Система Orphus

Алматы маңында Bek Air әуе компаниясы ұшағының апатқа ұшырау себебі аталды

29.04.2022, 17:49 16346
Алматы маңында Bek Air әуе компаниясы ұшағының апатқа ұшырау себебі аталды
Сурет: kazpravda.kz
АЛМАТЫ. 29 СӘУІР - ҚР Индустрия және инфрақұрылымдық даму министрлігі 2019 жылғы 27 желтоқсанда Алматы қаласы әуе айлағының аумағында Bek Air әуе компаниясының Fokker-100 әуе кемесіне қатысты орын алған авиациялық оқиғаны тексеру жұмыстары аяқталғаны туралы хабарлайды, деп хабарлайды KAZAKHSTAN TODAY ҚР ИИДМ баспасөз қызметіне сілтеме жасап.
 
 "Бек Эйр" АҚ әуе кемесімен болған авиациялық оқиға ұшақ әуеге көтерілген кезде қанатының күш түсетін қасиеттерінің симметриясын жоғалтуы нәтижесінде орын алғаны анықталды. 
 

Соның кесірінен ұшақ ұшу-қону жолағынан көтерілгеннен кейін фюзеляжға құлап, қар басқан топырақтың бетімен оңға қарай ауып кеткен, одан кейін әуежайдың периметр бойынша қоршауын бұзып, аталған қоршаудан 9-10 метр қашықтықта орналасқан екі қабатты жеке меншіктегі құрылыс нысанына соғылған", - делінген ИИДМ баспасөз қызметінің хабарламасында.

 
Комиссия қорытындысына сәйкес, ұшақ қанатының күш түсетін қасиеттерін жоғалтуының себебі жер үстіндегі мұзданудың әсері болуы ықтимал.
 
Ведомствода, "ҚР әуе кеңістігін пайдалану және авиация қызметі туралы" 2020 жылғы 15 шілдедегі №339-IV Заңға сәйкес, ұшақ апатын азаматтық авиация саласындағы уәкілетті орган құрған комиссия тексергенін атап өтті.
 

Халықаралық заңнамаға және Қазақстан Республикасының заңнамасына сәйкес комиссия жұмысына Нидерланд Корольдігінің қауіпсіздік жөніндегі бюросының өкілдері (авиациялық оқиғаларды тексеру жөніндегі мемлекеттік орган) және олардың кеңесшілері – нидерландтық Fokker Services B. V. компаниясының мамандары (Fokker үлгісіндегі әуе кемесі сертификатының иесі), сондай-ақ Мемлекетаралық авиация комитетінің тексерушілері қатысты. Халықаралық азаматтық авиация ұйымы кеңесінің (ICAO) Чикаго конвенциясының 13-қосымшасына және Қазақстан Республикасының заңнамасына сәйкес тексеру нәтижелері бойынша қорытынды есеп Нидерланд Корольдігінің қауіпсіздік жөніндегі бюросымен, Мемлекетаралық авиация комитетімен келісілді", - делінген ақпаратта.

 
Естеріңізге сала кетейік, Bek Air әуе компаниясының ұшағы 2019 жылдың желтоқсан айының соңында Алматы маңында құлаған болатын. Оның бортында 93 жолаушы және бес экипаж мүшесі болған. Апат салдарынан 12 адам қайтыс болды.
 
 Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

Ең көп оқылғаны