Кенияда парламентаралық ынтымақтастықтың болашағы талқыланды
Сурет: gov.kz
Қазақстанның Кениядағы Елшісі Барлыбай Садықов Кения Парламенті Ұлттық Ассамблеясының Спикері Мозес Ветангуламен кездесті, деп хабарлайды Қазақстан Республикасы Сыртқы істер министрлігінің баспасөз қызметінен.
Кездесу барысында қазақстандық дипломат ҚР Президенті Қасым-Жомарт Тоқаев бастамасымен елде жүргізіліп жатқан саяси реформалар туралы хабардар етті. Осы контексте Конституциялық реформа жөніндегі комиссияның қызметі, жаңа Конституция жобасының ережелері, сондай-ақ 2026 жылғы 15 наурызда Қазақстанның жаңа Конституциясы бойынша Республикалық референдумды өткізуге дайындық туралы ақпарат ұсынылды.
Сонымен қатар, Б.Садықов серіктеске ҚР Парламентінің қызметі және Парламенттің Кениямен парламентаралық ынтымақтастықты кеңейтуге, соның ішінде Достық тобын құру және екі ел парламенттері арасында кездесулер өткізу арқылы мүдделілігі туралы егжей-тегжейлі хабарлады.
М.Ветангула, өз кезегінде, Қазақстанның жетістіктерін жоғары бағалай отырып, Кенияның парламенттік жүйесі туралы хабарлап, елдің негізгі даму жолдарын, оның қатарында жас ұрпаққа басымдық, экономикалық өсімді ынталандыру және әлеуметтік қорғауды жақсарту бар екенін атап өтті.
Сондай-ақ, М. Ветангула Кенияның Қазақстанмен екіжақты ынтымақтастықты одан әрі дамытуға мүдделі екенін мәлімдеп, Найробидің парламентаралық қарым-қатынасты және екі ел арасындағы парламенттік делегациялар алмасуды, барлық салалардағы ынтымақтастықты кеңейту мүмкіндіктерін қарастыруға дайын екенін атады.
Кездесу қорытындысы бойынша тараптар парламентаралық өзара іс-қимылды дәйекті түрде нығайту ниетін атап, сондай-ақ тұрақты саяси диалогты қолдаудың және парламентаралық байланыстарды жандандырудың маңыздылығына назар аударып, Қазақстан-Кения қарым-қатынасын одан әрі нығайту бойынша өзара мүдделілікті растады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Санкт-Петербургте Жамбыл Жабаевтың 180 жылдығына арналған еске алу шарасы өтті
Сурет: gov.kz
Ресейдің мәдени астанасында ұлы қазақ ақыны Жамбыл Жабаевтың туғанына 180 жыл толуына орай ескерткішіне гүл шоқтарын қою рәсімі өтті, деп хабарлайды Қазақстан Республикасы Сыртқы істер министрлігінің баспасөз қызметінен.
Қазақстанның Санкт-Петербург қаласындағы Бас консулдығы ұйымдастырған бұл шара Қазақстан мен Ресей халықтары арасындағы үзілмес мәдени-тарихи байланыстың айқын көрінісі екенін білдірді. Жамбыл Жабаевтың бейнесі қала тарихында ерекше орын алады. Ақынның "Ленинградтық өренім!" атты өлмес туындысы Ұлы Отан соғысы жылдарында блокададағы қала тұрғындары үшін зор рухани демеу болды.
Салтанатты шараға ҚР Бас консулдығының дипломаттары, Санкт-Петербург қаласының Сыртқы байланыстар жөніндегі комитеті мен Орталық аудан әкімшілігінің өкілдері қатысты. Сондай-ақ, ұлы ақын рухына қазақ диаспорасының өкілдері мен РФ әскери академияларында білім алып жатқан қазақстандық курсанттар тағзым етті.
Шараға қатысушылар Жамбыл Жабаевтың шығармашылық мұрасы ортақ құндылық екенін және заманауи гуманитарлық ынтымақтастықты дамытудың маңызды негізі болып табылатынын атап өтті. Ақынның есімі Санкт-Петербургтің орталығындағы көшеге берілген ақын бейнесі екі мемлекет арасындағы достық пен өзара құрметтің жарқын символы болып қала бермек.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Мысырда Қазақстандағы Конституциялық реформалар талқыланды
Сурет: gov.kz
Қазақстанның Мысырдағы Елшілігінде жергілікті зиялы қауым, Әл-Азһар университетінің ғалымдары, сарапшылар, бизнес және БАҚ өкілдеріне арналған ауызашар ұйымдастырылды, деп хабарлайды Қазақстан Республикасы Сыртқы істер министрлігінің баспасөз қызметінен.
Аталған шара барысында Қазақстанның Мысырдағы Елшісі Асқар Жеңіс мысырлық қауымға Қазақстанда мемлекеттік басқарудың неғұрлым тиімді әрі ашық жүйесін қалыптастыруға бағытталған ауқымды конституциялық реформалардың жүргізіліп жатқандығы туралы ақпарат берді.
А.Жеңіс Қазақстанда құрылымдық тұрғыдан да, мазмұны жағынан да түбегейлі ерекшеленетін жаңа Конституцияны қабылдау бойынша 2026 жылғы 15 наурызда жалпыұлттық референдумның өтетіні туралы айтты.
Сонымен қатар, іс-шараға қатысушылар жаңа Конституцияның ендігі кезекте бір палаталы Парламентке көшу, Вице-Президент институтын енгізу, сондай-ақ заң үстемдігін нығайтып, азаматтардың іргелі құқықтарын қорғауды күшейту және т.б. маңызды мәселелерді қамтитыны хабардар етілді.
Өз кезегінде, мысырлық тарап өкілдері Қазақстандағы жүзеге асырылып жатқан саяси өзгерістерді талқылауда белсенділік таныта отырып, олардың маңыздылығына өздерінің жоғары бағаларын берді.
Іс-шараның қорытындысы бойынша тараптар екіжақты қатынастардың дамуын ілгерілетуге бағытталған бірлескен жұмыстарды жүргізуге мүдделіктерін жеткізді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ыстанбұлдың ғылыми-академиялық қауымдастығы Қазақстандағы конституциялық реформаларды жоғары бағалады
Сурет: gov.kz
Қазақстанның Ыстанбұлдағы Бас консулдығында қаланың жетекші жоғары оқу орындары мен ғылыми-зерттеу орталықтарының өкілдерімен кездесу өтті. Іс-шара Қазақстанда жүзеге асырылып жатқан конституциялық реформаларды талқылауға арналды, деп хабарлайды Қазақстан Республикасы Сыртқы істер министрлігінің баспасөз қызметінен.
Кездесуге Ыстанбұлдың ғылыми-академиялық қауымдастығының өкілдері, профессорлық-оқытушылық құрам, сарапшылар және зерттеушілер қатысты.
Басқосу барысында Қазақстандағы саяси жаңғыру үдерісі, жаңа Конституцияның тұжырымдамалық негіздері, мемлекеттік басқару жүйесін жетілдіруге бағытталған өзгерістер және билік тармақтары арасындағы тепе-теңдікті нығайту тетіктері жан-жақты таныстырылды. Сондай-ақ азаматтардың құқықтары мен бостандықтарын қорғауды күшейтуге бағытталған құқықтық жаңашылдықтар туралы айтылды.
Ғылыми орта өкілдері Қазақстанда жүргізіліп жатқан реформалардың жүйелілігіне, олардың құқық үстемдігін нығайтуға және институционалдық тұрақтылықты қамтамасыз етуге бағытталғанына жоғары баға берді. Кездесу барысында конституциялық өзгерістердің ұзақ мерзімді әлеуметтік-экономикалық даму үшін берік құқықтық негіз қалыптастыратыны аталып өтті.
Іс-шара қорытындысында Қазақстанның Ыстанбұлдағы Бас консулы Нуриддин Аманқұл реформалардың стратегиялық маңыздылығына тоқталып, академиялық қауымдастықпен өзара сараптамалық диалогты жалғастыруға мүдделі екенін білдірді. Түркия тарапы ғылыми ынтымақтастықты кеңейтуге және тәжірибе алмасуды дамытуға дайын екендіктерін жеткізді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Моңғолия ғалымдары Қазақстанмен серіктестікті нығайтуға ниетті
Сурет: gov.kz
Моңғолия Ғылым академиясында алғаш рет Қазақстанның Моңғолиядағы Елшісі Алмас Сейтакынов Қазақстанның қазіргі даму бағыттары және екі елдің ынтымақтастығын нығайтудың перспективалары тақырыбында лекция оқыды, деп хабарлайды Қазақстан Республикасы Сыртқы істер министрлігінің баспасөз қызметінен.
Іс-шараға Моңғолия Ғылым академиясының Президенті Содномсамбуугийн Дэмбэрэл, ғылыми және білім беру қауымдастығының 90-нен астам өкілі, оның ішінде университеттер мен зерттеу орталықтарының басшылары, ғылыми қызметкерлер, сондай-ақ жергілікті бұқаралық ақпарат құралдарының өкілдері қатысты.
Өз сөзінде Елші елімізде Мемлекет басшысы Қасым-Жомарт Тоқаевтың бастамасымен жүзеге асырылып жатқан негізгі саяси және экономикалық өзгерістер туралы баяндады. Конституциялық реформалардың құқық үстемдігі қағидаттарын нығайтуға, мемлекеттік басқару жүйесін жаңғыртуға және азаматтардың шешім қабылдау үдерісіне қатысуын кеңейтуге бағытталғаны аталып өтті.
Сондай-ақ, Қазақстанның орнықты экономикалық өсім көрсетіп, Орталық Азиядағы жетекші транзиттік хабтардың бірі ретіндегі ұстанымын күшейтіп отырғаны айтылды. Экономиканы жаңғыртуға, көлік-логистикалық инфрақұрылымды дамытуға, цифрландыруға және инвестициялық тартымдылықты арттыруға ерекше назар аударылатыны аталып өтті.
Лекцияның елеулі бөлігі білім беру және ғылыми өзара іс-қимыл мәселелеріне арналды. Қазақстанның жоғары оқу орындарында 35 мыңнан астам шетелдік студент, оның ішінде шамамен 1200 Моңғолия азаматы білім алуда. Қазақстан Үкіметі жыл сайын моңғолиялық студенттерге 25 білім грантын бөледі. Ынтымақтастықтың перспективалы бағыттары ретінде сауда-экономикалық байланыстар, ауыл шаруашылығы, логистика, цифрлық технологиялар, сондай-ақ экология, су ресурстарын басқару және аграрлық ғылым салаларындағы бірлескен ғылыми зерттеулер аталды.
Елші екіжақты қатынастардың қазіргі ахуалы мен даму перспективасын да қамтып, саяси диалогтың оң серпінін, сауда-экономикалық өзара іс-қимылдың кеңеюін және гуманитарлық байланыстардың нығаюын атап өтті. Сондай-ақ, қатысушыларға 2026 ж. өтетін Өңірлік экологиялық саммитке дайындық барысы туралы ақпарат ұсынылды. Саммит климаттық және экологиялық сын-қатерлер бойынша практикалық шешімдерді әзірлеуге арналған ашық платформа болуға тиіс.
Іс-шара соңында пікір алмасу өтіп, оның барысында Моңғолияның ғылыми қауымдастығы қазақстандық әріптестермен академиялық алмасуларды және сараптамалық өзара іс-қимылды одан әрі кеңейтуге қызығушылық білдірді.
Моңғолия Ғылым академиясы - негізгі ұлттық ғылыми орталығы және іргелі зерттеулерді дамытуға, сондай-ақ мемлекеттік шешімдерді сараптамалық тұрғыдан қолдауға арналған жетекші алаң. Академия 1961 жылы Ұлан-Батыр қаласында құрылған және бүгінде салалық ғылыми-зерттеу институттары мен ғылыми ұжымдардың желісін біріктіреді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Льеж университеті ғылым, инновациялар және ғарыш технологиялары саласындағы ынтымақтастықты кеңейтуде
Сурет: gov.kz
Қазақстанның Бельгиядағы Елшісі Роман Василенко Льеж университетінің (ULiège) ректоры Анн-Софи Ниссен және білім беру және студенттік өмір жөніндегі вице-ректор Фредерик Схунарспен кездесу өткізді. Тараптар жоғары білім, ғылым және инновациялар саласындағы ынтымақтастықтың қазіргі жай-күйі мен оны кеңейту перспективаларын талқылады, деп хабарлайды Қазақстан Республикасы Сыртқы істер министрлігінің баспасөз қызметінен.
Елші Қазақстанның Орталық Азиядағы өңірлік білім және ғылыми хаб ретіндегі позициясын дәйекті түрде нығайтып келе жатқанын атап өтті. Елде халықаралық академиялық орталықтар саны артып, қос дипломды бағдарламалар мен әлемнің жетекші университеттерімен стратегиялық әріптестіктер дамуда. Қолданбалы ғылымды, цифрландыруды, жасанды интеллектіні және технологиялар трансферін дамытуға ерекше назар аударылуда.
Тараптар Қазақстан мен Льеж университеті арасындағы ынтымақтастықты дамыту мәселелерін талқылап, жоғары технологиялық және ғылымды қажетсінетін салаларда өзара іс-қимылды кеңейтуге қызығушылық білдірді. Атап айтқанда, Льеж ғарыш зерттеулер орталығы (CSL) базасында қазақстандық инженерлер мен зерттеушілерді даярлау және тағылымдамадан өткізу, сондай-ақ ғарыштық компоненттерді сынақтан өткізу, Жерді қашықтан зондтау және спутниктік байланыс жүйелері бойынша бірлескен жобаларға қатысу мүмкіндіктері қарастырылды.
Сондай-ақ STAR (Space Sciences, Technologies and Astrophysics Research) институтымен ғарыш ғылымы, астрофизика және спутниктік деректерді өңдеу салаларында ынтымақтастық перспективалары талқыланды. Ғарыштық оптика және аспап жасау саласында бірлескен ғылыми-зерттеу және тәжірибелік-конструкторлық жұмыстарды дамыту мүмкіндіктеріне ерекше назар аударылды.
Gembloux Agro-Bio Tech ғылыми платформасы (TERRA) аясында агрономия, биоинженерия, агроэкология және дәл егіншілік салаларындағы ынтымақтастық мәселелері де қарастырылды. Қазақстан климаттың өзгеруіне бейімделу, агроөнеркәсіптік кешенді цифрландыру және бірлескен магистрлік және докторлық бағдарламаларды іске қосу бағытындағы зерттеулерге қызығушылық танытты.
Кездесудің соңында Қазақстанда жүзеге асырылып жатқан ауқымды саяси және институционалдық реформалар туралы ақпарат ұсынылды. Мемлекеттік басқару жүйесін жаңғырту, заң үстемдігін нығайту, азаматтардың шешім қабылдауға қатысуын кеңейту және мемлекеттік институттардың тиімділігін арттыру бағытында кешенді жұмыстар жүргізілуде.
Осы үдерістің маңызды кезеңі 2026 жылғы 15 наурызда өтетін Республикалық референдум болмақ, онда азаматтар Қазақстан Республикасының жаңа Конституциясының жобасы бойынша шешім қабылдайды. Ұсынылып отырған өзгерістер жүйелі сипатқа ие және құқықтық мемлекет қағидаттарын одан әрі нығайтуға бағытталған.
Кездесу қорытындысы бойынша тараптар екіжақты әріптестікті одан әрі тереңдетуге дайын екендіктерін растады.
Льеж университеті 1817 жылы құрылған және Бельгиядағы ең көне әрі жетекші зерттеу университеттерінің бірі болып табылады. Университет құрамында инженерия мен жаратылыстану ғылымдарынан бастап медицина, гуманитарлық және әлеуметтік ғылымдарға дейінгі бағыттарды қамтитын 11 факультет бар. ULiège-де шамамен 27 000 студент білім алады, ал академиялық және ғылыми персонал саны 5 700-ге жуық.
Университет инженерлік ғылымдар, ғарыштық технологиялар және астрофизика салаларында, соның ішінде Еуропалық ғарыш агенттігінің жобаларына қатысу және Льеж ғарыш зерттеулер орталығы мен STAR институты арқылы белсенді жұмыс жүргізу арқылы жоғары позицияға ие. Gembloux Agro-Bio Tech кампусында агрономия, тұрақты ауыл шаруашылығы, агроэкология және дәл егіншілік бағыттарында зерттеулер дамуда. Университет Еуропалық Одақтың ғылыми консорциумдары мен бағдарламаларына белсенді қатысады.
Қазіргі уақытта ULiège-де Қазақстаннан 8 студент, оның ішінде 1 PhD-докторант білім алуда, сондай-ақ 1 қазақстандық қызметкер жұмыс істейді. ULiège пен Maqsut Narikbayev University арасында академиялық ұтқырлықты қамтамасыз ететін келісім бар. Ынтымақтастық құқық, саяси ғылымдар және криминология факультеттерін, қолданбалы ғылымдар факультетін (инженерия), сондай-ақ HEC Liège менеджмент мектебін қамтиды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Таиланд ынтымақтастықты нығайту перспективаларын айқындады
Сурет: gov.kz
Қазақстанның Таиландтағы Елшісі Марғұлан Баймұхан Таиланд Сыртқы істер министрлігінің Оңтүстік Азия, Таяу Шығыс және Африка істері жөніндегі департаментінің Бас директоры Ураса Монгколнавинмен кездесу өткізді, деп хабарлайды Қазақстан Республикасы Сыртқы істер министрлігінің баспасөз қызметінен.
Кездесу барысында тараптар екіжақты ынтымақтастықтың кең ауқымды мәселелерін және Қазақстан мен Таиланд арасындағы өзара іс-қимылды одан әрі дамыту бағыттарын талқылады. Саяси диалогты дәйекті түрде дамытуға, сондай-ақ сауда-экономикалық, инвестициялық және гуманитарлық салалардағы әріптестікті нығайтуға өзара бейілділік расталды.
Сұхбаттастар алдағы екіжақты іс-шараларға дайындық мәселелерін қарастырып, екі елдің ішкі саяси күн тәртібі бойынша ақпарат алмасты, оның ішінде Таиланд Корольдігінде өткен парламенттік сайлау және Қазақстан Республикасында жоспарланған конституциялық референдум мәселелері қозғалды.
М.Баймұхан референдумды өткізудің құқықтық және институционалдық негіздерін егжей-тегжейлі баяндап, оның демократиялық институттарды одан әрі дамыту мен мемлекеттік басқару жүйесін жетілдірудегі маңызын атап өтті.
Қазақ дипломаты цифрлық трансформация және инновациялық даму мәселелеріне ерекше назар аударды. Ол Алматы қаласында БҰҰ ЭСКАТО аясында Өңірлік цифрлық шешімдер орталығын құру жөніндегі Қазақстан бастамасы туралы ақпарат беріп, оның цифрлық технологияларды ілгерілетуге, электрондық үкіметті дамытуға, цифрлық сауданы қолдауға және цифрландыру мен жасанды интеллект саласындағы өңірлік ынтымақтастықты нығайтуға бағытталғанын атап өтті. Тұрақты және инклюзивті цифрлық дамуды қамтамасыз ету үшін көпжақты құрылымдар шеңберінде күш-жігерді үйлестірудің маңыздылығы айтылды.
Гуманитарлық ынтымақтастық мәселелерін талқылау барысында тараптар мәдени және білім беру салаларындағы өзара іс-қимылдың халықтар арасындағы өзара түсіністікті нығайтудың негізі екенін атап өтті. Мәдени іс-шаралар, академиялық алмасулар және тиісті мекемелер арасындағы ынтымақтастықтың оң серпіні белгіленіп, мәдениет, ғылым және жоғары білім беру салаларындағы байланыстарды одан әрі кеңейтуге дайындық білдірілді.
Сұхбаттастар сондай-ақ көпжақты ынтымақтастық және өңірлік күн тәртібі мәселелері бойынша пікір алмасып, халықаралық алаңдарда сындарлы диалог пен үйлесімді іс-қимылды жалғастыруға мүдделілігін растады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Минскіде жаңа Конституция жобасы таныстырылды
Сурет: gov.kz
Қазақстанның Беларусьтегі Елшісі Тимур Жақсылықов Қазақстанның жаңа Конституциясының жобасы бойынша алдағы референдумға арналған Беларусь БАҚ өкілдері үшін брифинг өткізді, деп хабарлайды Қазақстан Республикасы Сыртқы істер министрлігінің баспасөз қызметінен.
Қазақ дипломаты құжаттың негізгі новеллалары мен Қазақстан Президенті Қасым-Жомарт Тоқаевтың бастамасымен жүзеге асырылып жатқан реформаның тұжырымдамалық негіздері туралы хабардар етті.
Жаңа Конституция жобасының негізгі ережелерін таныстыра отырып, Т.Жақсылықов ұсынылған конституциялық реформа Мемлекет басшысының дәйекті саяси реформалардың қисынды жалғасы болып табылатынын атап өтті.
Елші еліміздің негізгі Заңындағы тұжырымдамалық өзгерістер мемлекеттің адам орталықтылығын арттыруға, Қазақстан халқының өзекті құндылықтары мен қағидаттарын көрсетуге, сондай-ақ республиканың саяси институттары құрылымының тиімділігін арттыруға бағытталғанын атап өтті.
Беларусьте Қазақстан азаматтарының дауыс беруіне арналған учаскелер ағымдағы жылдың 15 наурызында Қазақстан Республикасының Минскідегі Елшілігі және Бресттегі Бас консулдығы жанында сағат 7:00-ден 20:00-ге дейін жұмыс жасайтын болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан-Малайзия қатынастары жаңа серпін алуда
Сурет: gov.kz
Қазақстан Республикасы Сыртқы істер министрінің орынбасары Әлібек Бақаев Малайзия Сыртқы істер министрінің орынбасары Луканисман бин Аванг Саунимен келіссөздер өткізді, деп хабарлайды Қазақстан Республикасы Сыртқы істер министрлігінің баспасөз қызметінен.
Қазақстан Малайзияны өңірдегі негізгі серіктестердің бірі ретінде қарастырады. Екі ел арасындағы 34 жылдан астам дипломатиялық қатынастар кезеңінде тұрақты, сындарлы және мазмұнды саяси диалог қалыптасты", - деп Ә.Бақаев атап өтті.
Тараптар саяси өзара іс-қимылды жандандыру перспективаларын, парламентаралық байланыстарды дамыту, сауда-экономикалық және инвестициялық ынтымақтастықты кеңейту, сондай-ақ білім беру, туризм және жоғары технологиялар салаларындағы байланыстарды нығайту мәселелерін талқылады. Сонымен қатар шарт-құқықтық базаны одан әрі жетілдіруге өзара қызығушылық расталды.
Біріккен Ұлттар Ұйымы және Ислам ынтымақтастығы ұйымы шеңберіндегі өзара іс-қимылға ерекше назар аударылды, оның ішінде көпжақты алаңдарда ұстанымдарды үйлестіру және бастамаларды өзара қолдау мәселелері қарастырылды.
Қазақстан тарапы малайзиялық серіктестерді Азиядағы өзара іс-қимыл және сенім шаралары жөніндегі кеңестің қызметі туралы хабардар етіп, өңір мемлекеттерінің осы алаң жұмысына қатысуын кеңейтуге мүдделілік білдірді.
Келіссөздер қорытындысы бойынша тараптар Қазақстан-Малайзия ынтымақтастығын дәйекті түрде дамытуға және өңірлік әрі жаһандық күн тәртібіндегі мәселелер бойынша тұрақты байланыстарды жалғастыруға өзара ниет білдірді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.