03.04.2026, 11:50 7016

Жапонияның Экономика мемлекеттік министрі Қазақстанның жаһандық энергетикалық қауіпсіздікті қамтамасыз етудегі маңызды рөлін атап өтті

Қазақстан Республикасының Жапониядағы Елшісі Ерлан Баударбек-Қожатаев Жапонияның Экономика, сауда және индустрия мемлекеттік министрі Кенджи Ямадамен кездесу өткізді, деп хабарлайды Қазақстан Республикасы Сыртқы істер министрлігінің баспасөз қызметінен.

Сұхбат барысында тараптар ҚР Президенті Қасым-Жомарт Тоқаевтың 2025 жылғы желтоқсанда Жапонияға жасаған ресми сапарының қорытындылары бойынша қол жеткізілген уағдаластықтарды іс жүзінде жүзеге асыруды талқылады.

Сұхбаттасушылар тұрақсыз халықаралық ахуал жағдайындағы жаһандық энергетикалық қауіпсіздік мәселелері бойынша пікір алмасып, энергетика, маңызды минералдар, өнеркәсіптік кооперация, цифрландыруды, көлік және логистиканы қоса алғанда, басым бағыттардағы ынтымақтастықты кеңейту перспективаларын талқылады. Қазақстанның жеткізу тізбектерін әртараптандыру, экономикалық қауіпсіздікті нығайту және орнықты көлік бағыттарын ілгерілету мәселелерінде Жапонияның сенімді әріптесі ретіндегі рөлінің артып келе жатқаны аталып өтті.

Елші сұхбаттасушыны екіжақты сауда-экономикалық және инвестициялық ынтымақтастықтың өзекті мәселелерімен таныстырып, перспективті жобалар тізімін табыстады.

Өз кезегінде К.Ямада жапон тарапының Қазақстан мен Жапония арасындағы экономикалық ынтымақтастық жөніндегі үкіметтік және жеке секторлардың бірлескен комиссиясының кезекті отырысын ағымдағы жылы Астанада өткізуге мүдделі екенін растады.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

10.04.2026, 21:57 2156

Қазақстан өңірлері Мордовиямен ынтымақтастықты нығайтуда

Сурет: gov.kz

Қазақстанның Ресейдегі Елшісі Даурен Абаевтың Мордовия Республикасына жұмыс сапары өтті, деп хабарлайды Қазақстан Республикасы Сыртқы істер министрлігінің баспасөз қызметінен.

Сапар барысында Республика басшысы Артём Здуновпен кездесу өтіп, ынтымақтастықтың өзекті мәселелері талқыланды.

Қазақстан Мордовияның негізгі сауда серіктестерінің бірі болып табылады. 2025 жылдың қорытындысы бойынша өзара тауар айналымы 149 млн АҚШ долларын құрап, алдыңғы жылмен салыстырғанда 13%-ға артты. Сонымен қатар, Қазақстан Мордовия экспортының 42%-ын қамтамасыз етіп, негізгі экспорт бағыттары арасында бірінші орынға шықты.

Өнеркәсіп саласында да нақты өзара іс-қимыл дамып келеді. Қазақстан нарығы Мордовия кәсіпорындарының өнімдеріне сұранысқа ие болып отыр. Іскерлік байланыстарды кеңейту мақсатында Елші теміржол вагондары мен мұнай-химия жабдықтарын өндіретін жетекші кәсіпорын - "Рузхиммаш" АҚ-да болды.

Тараптар өнеркәсіптік кооперация, ауыл шаруашылығы, тамақ өндірісі және радиоэлектроника салаларында ынтымақтастықтың әлеуеті жоғары екенін атап өтті.

Жұмыс сапары аясында Саранск қаласында Қазақстан Республикасының Құрметті консулы кеңсесінің ашылу рәсімі өтті.

Ашылу салтанатында сөйлеген сөзінде Д.Абаев Мордовия басшылығына аталған бастаманы қолдағаны үшін алғыс білдіріп, бұл оқиғаны дер кезінде жасалған әрі маңызды қадам деп атады. "Оның қызметі іскерлік, гуманитарлық, мәдени және білім беру байланыстарын кеңейтуге, сондай-ақ азаматтарымыз арасындағы өзара іс-қимылға қатысты практикалық мәселелерді шешуге ықпал етіп, жаңа бастамалар мен пайдалы жобаларды іске асыруға тиімді алаң болады деп сенемін", - деді Елші.

Саранск қаласындағы Қазақстан Республикасының Құрметті консулы болып жергілікті кәсіпкер Андрей Рогачёв тағайындалды. Ол көрсетілген сенім үшін алғыс білдіріп, нәтижеге бағытталған белсенді әрі жемісті жұмыс жүргізуге дайын екенін жеткізді.

ҚР Құрметті консулының кеңсесі Мордовия Республикасының Сауда-өнеркәсіп палатасының базасында (Саранск қ., Московская көшесі, 14) орналасқан.

Сонымен қатар, Саранск қаласында өткен Қазақстан киносының күндері мен "Қазақстан - дала мен таулар симфониясы" атты фотокөрменің ұйымдастырылуы мәдени-гуманитарлық байланыстардың серпінді дамуының маңызды көрсеткіші болды.

Мордовия тұрғындары осы күндері заманауи Қазақстанмен жақынырақ таныса алатынына шын жүректен қуаныштымыз", - деп атап өтті Д.Абаев.

10.04.2026, 20:55 2366

Қазақстан мен Финляндия сайлау және демократиялық институттар саласындағы ынтымақтастықты нығайтуда

Қазақстанның Финляндиядағы Елшісі Азамат Әбдіраимов Финляндия Республикасы Әділет министрлігінің Сайлау және демократия мәселелері жөніндегі департаментінің басшысы Никлас Вилхелмссонмен кездесті, деп хабарлайды Қазақстан Республикасы Сыртқы істер министрлігінің баспасөз қызметінен.

Кездесу барысында қазақстандық дипломат сұхбаттасын Қазақстан Республикасы Конституциясының жаңа редакциясын қабылдау жөніндегі республикалық референдумның қорытындылары туралы хабардар етті. Құжатта билік тармақтары арасындағы өкілеттіктерді қайта бөлу, парламенттік жүйені дамыту және азаматтардың қоғамдық-саяси процестерге қатысуын кеңейтуге бағытталған өзгерістер көзделгені атап өтілді. Осы тұрғыда бір палаталы парламенттік модельге көшу, оның ішінде Финляндия секілді қалыптасқан демократиялық институттары бар елдердің тәжірибесін ескере отырып жүзеге асырылатыны айтылды.

Қазақстан Республикасы Президенті Қасым-Жомарт Тоқаевтың саяси және конституциялық реформалары аясында жүзеге асырылып жатқан бұл өзгерістер мемлекеттік басқару жүйесін одан әрі жетілдіруге, соның ішінде сайлау рәсімдері мен оларды өткізу тетіктерін дамытуға бағытталғаны ерекше атап өтілді.

Фин тарапы екіжақты өзара іс-қимылды одан әрі нығайтуға дайын екенін білдірді. Атап айтқанда, бейінді мемлекеттік органдар арасындағы ынтымақтастықты кеңейту, сондай-ақ сайлау технологиялары мен құқықтық реттеу саласындағы озық тәжірибемен алмасу мәселелері қолдау тапты.

10.04.2026, 19:52 136

Жапонияның Экономикалық қауіпсіздік министрі Қазақстанмен ынтымақтастықтың басым бағыттарын атады

Қазақстан Республикасының Жапониядағы Елшісі Ерлан Баударбек-Қожатаев Жапонияның Экономикалық қауіпсіздік мәселелері жөніндегі министрі Кими Онодамен кездесу өткізді, деп хабарлайды Қазақстан Республикасы Сыртқы істер министрлігінің баспасөз қызметінен.

Жапон саясаткері ғылым, технология және ғарыш қызметі саласындағы ынтымақтастықты тереңдетуге мүдделілік танытып, Қазақстанды "Токионың берік және сенімді әріптесі" деп атады. Ол екі елдің жетекші компаниялары мен экономикалық ұйымдарының қатысуымен іске асырылып жатқан бірлескен жобаларды жоғары бағалап, Қазақстанның елеулі экономикалық әлеуетін және іскерлік байланыстарды одан әрі арттыруға кең мүмкіндіктердің бар екенін атап етті.

Тараптар Қазақстан мен Жапония арасындағы ынтымақтастықтың қазіргі жағдайы мен оны одан әрі даму перспективаларын талқылады. Басым бағыттардың қатарында аса маңызды минералдық ресурстар саласы, энергетика, ақпараттық технологиялар, жасанды интеллект және ғарыш бағыты белгіленді.

Өз тарапынан ҚР Елшісі жапон тарапын елдің ағымдағы әлеуметтік-экономикалық дамуы, Үкіметтің экономиканы цифрландыру, сондай-ақ көлік инфрақұрылымын жаңғырту шаралары туралы хабардар етті. Осы тұрғыда Транскаспий халықаралық көлік бағытының әлеуетін одан әрі дамыту және кеңейту перспективалары ұсынылды.

Кездесу қорытындысы бойынша тараптар кеңейтілген стратегиялық әріптестікті алдағы уақытта да нығайтуға, практикалық өзара іс-қимылды дамытуға және Қазақстан мен Жапония арасындағы дәстүрлі достық қатынастарды тереңдетуге өзара міндеттемелерін растады.

10.04.2026, 18:49 2941

Қазақстанның ұлттық әуе компаниясы Алматы - Шаңхай бағытында жаңа тікелей әуе қатынасын ашты

Сурет: gov.kz

Шаңхай қаласында Қазақстанның ұлттық әуе компаниясы Air Astana жүзеге асыратын Алматы - Шаңхай бағыты бойынша жаңа тікелей әуе рейсін салтанатты түрде ашты. Бұл рейстің ашылуы Қазақстан Республикасы мен Қытай Халық Республикасы арасындағы екіжақты, әсіресе экономикалық саладағы ынтымақтастықты одан әрі дамытуға қосымша серпін береді, деп хабарлайды Қазақстан Республикасы Сыртқы істер министрлігінің баспасөз қызметінен.

Қазақстан Республикасының Шаңхай қаласындағы Бас консулы Нұрлан Аққошқаров іс-шараға қатысып, Алматы-Шаңхай арасындағы жаңа бағыттың ашылуы екіжақты өзара іс-қимылды тереңдетуге, сауда-экономикалық және инвестициялық әріптестікті кеңейтуге, сондай-ақ екі ел арасындағы гуманитарлық байланыстарды жандандыруға бағытталған стратегиялық маңызды қадам екенін атап өтті.

Жаңа бағыттың 2026 жылғы 7-10 сәуір аралығында Шаңхай қаласының мэрі Гун Чжэннің Қазақстанға жасаған сапары кезінде ашылуы ерекше мәнге ие болды. Бұл қадам 2025 жылғы маусымда орнатылған Алматы мен Шаңхай қалалары арасындағы бауырластық байланыстарды нығайтудың жарқын дәлеліне айналды.

Салтанатты іс-шараға Air Astana басшылығы, Шаңхай қаласының Сыртқы істер басқармасының өкілдері, сондай-ақ мегаполистің мемлекеттік органдары мен іскерлік топтардың жетекшілері қатысты. Бұл тараптардың өңіраралық ынтымақтастықты одан әрі дамытуға жоғары деңгейде мүдделі екенін көрсетті.

Air Astana әуе компаниясының жаңа рейсті іске қосуы тікелей әуе тасымалына деген өсіп келе жатқан сұранысқа жауап береді және Қазақстанның көлік қолжетімділігін арттыруға ықпал етеді. Жаңа бағыттың ашылуы Қазақстан мен Қытай арасындағы стратегиялық серіктестікті нығайтуға қосымша серпін беріп, өңіраралық ынтымақтастық пен екіжақты қатынастардың одан әрі жандануына ықпал ететін болады.

Сонымен қатар, бұл Қазақстанның Қытайды Орталық Азиямен, Кавказбен, Таяу Шығыспен және Еуропамен байланыстыратын негізгі транзиттік хаб ретіндегі рөлін күшейтеді.

10.04.2026, 17:46 591

Астанадағы қазақ-поляк бизнес-форумы: іскерлік серіктестіктің нығаюы

Сурет: gov.kz

Қазақстан Республикасы Сыртқы істер министрлігінде Экономикалық ынтымақтастық жөніндегі үкіметаралық комиссияның 10-отырысы аясында қазақ-поляк бизнес-форумы өтті, деп хабарлайды Қазақстан Республикасы Сыртқы істер министрлігінің баспасөз қызметінен.

Іс-шара екіжақты сауда-экономикалық және инвестициялық ынтымақтастықты дамытуға бағытталып, оған Қазақстан мен Польшаның жетекші компанияларының 120-дан астам өкілі қатысты.

Қазақстан тарапынан Үкіметаралық комиссияның тең төрағасы, Қазақстан Республикасы Сыртқы істер министрінің орынбасары Арман Исетов және Қазақстан Республикасы Энергетика вице-министрі Санжар Жаркешов сөз сөйледі.

Польша тарапынан комиссияның тең төрағасы, Польша Республикасы Экономикалық даму және технологиялар министрінің орынбасары Михал Барановский, сондай-ақ мемлекеттік органдар мен жетекші поляк компанияларының өкілдері қатысты.

Пленарлық отырысты аша отырып, А. Исетов екіжақты қатынастардың тұрақты дамуын атап өтті.

Өткен жылдың қорытындысы бойынша екі ел арасындағы тауар айналымы 1,2 млрд АҚШ долларынан асты. Қазіргі таңда Қазақстанда Polpharma, Selena Group, Rogalik, Suus және Maspex сынды белгілі брендтерді қоса алғанда Польша капиталының қатысуымен 150-ге жуық компания жұмыс істейді", - деді қазақстандық дипломат.

Өз кезегінде М. Барановский форум жаңа іскерлік байланыстар орнатуға және бірлескен жобаларды іске қосуға қосымша серпін беретініне сенім білдіріп, ынтымақтастықтың басым бағыттары ретінде логистика, көлік, энергетика және агроөнеркәсіптік кешенді атады.

Форум бағдарламасы өнеркәсіптік серіктестік, инвестициялық өзара іс-қимыл және көлік-логистика саласындағы ынтымақтастықты дамыту мәселелеріне арналған екі панельдік сессияны қамтыды. Іс-шара аясында Польша компанияларының таныстырылымдары өтіп, екіжақты B2B кездесулер ұйымдастырылды.

Жалпы, бизнес-форум Астана мен Варшаваның сауда-экономикалық ынтымақтастықты одан әрі кеңейтуге өзара мүдделілігін растады.

09.04.2026, 22:29 1031

Investment Protection Forum: тұрақтылық пен инвестициялық тартымдылықты қамтамасыз ету

Сурет: gov.kz

Қазақстан Республикасы Бас прокуратурасы ұйымдастырған Инвестицияларды қорғау форумы өтті. Іс-шара инвесторлардың құқықтарын қорғау, инвестициялық жобаларды құқықтық сүйемелдеу тетіктерін жетілдіру және тұрақты инвестициялық ахуалды қалыптастыру мәселелеріне арналды, деп хабарлайды Қазақстан Республикасы Сыртқы істер министрлігінің баспасөз қызметінен.

Іс-шараға ҚР Бас Прокуроры Б.Асылов, ҚР Премьер-министрінің бірінші орынбасары Р.Скляр, ҚР Парламенті Мәжілісі төрағасының орынбасары Д.Еспаева, "Атамекен" ҰКП Президиумының Төрағасы К.Шарлапаев, Инвесторлардың құқықтарын қорғау комитетінің төрағасы Б.Ералы және инвестор - компаниялардың бірқатар басшылары қатысты.

ҚР Сыртқы істер министрінің орынбасары Әлібек Қуантыров өз сөзінде Қазақстанның қазіргі инвестициялық саясаты тұрақтылықты қамтамасыз етуге және жоғары инвестициялық тартымдылықты қолдауға бағытталған кешенді шаралар жүйесін көздейтінін атап өтті.

Тәуелсіздік алған сәттен бастап ел экономикасына 480 млрд АҚШ долларынан астам инвестиция тартылды. 2025 жылы тікелей шетелдік инвестициялар ағыны 20,5 млрд АҚШ долларын құрап, өсім 14,4%-ды көрсетті", - деді Ә.Қуантыров.

Ол өңдеуші өнеркәсіп пен қаржы секторы өсімнің негізгі драйверлері болғанын атап өтті. Бұл инвестициялық екпіннің шикізат өндіруден әртараптандырылған, тұрақты және қосалқы құнға бағдарланған экономика қалыптастыруға біртіндеп ауысып жатқанын куәландырады.

Инвесторлармен жұмыстағы таргеттелген тәсілдің нәтижесінде бүгінгі күні жалпы сомасы 2,5 млрд АҚШ долларынан асатын инвестициямен бірқатар ірі халықаралық компаниялар тартудың сәті туды. Өткен жылы шетелде шетелдік компаниялармен шамамен 1200 кездесу өткізіліп, олардың Қазақстанға 200-ге жуық сапары қамтамасыз етілді", - деп қосты СІМ басшысының орынбасары.

Сонымен қатар ол шетелдік серіктестермен бірізді әрі үйлестірілген жұмыс жүргізу үшін арнайы "task force" тетігі құрылғанын хабарлады. Бас прокуратурамен және жергілікті атқарушы органдармен бірлесіп инвесторлардың проблемалық мәселелерін жедел шешу бойынша шаралар қабылдануда, сондай-ақ инвестициялық процестер цифрландырылып, бұл бағыттағы жұмыс жалғасуда екенін айтты.

09.04.2026, 21:25 1166

Қазақстан мен Армения консулдық консультациялар өткізіп, консулдық саладағы ынтымақтастықты кеңейтуге мүдделі екенін білдірді

Сурет: gov.kz

Қазақстан Республикасы Сыртқы істер министрлігі мен Армения Республикасы Сыртқы істер министрлігі арасындағы 2026-2027 жылдарға арналған Іс-қимыл бағдарламасын жүзеге асыру шеңберінде Ереван қаласында консулдық мәселелер бойынша жоспарлы консультациялар өтті, деп хабарлайды Қазақстан Республикасы Сыртқы істер министрлігінің баспасөз қызметінен.

Қазақстан делегациясын СІМ Консулдық қызмет департаментінің директоры Азамат Аубеков басқарды. Армения тарапынан СІМ Консулдық департаментінің басшысы Артур Петросян болды. Сонымен қатар кездесуге екі мемлекеттің құзыретті органдарының өкілдері қатысты.

Кездесу сындарлы әрі іскерлік жағдайда өтті, қатысушылар консулдық күн тәртібіндегі өзекті мәселелерге жан-жақты шолу жасады. 2024 жылғы 15 сәуірде қол қойылған азаматтардың сапарлары мен болу тәртібі туралы, сондай-ақ көші-қон саласындағы ынтымақтастық жөніндегі келісімдерді практикалық іске асыруға ерекше назар аударылды. Тараптар аталған келісімдер екіжақты қатынастардың құқықтық негізін нығайтып қана қоймай, сондай-ақ екі ел азаматтары мен іскерлік топтары арасындағы тікелей байланыстарды кеңейту үшін қолайлы жағдай жасағанын атап өтті.

Келіссөздер қорытындысы бойынша делегациялар басшылары қол жеткізілген уағдаластықтарды бекітіп, ведомствоаралық өзара іс-қимылдың басым бағыттарын айқындайтын консультациялардың қорытынды Хаттамасына қол қойды. Қазақстан және армян тараптары өз азаматтарының мүдделері үшін серіктестікті дәйекті түрде тереңдетуге дайын екендіктерін растады.

09.04.2026, 20:22 3271

Қазақстан мен Армения мемлекетаралық ынтымақтастықты арттыруды көздеуде

Армения Республикасына ресми сапары барысында Қазақстан Республикасының Сыртқы істер министрі Ермек Көшербаев Премьер-министр Никол Пашинянмен кездесті, деп хабарлайды Қазақстан Республикасы Сыртқы істер министрлігінің баспасөз қызметінен.

Сыртқы саяси ведомствоның басшысы Н.Пашинянға Қазақстан Президенті Қасым-Жомарт Тоқаевтың жылы лебіздері мен ізгі тілектерін жеткізді.

Мемлекет басшыларының күш-жігері арқасында Қазақстан мен Армения арасындағы екіжақты қатынастар сапалы жаңа деңгейге көтерілді. Орнықты саяси диалог жолға қойылды, жоғары және биік деңгейде тұрақты байланыстар сақталып, үкіметаралық комиссия арқылы сауда-экономикалық ынтымақтастық үйлестірілуде, сондай-ақ мәдени-гуманитарлық және ғылым-білім беру байланыстары белсенді дамуда", - деп атап өтті Е.Көшербаев.

Министр Оңтүстік Кавказ өңіріндегі жаңа геосаяси жағдай екі елдің экономикасы үшін жаңа мүмкіндіктер ашқанын қанағаттанушылықпен айтты. Атап айтқанда, өткен жылы Ресей, Әзербайжан және Грузия аумақтары арқылы теміржол бағыты бойынша Арменияға қазақ астығын экспорттау қайта жанданды. Осыған байланысты Министр Арменияға ауыл шаруашылығы өнімдерін, атап айтқанда астық пен етті ұзақ мерзімді жеткізуге мүдделілігін растады.

Тараптар 2026-2030 жылдарға арналған Қазақстан мен Армения Үкіметтері арасындағы сауда-экономикалық ынтымақтастық жөніндегі Жол картасын тиімді іске асыру аясында көлік-транзит және сауда салаларындағы қатынастарды одан әрі дамыту мәселелерін талқылады.

Қазақстанның СІМ басшысы сондай-ақ елдер арасында тұрақты тікелей әуе қатынасын жолға қою бойынша қабылданып жатқан шаралар хабарлады.

Сондай-ақ сұхбаттасушылар халықаралық және өңірлік күн тәртібіндегі өзекті мәселелер бойынша пікір алмасып, осы ынтымақтастық жолында Қазақстан мен Армения бірлескен жұмыстың оң тәжірибесін жинақтағанын және бүгінгі таңда тараптардың ұстанымдары көптеген мәселелер бойынша ұқсас екенін атап өтті.

Кездесу соңында тараптар бірлескен күш-жігер арқылы екіжақты және көпжақты форматтарда мемлекетаралық ынтымақтастықты одан әрі арттыруға жәрдемдесу ниеттерін растады.

Ең көп оқылғаны