12.04.2023, 11:06 24596

Оқұ ағарту министрлігі оқу жылының аяқталуын 31 мамырда бекітті

Қорытынды емтихандар мен аттестаттауды өткізу мерзімдері анықталды
Оқұ ағарту министрлігі оқу жылының аяқталуын 31 мамырда бекітті
Сурет: Depositphotos
Астана. 12 ақпан. KAZAKHSTAN TODAY - 2022-2023 оқу жылын аяқтау және орта білім беру ұйымдарында білім алушыларды қорытынды аттестаттаудан өткізу мерзімдерін бекіту туралы оқу-ағарту министрінің бұйрығы қабылданды, деп хабарлады Оқу ағарту министрлігінің бірінші вице-министрі Шолпан Каринова.

Бұйрық бойынша, меншік нысанына және ведомстволық бағыныстылығына қарамастан орта білім беру ұйымдарындағы оқу сабақтары 2023 жылғы 31 мамырда аяқталады. 9 (10) сыныптарда білім алушылардың қорытынды бітіру емтихандары 2023 жылғы 2-13 маусым аралығында өткізіледі. 11 (12) сыныптарда білім алушылардың мемлекеттік бітіру емтихандары - 2023 жылғы 5-19 маусым аралығында өткізіледі.

Сондай-ақ, қорытынды аттестаттауды өткізудің мынадай мерзімдері бекітілген:

9 (10)-сынып оқушылары үшін:

1) оқыту тілі бойынша эссе нысанында жазбаша емтихан, гуманитарлық цикл пәндерін тереңдетіп оқытатын мектептер үшін - жазбаша жұмыс (мақала, әңгіме, эссе) - 2023 жылғы 2 маусым;

2) математика (алгебра) бойынша жазбаша емтихан (бақылау жұмысы) - 2023 жылғы 6 маусым;

3) өзге тілдерде оқытатын сыныптарда қазақ тілі мен әдебиеті бойынша жазбаша емтихан (мәтінмен жұмыс, мәтін бойынша тапсырмаларды орындау) және қазақ тілінде оқытатын сыныптарда орыс тілі мен әдебиеті бойынша жазбаша емтихан (мәтінмен жұмыс, мәтін бойынша тапсырмаларды орындау) - 2023 жылғы 9 маусым;

4) таңдау пәні бойынша жазбаша емтихан (физика, химия, биология, география, геометрия, Қазақстан тарихы, дүниежүзі тарихы, әдебиет (оқыту тілі бойынша), шет тілі (ағылшын/француз/неміс), информатика) - 2023 жылғы 13 маусым;

11 (12) сынып оқушылары үшін:

1) оқыту тілі бойынша жазбаша емтихан - 2023 жылғы 5 маусым;

2) алгебра және анализ бастамалары бойынша жазбаша емтихан - 2023 жылғы 8 маусым;

3) Қазақстан тарихы бойынша ауызша емтихан - 2023 жылғы 12 маусым;

4) өзге тілдерде оқытатын сыныптарда қазақ тілі мен әдебиетінен және қазақ тілінде оқытатын сыныптарда орыс тілі мен әдебиетінен жазбаша емтихан - 2023 жылғы 15 маусым;

5) таңдау пәні бойынша жазбаша емтихан (физика, химия, биология, география, геометрия, дүниежүзілік тарих, құқық негіздері, әдебиет (оқыту тілі бойынша), шет тілі (ағылшын/француз/неміс), информатика) - 2023 жылғы 19 маусым.

Облыстардың, Астана, Алматы және Шымкент қалаларының білім басқармалары оқу жылын ұйымдасқан түрде аяқтау бойынша тиісті шараларды ұйымдастырады.

Бұған дейін Қазақстанда мектеп оқушыларының демалысы қысқартылған болатын.

Оқу ағарту министрлігінің оқу жылын 31 мамырға дейін ұзарту туралы бастамасы көпшіліктің наразылығын тудырды.
 

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.


МӘТІННЕН ҚАТЕ ТАПТЫҢЫЗ БА?

Оны тінтуірмен таңдап, Ctrl + Enter пернелерін басыңыз.

тақырып бойынша жаңалықтар

Ең көп оқылғаны