Қазақстан құрамасы жеңіл атлетикадан Азия чемпионатының жалпы командалық есебінде екінші орын алды
Астана қаласында жеңіл атлетикадан жабық кешендегі Х Азия чемпионаты аяқталды
Сурет: Instagram/drs_kz
Астана. 13 ақпан. KAZAKHSTAN TODAY - Астана қаласында жеңіл атлетикадан жабық кешендегі Х Азия чемпионаты аяқталды. Қазақстан жеңіл атлетикадан Азия чемпионатында жалпы есепте 2-орын алды. Бұл туралы Спортты дамыту дирекциясы хабарлады.
Қазақстан құрамасы 6 алтын, 3 күміс және 3 қола медальге ие болды. Чемпион атанғандар - Каролин Кипкируи (3000 метрге жүгіру), Элина Михина (400 метрге жүгіру), ерлер құрамасы (эстафета 4х400 метр), әйелдер құрамасы эстафета 4х400 метр), Давид Ефремов (60 метрге кедергілер арқылы жүгіру), Надежда Дубовицкая (биіктікке секіру);
Күміс жүлдегерлер - Михаил Литвин (400 метрге жүгіру), Ольга Сафронова (60 метрге жүгіру), Кристина Овчинникова (биіктікке секіру);
Қола медаль алғандар - Ақбаян Нұрмамет (1500 метрге жүгіру), Шэдрак Кимутай (3000 метрге жүгіру), Елизавета Матвеева (биіктікке секіру);
Жалпы есепте 15 медальге - 6 алтын, 5 күміс пен 4 қолаға қол жеткізген Жапония құрамасы 1-орыннан көрінді.
Қатар атлеттері 8 жүлдемен (2 алтын, 4 күміс, 2 қола) үздік үштікті түйіндеді.
Барлығы бұл чемпионатқа 31 елден 500-ден астам спортшы жиналды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Мемлекет басшысы "Атлетико де Мадрид Қазақстан" футбол академиясына барды
Сурет: Akorda
Президент Қасым-Жомарт Тоқаев өңірдегі бірегей спорт жобасы - "Атлетико де Мадрид Қазақстан" халықаралық деңгейдегі футбол академиясының қызметімен танысты, деп хабарлайды Қазақстан Республикасы Сыртқы істер министрлігінің баспасөз қызметінен.
Мемлекет басшысы академияның 180 балаға арналған жатақханасын аралап көрді. Қазір мұнда еліміздің әр түкпірінен келген 116 бала жаттығады. Академия ойыншыларын испандық бапкерлер іріктеп, оған Қазақстанның барлық өңірінен 4 мыңнан аса бала қатысты. Орталықта жас футболшылардың толыққанды оқу үдерісіне, жаттығулары мен жеке даярлығына барлық жағдай жасалған.
Қасым-Жомарт Тоқаевқа академияны дамыту және спорттық инфрақұрылымды кеңейту жоспары көрсетілді. Осы орайда жасанды көгалы бар екі ашық футбол алаңын, 500 орындық жабық манеж және әкімшілік-тұрмыстық кешеннің жаңа ғимаратын салу көзделген.
Президентке академия орнын таңдауда балаларды шыңдай түсетін табиғат факторлары ескерілгені айтылды. Алматы облысының Талғар ауданындағы таудың таза ауасы мен жағымды климат бала ағзасының тез қалпына келуіне септігін тигізеді.
Бұдан кейін Қасым-Жомарт Тоқаев жабындысы FIFA талаптарына сай келетін футбол алаңын көрді, сондай-ақ допты игеру техникасы мен испан әдістемесі бойынша командалық іс-қимыл дағдыларын пысықтауға кіріскен жас футболшылардың жаттығуын тамашалады.
Мемлекет басшысы академия өрендерімен жылы рәуіште әңгімелесті. Кездесуден естелік ретінде футбол добына қолтаңба қалдырды.
Іс-шараға Испанияның Қазақстандағы елшісі Луис Франсиско Мартинес Монтес, "Атлетико Мадрид" футбол клубы директорлар кеңесінің мүшесі Давид Вилья, аталған клубтың академия істері және халықаралық даму жөніндегі директорының орынбасары Мария Тереса Кириви қатысты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Астанада үстел теннисінен әлем чемпионатының ресми таныстырылымы өтеді
Сурет: depositphotos.com
2026 жылғы 20 мамырда Астанада үстел теннисінен әлем чемпионаты - ITTF World Table Tennis Championships Finals Astana 2027 турнирінің ресми таныстырылымы өтеді, деп хабарлайды чемпионаттың баспасөз қызметінен.
Іс-шара ADD Table Tennis Center Astana орталығында ұйымдастырылып, оған мемлекеттік органдардың өкілдері, халықаралық және қазақстандық бұқаралық ақпарат құралдарының өкілдері, спорт қауымдастығы, бизнес, туризм саласы және креативті индустрия өкілдері қатысады.
Аталған таныстырылым Қазақстанның Халықаралық үстел теннисі федерациясының (ITTF) қолдауымен өтетін әлем чемпионатын қабылдауға дайындық жөніндегі халықаралық науқанның ресми бастауына айналып, Астананың ірі халықаралық спорттық және іскерлік іс-шараларды өткізуге арналған заманауи алаң ретіндегі мәртебесін айқындай түседі.
Бағдарлама аясында Халықаралық үстел теннисі федерациясының (ITTF) туын таныстыру, Astana 2027 ресми бейнеролигінің көрсетілімі, турнир тұжырымдамасының таныстырылымы, сондай-ақ Қазақстан Республикасының Үстел теннисі федерациясы басшылығы мен чемпионатты ұйымдастыру комитеті өкілдерінің сөз сөйлеуі жоспарланған.
Сонымен қатар, қонақтарға болашақ демеушілік және туристік бағдарламалар, қолөнершілер мен креативті индустрия өкілдерін тартуға бағытталған бастамалар, сондай-ақ чемпионаттың ресми маскоттарын әзірлеу бойынша байқау туралы ақпарат ұсынылады. Іс-шара қатысушылары үшін үстел теннисі бойынша шеберлік сабақтары ұйымдастырылады.
ITTF World Table Tennis Championships Finals Astana 2027 турнирін өткізу халықаралық спорттық ынтымақтастықты дамытуға, оқиғалық туризмді ілгерілетуге және Қазақстанның халықаралық аренадағы имиджін нығайтуға маңызды серпін береді.
Өтетін күні: 2026 жылғы 20 мамыр
Уақыты: 14:00-15:00 - Қонақтарды қарсы алу, шеберлік сабақтарының көрсетілімі, кофе-брейк 15:00-16:00 - Іс-шараның ресми бағдарламасы
Өтетін орны: ADD Table Tennis Center Astana, Қабанбай батыр даңғылы, 47/1 Қатысушылар саны: 150 адам
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстандық гимнастар Варнадағы Challenge Cup кезеңінде екі рет үздік бестікке енді
Сурет: olympic.kz
Болгарияның Варна қаласында спорттық гимнастикадан Challenge Cup кезеңі мәресіне жетті, деп хабарлайды olympic.kz агенттігі.
Ат снарядындағы жаттығуда Роман Хегай 13,600 ұпай жинап, бесінші орынға тұрақтады. Ал Зейнолла Идрисов 13,133 ұпаймен алтыншы нәтиже көрсетті.
Нуртан Идрисов сақиналардағы жаттығудың финалында 13,166 ұпай алып, бесінші орынды иеленді.
Қол тіреп секіру жаттығуының финалына шыққан Асан Сәлімов жарысты алтыншы орынмен аяқтады (13,583). Ал кермедегі жаттығуда Роман Хегай 11,233 ұпай жинап, сегізінші орынға жайғасты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
"Қазақстан тарихта тұңғыш рет қысқы Паралимпиадада екі медаль еншіледі" - Ербол Хамитовты әуежайда салтанатты түрде қарсы алды
Сурет: gov.kz
Бүгін, 17 наурызда елорда әуежайында пара биатлоннан қысқы Паралимпиада чемпионы әрі пара шаңғы жарысынан қола жүлдегері Ербол Хамитовты салтанатты түрде қарсы алды, деп хабарлайды Қазақстан Республикасы Туризм және спорт министрлігінің баспасөз қызметінен.
Спортшыны жанкүйерлер, туған-туыстары және спорт саласының өкілдері күтіп алды. Ербол Хамитовты пен ұлттық құраманың спортшыларын Туризм және спорт министрі Ербол Мырзабосынов және Ұлттық паралимпиада комитетінің өкілі Бахыт Сапаров құттықтады.
Бүгін еліміз үшін қуанышты күн. Тарихымызда алғаш рет Паралимпиада ойындарында пара биатлоннан алтын медаль жеңіп алып, оған қоса бір Паралимпиадада екі бірдей медаль еншіледік. Бұл нәтиже - ерен еңбек пен тыңғылықты дайындықтың, мықты рухтың көрінісі. Осы ойындарға ұлттық құрама 7 спортшымен 2 спорт түрінен қатысып, жалпыкомандалық есепте 18-орынға тұрақтады. Спортшылардың әрқайсысы ел намысын абыроймен қорғады. Біз сіздермен мақтанамыз", - деді ол. Сондай-ақ, министр бапкерлер құрамының еңбегін де атап өтті.
Шара барысында демеушілік танытқан құрылыс компаниясы Ербол Хамитовқа екі бөлмелі пәтердің кілті табыстады.
Өз кезегінде спортшы да жанкүйерлеріне алғысын білдіріп, арман-мақсатқа адал болу керектігін атап өтті. Ол бұл жетістік алдағы уақытта бұдан да үлкен нәтижелерге жетуге мотивация беретінін айтты.
Айта кетейік, Милан-Кортина қысқы Паралимпиада Италияда 6-15 наурыз аралығында өтті. Оған 55 елден 600-ден астам спортшы қатысып, 79 медаль жиынтығы сарапқа салынды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Канадада жеңіске жеткен қазақстандық жас хоккейшілер елге оралды
Сурет: olympic.kz
Канадада жеңіске жеткен Astana Team балалар хоккей командасы елге оралды, деп хабарлайды olympic.kz.
Канаданың Квебек қаласында өткен жасөспірімдер арасындағы беделді Quebec International Pee-Wee Hockey Tournament турнирінің финалында жеңіске жеткен қазақстандық жас спортшылар елге келді. Оларды әуежайда зор қошеметпен күтіп алды.
Ұлттық олимпиадалық комитеттің мәліметінше, топтық кезеңдегі барлық матчта жеңіске жеткен Astana Team плей-оффқа сенімді түрде жолдама алды. Ширек финалда алаң иелері - Quebec Nordiques командасын 3:1 есебімен ұтып, жартылай финалда Quebec Remparts ұжымынан 2:1 есебімен басым түсті. Ал финалда Noir d’Or des Montagnes командасымен өткен тартысты кездесуде буллит сериясында 4:3 есебімен жеңіп, турнир чемпионы атанды.
Айта кетейік, бұл мәртебелі дода 1960 жылдан бері ұйымдастырылып келеді. Турнир BB, AA, AA Elites және ең жоғары AAA дивизиондарына бөлінеді.
Astana Team екінші деңгейлі дивизионда топ жарып, келесі маусымда AAA санатына көтерілу мүмкіндігіне ие болды. Жоғары дивизионға өту туралы шешімді турнирдің ұйымдастыру комитеті қабылдайды. Команда бұл турнирге екінші жыл қатарынан қатысып отыр. Олар 2024 жылы Францияда өткен іріктеу додасында жеңіске жетіп, алғаш рет AA Elites дивизионына жолдама алған еді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Софья Самоделкина елдік есепте жаңа рекорд орнатты
Сурет: Сали САБИРОВ, ҚР Туризм және спорт министрлігі
Мәнерлеп сырғанаудан Миланда өтіп жатқан XXV қысқы Олимпия ойындарында әйелдер арасындағы жеңімпаздар анықталды. Қазақстан атынан сынға түскен Софья Самоделкина өз мансабындағы рекордтық ұпайын жинап, 10-орынға тұрақтады, деп хабарлайды Қазақстан Республикасы Туризм және спорт министрлігінің баспасөз қызметінен.
Мұз айдынына он үшінші болып шыққан Софья Самоделкина өз қойылымын мінсіз орындап, 138.99 ұпай еншіледі. Ал қос бағдарламаның қорытындысы бойынша, отандасымыз 207.46 ұпаймен жеке мансабындағы ең үздік көрсеткішін тіркеді.
Софья бұған дейінгі рекордтық ұпайын 2021 жылы (205.67 ұпай) алған еді.
Жүлдегерлер:
- 1-орын. Алиса Лю (АҚШ) - 226.79 ұпай (жеке рекордын жаңартты)
- 2-орын. Каори Сакамото (Жапония) - 224.90 ұпай
- 3-орын. Ами Накаи (Жапония) - 219.16 ұпай
10-орын. Софья Самоделкина - 207.46 ұпай
Айта кетейік, қысқы Олимпиаданың тарихында мәнерлеп сырғанаудан әйелдер арасында тек 2018 жылы ғана Элизабет Тұрсынбаева мен Айза Мамбекова өнер көрсеткен. Элизабет Тұрсынбаева сол Ойындарда 12-орынға тұрақтаған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Милан-Кортина 2026: Софья Самоделкина қысқа бағдарламада жеке рекордын жаңартты
Сурет: gov.kz
Бүгін Италиядағы XXV қысқы Олимпия ойындарында мәнерлеп сырғанаудан әйелдер сайысында финалға өткен 24 спортшының есімі белгілі болды. Қазақстан атынан өнер көрсеткен Софья Самоделкина әзірше 12-орында келе жатыр, деп хабарлайды Қазақстан Республикасы Туризм және спорт министрлігінің баспасөз қызметінен.
Софья қысқа бағдарламасында 68.47 ұпай жинап, жеке рекордын жаңартты. Сондай-ақ оның Олимпиададағы дебюті туған күнімен (19 жас) тұспа-тұс келді.
Қысқа бағдарламаның қорытындысы (29 қатысушы):
1.Ами Накаи (Жапония) - 78.71 ұпай
2.Каори Сакамото (Жапония) - 77.23 ұпай
3. Алиса Лю (АҚШ) - 76.59 ұпай
12-орын. Софья Самоделкина - 68.47 ұпай
Шешуші еркін бағдарлама 19 ақпан күні Астана уақытымен 23:00-де өтеді.
Айта кетейік, мәнерлеп сырғанаудан әйелдер арасында Қазақстан екінші мәрте ғана жүлдеге таласып жатыр. 2018 жылы Пхенчхан Олимпиадасында ел намысын Айза Мамбекова мен Элизабет Тұрсынбаева қорғаған еді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.