Үкіметте тұрғын үй және әлеуметтік инфрақұрылым нысандарының құрылыс сапасы мәселелері бойынша кеңес өтті. Кездесу барысында құрылыс жобаларын жүзеге асыру кезінде бақылауды күшейту шаралары қаралды, деп хабарлайды Үкіметтің баспасыз қызметінен.
Өнеркәсіп және құрылыс министрінің 2024-2025 жылдары пайдалануға берілген нысандарға жүргізілген мониторинг нәтижелері туралы баяндамасы тыңдалды. Ведомствоның мәліметінше, мониторинг 1 032 нысанды қамтыды. Оның ішінде 725 әлеуметтік инфрақұрылым нысаны, 230 тұрғын үй құрылысы және абаттандыру объектісі, сондай-ақ 77 инженерлік, көліктік, әкімшілік және өзге де инфрақұрылым нысандары бар.
Мониторинг барысында өңірлерде құрылыс-монтаждау жұмыстарының сапасына және құрылыс бақылауын ұйымдастыруға байланысты бірқатар ақау мен кемшілік анықталды. "Samruk-Kazyna Construction" АҚ оператор болып саналатын "Келешек мектептері" ұлттық жобасы аясында салынған нысандарға ерекше назар аударылды.
Премьер-министрдің бірінші орынбасары құрылыс бақылауы мен ақауларды жоюда көзбояушылыққа жол берілмейтінін атап өтті. Құрылыс сапасы жобаларды жүзеге асырудың барлық кезеңдерінде жобалау мен құрылыс-монтаждау жұмыстарынан бастап объектілерді қабылдау, техникалық және авторлық қадағалау, сондай-ақ кепілдік міндеттемелерін орындауға дейін қамтамасыз етілуі тиіс.
Осыған байланысты құрылыс бақылауын күшейту және тапсырыс берушілердің, мердігерлік ұйымдардың, техникалық және авторлық қадағалаудың жауапкершілігін арттыру шаралары талқыланды.
Кеңес барысында мұқтаж азаматтар арасында тұрғын үйді бөлу, сондай-ақ жол саласын битуммен қамтамасыз ету мәселелеріне жеке назар аударылды. Әкімдіктердің, уәкілетті органдар мен жауапты ұйымдардың тұрғын үйді уақтылы ұсыну, битумға қажеттілікті жоспарлау және жол-құрылыс маусымының тұрақты өтуін қамтамасыз ету бойынша үйлестірілген жұмысы қажеттігі атап өтілді.
Кеңес қорытындысы бойынша Премьер-министрдің бірінші орынбасары құрылыс процесінің барлық қатысушыларының дербес жауапкершілігін арттыру, формальды бақылаудан бұзушылықтардың алдын алуға және жобаларды жүзеге асырудың барлық кезеңдерінде сапаны қамтамасыз етуге бағытталған жүйелі жұмысқа көшу қажеттігіне назар аудара отырып, бірқатар тапсырма берді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.