Президент электр энергетикасы мәселелері бойынша заңнамалық өзгерістерді жедел қабылдауды тапсырды
Сурет: Depositphotos
Электр энергетикасы нарығын дамытудың жаңа моделі әзірленуде
Астана. 29 наурыз. KAZAKHSTAN TODAY - Әбден тозған энергетика инфрақұрылымы әрең жұмыс істеп тұр. Инфрақұрылымды дамытуға қатысты ұстанымдарды қайта қарау қажет. Бұл туралы ҚР Президенті Қасым-Жомарт Тоқаев Парламент палаталарының бірлескен отырысында мәлімдеді.
Ол биылғы қыстың көзі қырауда бірқатар аймақта қалалар мен елді мекендер жылусыз қалғанын еске салды.
Менің тапсырмаммен электр энергетикасы нарығын дамытудың жаңа үлгісі дайындалып жатыр. Сол арқылы осы салаға қосымша инвестиция тарту көзделіп отыр. Сондай-ақ бұл құжат осы саланың барынша ашық болуын қамтамасыз етпек. Мәжілісте электр энергетикасына қатысты үш заң жобасы бар. Депутаттық корпустан оларды жедел қарауды және тиісті заңнамалық өзгерістерді қабылдауды сұраймын", - деп тапсырды Президент.
Ол коммуналдық желілердің жоғары тозуына байланысты барлық дерлік аймақтарда ауыр апаттар үнемі болып тұратынын атап өтті. Көптеген қалаларда негізгі инфрақұрылымның жетіспеушілігі байқалады: жолдар, электр желілері, газ құбырлары және т.б.
Біз еліміздің инфрақұрылымдық қуатын қалыптастыруымыз қажет. Сондықтан мен Ұлттық инфрақұрылым жоспарын қабылдауды ұсынамын. Құжатта осы саладағы басты мәселелер ашық көрсетілуге тиіс. Сонымен бірге 2029 жылға дейін іске асырылатын негізгі жобалар қамтылуы қажет", - деді Тоқаев.
Бұған дейін хабарланғандай, Екібастұз, Рудный және Риддер қалаларында ағымдағы жылыту маусымында болған бірқатар апаттар суық мезгілде қала тұрғындарын жылусыз қалдырды. Президент Қасым-Жомарт Тоқаев мемлекеттік органдар мен энергетика объектілерінің иелерін жылыту маусымына дайындық бойынша талапқа сай жұмыс жүргізбегені үшін сынға алды.
Энергетика министрі Болат Ақшолақов 2023 жылдың бірінші тоқсанында еліміздің барлық ЖЭО және электр желілерінің аудиті аяқталатынын хабарлады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Елордада жаңа жылу қуаты іске қосылды
Сурет: gov.kz
Астана қаласының әкімі Жеңіс Қасымбек Instagram парақшасында Астананы жылумен қамтамасыз ету жұмысы туралы мәлім етті, деп хабарлайды Астана қаласы әкімдігінің баспасөз қызметінен.
Құрылысы ұзаққа созылған ЖЭО-3-ті іске қосу үшін үлкен жұмыс атқарылды.
Аталмыш жылу электр орталығындағы төрт қазандықтың бәрі іске қосылды. Бұл қаланы 440 Гкал/сағатпен қамтамасыз етуге мүмкіндік береді.
ЖЭО-3-тің бірінші кезеңінің құрылысы қазан айында аяқталды. Нысан осы кезден бастап қалаға жылу беруді бастады. ЖЭО-3 сол жағалаудың бір бөлігін және құрылыс жұмыстары жүріп жатқан жаңа аудандарды жылумен қамтиды.
Сол сияқты тіршілікті қамтамасыз ететін жаңа нысандарда жаңа қуаттар іске қосылды. Мәселен, жаңа "Оңтүстік-Шығыс" газ жылу станциясын алайық. Бұл газ жылу станциясы "Бағыстан", "Мыңжылдық аллеясы" тұрғын үй кешендері аудандарын, қаланың сол жағалауын жылумен сенімді қамтамасыз етеді. Осы жылдың соңына дейін станцияны 350 Гкал/сағ максималды қуаттылыққа дейін жеткізу бойынша іске қосу жұмысы жалғасады.
Сондай-ақ, желтоқсан айында қуаттылығы 350 Гкал/сағ болатын "Тұран" газ жылу станциясының 1-кезеңін іске қосуды жоспарлап отырмыз. Осылайша, үш нысанның күші 1140 Гкал/сағ құрайды", - деп жазды Жеңіс Қасымбек.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыдағы өрттің шығу себептерін тексеру жөніндегі Үкіметтік комиссия құрылды
Сурет: primeminister.kz
ҚР Премьер-Министрі Әлихан Смайыловтың өкімімен Алматы қаласындағы хостелде орын алған өрттің себептерін тексеру және оның салдарын жою жөніндегі Үкіметтік комиссия құрылды, деп хабарлайды Үкіметтің баспасөз қызметінен.
Оның құрамына мемлекеттік және құқық қорғау органдарының басшылары, сондай-ақ Алматы әкімдігінің өкілдері кірді. Комиссия төрағасы ҚР Төтенше жағдайлар министрі Сырым Шәріпханов оқиға орнына шұғыл аттанды.
Үкіметтік комиссия өрт салдарынан болған қайғылы жағдайдың себептерін жан-жақты тексеру жұмыстарына дереу кірісіп, зардап шеккендерге бірінші кезектегі көмек көрсетеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.