Қазақстанда Алғыс айту күні аталып өтуде
Қазақстан Республикасының Тұңғыш Президенті – Елбасы Нұрсұлтан Назарбаев және Мемлекет Басшысы Қасым-Жомарт Тоқаев қазақстандықтарды Алғыс айту күнімен құттықтады.
Қымбатты отандастар! Алғыс айту күні Қазақстан халқының бірлігін паш етеді, мейірімділіктің, өзара көмек пен жақсылықтың жаршысы болып саналады. Көктемнің алғашқы күнінде – тіршілік атаулы жанданып, жер-дүние жаңаратын кезеңде атап өтілуі бұл мерекеге ерекше сән береді. Бүгін біз қазақ халқының рухани ерлігі мен еліміздегі барлық этностардың басына түскен ауыр сынақтарды еске алып қана қоймай, келешекке зор сеніммен қараймыз. Қазақстан қоғамының келісімі мен татулығы – сол жарқын болашақтың берік іргетасы", - деді Нұрсұлтан Назарбаев.
Ол коронавирус пандемиясына тойтарыс беру кезінде де біздің бірлігіміздің маңызы айқын көрініп отырғанын атап өтті. Қазақстандықтар мемлекетіміздің тұрақты дамуына қауіп төндірген жаһандық сынаққа ел болып жұмыла қарсы тұрды.
Тәуелсіздіктің 30 жылдығында өрлеу мен өркендеуге бастайтын жол адамгершіліктің айнымас қағидаларына, толеранттылық принциптеріне, төл тарихымызға құрмет пен ортақ Отанымыз – Қазақстан Республикасына деген сүйіспеншілікке негізделетінін тағы бір мәрте айғақтап отырмыз. Барлық қазақстандықтарды Алғыс айту күнімен шын жүректен құттықтаймын! Баршаңызға мол игілік, мықты денсаулық, тыныштық пен бақ-береке тілеймін!", - деп қорытындылады Елбасы.
Сондай-ақ, Қазақстан азаматтарын Мемлекет Басшысы Қасым-Жомарт Тоқаев құттықтады.
Құрметті отандастар! Сіздерді Алғыс айту күнімен шын жүректен құттықтаймын! Елбасы 2015 жылы Қазақстан халқы Ассамблеясының сессиясында жариялаған осы айтулы мерекенің мәні терең, маңызы ерекше. Бұл күні халқымыздың бір-біріне өзара қамқорлығы, мызғымас береке-бірлігі мен ынтымағы кеңінен дәріптеледі. Біз осы құндылықтардың арқасында мемлекеттігімізді жаңғыртып, түрлі сын-қатерден сүрінбей өттік. Қазір Тәуелсіздігіміздің 30 жылдық белесін әлеуметтік-экономикалық саладағы және халықаралық деңгейдегі толағай табыстармен қарсы алғалы отырмыз", - деді Тоқаев.
Ол бүгінде азаматтарымыз егемен елімізді дамытуға, қастерлі қазақ жеріндегі бейбітшілікті, татулық пен келісімді нығайтуға өлшеусіз үлес қосып отырғанын атап өтті.
Мен баршаңызға Отанымыздың өркендеуі жолында сіңірген жасампаз еңбектеріңіз үшін алғыс айтамын. Біз біртұтас және еңбекқор ұлт болсақ, көздеген мақсаттарымызға жетеміз. Бәріміз бірге әділетті қоғам құрып, мемлекеттілігімізді орнықтыра түсеміз деп сенемін. Баршаңызға зор денсаулық, бақ-береке және мол игілік тілеймін!", - деп атап өтті Президент.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
БҰҰ-да Қазақстанның цифрлық трансформация және жасанды интеллект саласындағы жетістіктері таныстырылды
Сурет: gov.kz
ҚР Президенті Қасым-Жомарт Тоқаевтың бастамасымен жарияланған Жасанды интеллект жылы аясында БҰҰ-ның Нью-Йорктегі штаб-пәтерінде Қазақстанның мемлекеттік басқаруды цифрлық трансформациялау және жасанды интеллектті дамыту саласындағы жетістіктері таныстырылған жоғары деңгейдегі іс-шара өтті, деп хабарлайды Қазақстан Республикасының БҰҰ жанындағы Тұрақты өкілдігінің баспасөз қызметінен.
Вице-министр Б.Мұхаметқалиев Қазақстанның мемлекеттік басқаруды цифрлық трансформациялау және AI-Native Government моделіне көшу бағытындағы жетістіктерін таныстырды. Ұлттық цифрлық инфрақұрылымды дамытуға, оның ішінде Smart Data Ukimet платформасына, eGov.GPT жүйесіне, проактивті мемлекеттік қызметтерге, Цифрлық отбасы картасына және электрондық үкіметтің бірыңғай интеграциялық платформасына ерекше назар аударылды.
Сондай-ақ, Институционалдық негізді, заманауи есептеу инфрақұрылымын және адами капиталды дамытуға негізделген Қазақстанның ұлттық жасанды интеллект экожүйесі таныстырылды. Қатысушылар Қазақстанда жүзеге асырылып жатқан бастамалармен, оның ішінде "Жасанды интеллект туралы" ҚР заңнамасымен, ҚР Президентінің жанындағы Жасанды интеллектті дамыту жөніндегі кеңестің қызметімен, ұлттық суперкомпьютерлік қуаттарды дамытумен, отандық үлкен тілдік модельдерді әзірлеумен және еліміздегі алғашқы Data Center Valley жобасымен танысты.
Астанада ашылған AlemAI халықаралық жасанды интеллектті дамыту орталығына ерекше назар аударылды. Орталық TUMO Astana, Tomorrow School, Халықаралық жасанды интеллект университеті, стартап-экожүйе бағдарламалары мен зерттеу зертханаларын қоса алғанда, жасанды интеллект саласындағы білім беру, ғылыми-зерттеу және инновациялық бастамаларды біріктіріп, кадрларды даярлау мен жасанды интеллект технологияларын енгізудің кешенді платформасын қалыптастыруда.
Өз сөздерінде халықаралық қатысушылар Қазақстанның мемлекеттік басқаруды цифрландыру және жасанды интеллектті дамыту саласындағы жетістіктеріне жоғары баға берді. Қазақстанның цифрлық қоғамдық инфрақұрылымды дамыту, проактивті мемлекеттік қызметтерді енгізу және ұлттық жасанды интеллект экожүйесін қалыптастыру тәжірибесі басқа мемлекеттер үшін үлкен қызығушылық тудыратыны және мемлекеттік басқарудың тиімділігі мен көрсетілетін қызметтердің сапасын арттыруда цифрлық технологияларды пайдаланудың практикалық үлгісі бола алатыны атап өтілді.
Қатысушылар инклюзивті, қауіпсіз және адамға бағдарланған жасанды интеллектті дамыту үшін халықаралық ынтымақтастықты нығайтудың маңыздылығын атап өтті. Цифрлық қоғамдық инфрақұрылымды дамыту, мемлекеттердің әлеуетін арттыру және цифрлық трансформация саласындағы озық тәжірибемен алмасу мәселелеріне ерекше назар аударылды. Сондай-ақ Қазақстанның халықаралық цифрлық күн тәртібін ілгерілетудегі және цифрлық технологиялар мен жасанды интеллект саласындағы ынтымақтастықтың жаңа платформаларын қалыптастырудағы белсенді рөлі атап өтілді.
Іс-шара Қазақстанның халықаралық ынтымақтастықты дамытуға, озық тәжірибе алмасуға және тұрақты даму мен БҰҰ-ның Тұрақты даму мақсаттарына қол жеткізу мүддесінде инновациялық цифрлық шешімдерді ілгерілетуге бейілділігін растады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Жәннат Дүбірова Қазақстан Республикасы өнеркәсіп және құрылыс вице-министрі қызметінен босатылды
Сурет: Үкімет
Қазақстан Республикасы Үкіметінің қаулысымен Жәннат Балғабайқызы Дүбірова Қазақстан Республикасы өнеркәсіп және құрылыс вице-министрі қызметінен босатылды. Бұл туралы Үкіметтің Баспасөз қызметі хабарлайды.
Жаннат Дубирова 2023 жылдың желтоқсан айынан бастап өнеркәсіп және құрылыс вице-министрі қызметін атқарған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ҚР жасанды интеллект және цифрлық даму вице-министрі тағайындалды
Сурет: Үкімет
Қазақстан Республикасы Үкіметінің қаулысымен Ғиззат Сейдахметұлы Байтұрсынов жасанды интеллект және цифрлық даму вице-министрі қызметіне тағайындалды. Бұл туралы ҚР Үкіметінің Баспасөз қызметі хабарлайды.
Ол 1994 жылы Шымкент қаласында дүниеге келген. Малайзияның Азия-Тынық мұхиты технологиялар және инновациялар университетін, Д.А. Қонаев атындағы Еуразия заң академиясын бітірген. 2026 жылдың наурыз айынан бастап қазіргі уақытқа дейін ҚР Жасанды интеллект және цифрлық даму министрлігінің Цифрлық активтер және серпінді технологиялар комитетінің төрағасы қызметін атқарды.
Сондай-ақ, Үкіметтің қаулысымен Дмитрий мун жасанды интеллект және цифрлық даму вице-министрі қызметінен босатылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Әлеуметтік желілерде алауыздықты қоздырғаны үшін 20 жылға дейін бас бостандығынан айыру жазасына қарастырыған - ҚР Бас прокуратурасы
Қазақстан Республикасының Бас прокуратурасы әлеуметтік желілерде арандатушылық жарияланымдар мен қоғамдағы алауыздықты қоздыруға бағытталған пікірлерді тарату фактілерінің жиілеуіне байланысты қазақстандықтарға үндеу жасады.
Күш құрылымының өкілдері мұндай әрекеттерге мүлдем жол берілмейтінін және заңға сәйкес қатаң түрде қудаланатынын атап өтті.
Қылмыстық кодекстің 174-бабына сәйкес алауыздықты қоздырғаны үшін жасалған іс-әрекеттің ауырлығына қарай 2 мыңнан 7 мың АЕК дейін айыппұл салу не 2 жылдан 20 жылға дейін бас бостандығын шектеу немесе айыру түріндегі жаза көзделген.
Сонымен қатар, Қазақстанда онлайн-платформаларда құқыққа қайшы контентті орналастыруға және таратуға тыйым салынған. Егер мұндай әрекеттерде қылмыстық құқық бұзушылық белгілері болмаса, Әкімшілік құқық бұзушылық туралы кодекстің 456-2-бабының 3-1-бөлігіне сәйкес 20 АЕК мөлшерінде айыппұл салынады.
Таратылатын ақпараттың шынайылығын тексеруге ерекше назар аудару, сондай-ақ қоғамда алауыздық туғызуы мүмкін материалдарды жариялаудан және таратудан бас тарту қажет.
Жалған ақпаратты салғаны және таратқаны үшін Қазақстан Республикасы Әкімшілік құқық бұзушылық туралы кодексінің 456-2-бабының 3-бөлігіне сәйкес әкімшілік жауаптылық көзделген. Ал, көрінеу жалған ақпарат таратқан жағдайда, Қазақстан Республикасы Қылмыстық кодексінің 274-бабына сәйкес қылмыстық жауаптылық қарастырылған.
Сондай-ақ, мұндай жарияланымдардың авторлары ғана емес, оларды саналы түрде таратуға қатысқан адамдарға да құқықтық салдар туындайтынына назар аудартамыз. Бас прокуратура азаматтарды арандатушылыққа ермеуге, тексерілмеген ақпаратты таратпауға, қоғамдық келісіммен азаматтар арасындағы өзара құрметке нұқсан келтіруі мүмкін жарияланымдар мен пікірлерден бас тартуға шақырады. Қазақстан халқының бірлігі, өзара сыйластық пен қоғамдық келісім - еліміздің тұрақтылығының, қауіпсіздігінің және келешектегі дамуының берік негізі", деп айтылған хабарламада.
Құқық қорғау органдары "Заң мен тәртіп" қағидаты аясында қоғамдық қауіпсіздік пен қоғамдық тәртіпке қол сұғатын кез келген құқық бұзудың жолын кесіп, олардың алдын алу үшін заңда көзделген шараларды қабылдайтын болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Мемлекет басшысы Бельгияда білім алып, жұмыс істеп жатқан жерлестерімізбен кездесті
Сурет: Ақорда
Брюссельге ресми сапармен барған Президент Қасым-Жомарт Тоқаев қазіргі уақытта Бельгияда білім алып, жұмыс істеп жатқан Қазақстан азаматтарымен кездесті, деп хабарлайды Ақорданың баспасөз қызметінен.
Мемлекет басшысы әңгімелесу барысында отандастарымызды жаңа Конституцияның қабылдануымен құттықтады.
Жалпыхалықтық референдумда халқымыз бірауыздан, біртұтас қоғам болып Конституциямызды қолдады. Өте керемет құжат, 1 шілдеде күшіне енеді. Ата заңымыз халқымыздың темірқазығы болады. Сондықтан баршаңызды шын жүректен жаңа Конституцияның қабылдануымен құттықтаймын", - деді Президент.
Елімізге сіздер сияқты білімді, көзі ашық, көкірегі ояу жастар қажет. Қай жерге барсам да жастарға қолдау білдіріп жүремін. Шын мәнінде, бұл жай айтыла салған сөз емес. Жастарға қолдау көрсету - мемлекеттің ұзақмерзімді саясатының бір бөлігі. Жастарымыз әлемнің әр түкпірінде білім алып, еңбек етуде. Мен Президент ретінде мұны қолдаймын. Себебі қай жерде жүрсеңіз де, қазақ болып қаласыз. Біз озық, дамыған, әділетті ел болуымыз керек. Осындай елдің негізін қалау үшін бәріміз бір ел, бір халық болып атсалысуымыз керек, - деп отандастарымызға қолдау білдірді президент.
Қасым-Жомарт Тоқаев еліміздің жаңа Негізгі заңында білім мен ғылымды және инновацияны дамыту мемлекет қызметінің стратегиялық бағыты ретінде белгіленгенін айтты. Сонымен қатар жастарды бірнеше шет тілін меңгеруге шақырды.
Отандастар оқу мен жұмыстағы жетістіктері жөнінде әңгімелеп, келешек жоспарларымен бөлісті. Атап айтқанда, KU Leuven университетінің 3 курс студенті Әлім-Сері Махамбәтәлі Бельгиядағы қазақстандық студенттер қауымдастығы, ал Аружан Болатбекова Брюссельдегі Kazakh Speaking Club қызметі туралы баяндады.
Кездесу соңында Президент Бельгияда тұратын студенттер мен Қазақстан азаматтарына табыс тіледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда жыл басынан бері 700-ден астам жанармайды заңсыз шығару жолдары кесілді
2026 жылдың басынан бері Қазақстанда автомобиль өткізу бекеттері арқылы жанар-жағармай материалдарын (ЖЖМ) заңсыз шығарудың 712 әрекетінің жолы кесілді, деп хабарлайды ҚР Үкіметінің баспасөз қызметінен.
ЖЖМ экспорттауға тыйым салу шаралары қолданылған кезеңде Энергетика министрлігі жанармайды шетелге заңсыз шығарудың алты арнасының жұмысын тоқтатты. Заңсыз айналымнан 1,5 мың тоннадан астам жанар-жағармай тәркіленді.
Жыл басынан бері құқық қорғау органдары сегіз қылмыстық іс тіркеді. Олардың қатарында 28,5 мың тонна есепке алынбаған мұнайды заңсыз өңдеу және 190 мың тоннадан астам бензинді контрабандалық жолмен шығару фактілері бар. Бұл схемалар бойынша көлеңкелі айналым көлемі 37,2 млрд теңгеден асты.
Сонымен қатар Ішкі істер министрлігі көліктерді қайта жабдықтау арқылы жанармай шығарудың заңсыз схемаларын анықтап жатыр. Осы мақсатта қосымша жанармай бактарын орнатуы мүмкін техникалық қызмет көрсету станцияларында тексерулер жүргізілуде.
Атап айтқанда, Жамбыл облысында сәуір айының соңынан маусым айының ортасына дейін қосымша жанармай бактары мен газ баллон жабдықтарын заңсыз орнатудың 73 фактісі анықталды. Қордай ауылында 16 техникалық қызмет көрсету станциясы тексеріліп, олардың алты иесіне қатысты шаралар қабылданды.
Бұған дейін Қазақстан Премьер-Министрі Олжас Бектенов шекарадағы бақылауды күшейтіп, жанармай тапшылығына жол бермеу үшін барлық қажетті шараларды қабылдауды тапсырған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.