік-логистика саласындағы ынтымақтастықты дамытуға және Аустрия-Қазақстан өзара байланыстылық платформасын (АҚБП) іске қосуға арналды, деп хабарлайды Қазақстан Республикасы Сыртқы істер министрлігінің баспасөз қызметінен.

Өз сөзінде М.Тілеуберді Қазақстан Транскаспий халықаралық көлік бағытын дамытуға, мультимодальды тасымалдар мен жасыл логистика саласында заманауи шешімдерді енгізуге ерекше көңіл бөлетінін атап өтті. Қатысушыларға Орта дәліздің тиімділігін арттыруға және оның Еуразия өңіріндегі транзиттік рөлін күшейтуге бағытталған Қазақстанның бастамалары таныстырылды.

Елші сондай-ақ қатысушыларды республикалық референдумның қорытындылары және Қазақстан Республикасы жаңа Конституциясының қабылдануы туралы хабардар етті. Ол Президент Қасым-Жомарт Тоқаев жүргізіп жатқан институционалдық реформалардың мемлекеттік институттардың есептілігін арттыруға және елде неғұрлым ашық инвестициялық ахуал қалыптастыруға бағытталғанын атап өтті.

Іс-шараның құрметті қонағы ретінде Аустрия Парламентінің Ұлттық кеңесінің Екінші президенті Петер Хаубнер сөз сөйледі. Ол 2025 жылғы қарашада өкілді бизнес-делегациямен Астанаға жасаған сапарының қорытындыларын атап өтті. Сондай-ақ, аустриялық тараптың ынтымақтастықты кеңейтуге, әсіресе тұрақты инфрақұрылым, логистика, цифрландыру және энергетика салаларында қызығушылық танытатынын растады.

Іс-шара барысында Төменгі Аустрия федералдық жеріндегі ҚР Құрметті консулы Александр Ширхубер Қазақстанның көлік саласының қазіргі жағдайы мен даму перспективаларына егжей-тегжейлі шолу ұсынды. Ол елдің жоғары транзиттік әлеуетін және Еуропа мен Азияны байланыстыратын еуразиялық көлік дәліздерінің негізгі буыны ретіндегі рөлін атап өтті. Оның айтуынша, А ҚБП-ны іске қосу бірлескен инфрақұрылымдық және логистикалық жобаларды әзірлеу мен іске асырудың практикалық тетігі болмақ.

Ең көп оқылғаны