Қазақстанда сән-салтанатқа салық енгізілуі мүмкін
Тоқаев заңсыз көлік әкелетін амал-тәсілдің бәріне тосқауыл қою үшін батыл шаралар қабылдау қажет екенін атап өтті.
НҰР-СҰЛТАН. 1 ҚЫРКҮЙЕК - 2023 жылға арналған жаңа Салық кодексін жариялай отырып, Қазақстан Президенті Қасым-Жомарт Тоқаев сән-салтанат салығын енгізу мүмкіндігін қарастыруды ұсынды, деп хабарлайды KAZAKHSTAN TODAY Ақорданың баспасөз қызметіне сілтеме жасап.
Экономиканың тұрақты өсуі салық саясатының түсінікті және болжауға болатындай етіп жүргізілуіне тікелей байланысты. Фискалды реттеу ісін қайта жаңғырту үшін 2023 жылы жаңа Салық кодексі әзірленеді. Оның ең түйткілді тұсы саналатын салықтық әкімшілендіру мәселесі түгел қайта жазылуға тиіс", - деді Тоқаев, ҚР Парламенті палаталарының бірлескен отырысында Қазақстан халқына Жолдауын жариялап.
Салық реформасы аясында "сән-салтанатқа салық" салуды енгізген жөн, деп атап өтті Мемлекет басшысы.
Мұның орта тапқа қатысы жоқ, бұл салық тек аса қымбат жылжымайтын мүлік және автокөлік сатып алған кезде салынады", - деп түсіндірді Тоқаев.
Сондай-ақ, жұмыс барысында бетпе-бет кездесу мүлдем болмайтындай етіп, салықтық бақылау қызметін толық цифрландыру керек.
Президент сауда-саттық заман талабына сай дамуы үшін мөлшерлемесі ойға қонымды әрі рәсімдері қарапайым бөлшек сауда салығын қолдану аясын кеңейту керек екенін атап өтті.
Тоқаев заңсыз көлік әкелетін амал-тәсілдің бәріне тосқауыл қою үшін батыл шаралар қабылдау қажет екенін атап өтті.
Ал, биылғы 1 қыркүйекке дейін елге әкелінген автокөліктерге қатысты ахуалды реттеу керек. Оларды заңдастыру мақсатында утилизация және алғашқы тіркеу үшін төленетін қаржы көлемін 200-250 мың теңгеден асырмай, бәріне бірдей және бір реттік алым алуды ұсынамын. Бұл – іздеу салынбаған және кеден рәсімдерінен өткен көліктерге ғана қатысты шара", - деді ол.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан мен Қытай түсті металлургия және "жасыл" пайдалы қазбалар саласындағы ынтымақтастықты кеңейтеді
Қазақстан мен Қытай түсті металлургияны тұрақты дамыту және "жасыл" пайдалы қазбаларды өндіру саласындағы ынтымақтастықты кеңейтуді жалғастырады. Бұл туралы Қазақстан-Қытай түсті металлургияны орнықты дамыту форумында Қытай Халық Республикасының Қазақстандағы Төтенше және Өкілетті Елшісі Хань Чуньлинь мәлімдеді.
Тараптар мемлекет басшылары қол жеткізген уағдаластықтарды іске асыруды жалғастырып, саясатты үйлестіруді күшейтеді, Қытайдың "жасыл" зияткерлік технологиялары мен заманауи жабдықтарын енгізеді, сондай-ақ геологиялық барлаудан бастап өндіру, сақтау, тасымалдау және минералдық ресурстарды өткізуге дейінгі барлық тізбек бойынша ынтымақтастықты тереңдетеді", - деп жазады ҚазАқпарат елшінің сөзіне сілтеме жасай отырып.
Ол халықаралық ынтымақтастық жаңа энергетика мен заманауи материалдар өндірісіне қажетті минералдық ресурстарды игерумен ғана шектелмейтінін, сондай-ақ экологиялық талаптарды сақтай отырып, дәстүрлі кен орындарын жауапкершілікпен игеруді де қамтитынын атап өтті.
Қазақстан - "Бір белдеу, бір жол" бастамасын ұсынған алғашқы мемлекет. Республика хром, вольфрам, мыс, қорғасын және мырыш қоры бойынша әлемдегі жетекші елдердің қатарына кіреді. Екі елдің әлеуеті бірін-бірі толықтырады, сондықтан тау-кен өндіру және металлургия салаларындағы әріптестік табысты дамып келеді", - деп қосты Хань Чуньлинь.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Корея мұнай саласындағы жаңа келісім әзірлеуде
Қазақстан мен Корея Республикасы мұнай саласындағы ынтымақтастық жөніндегі негіздемелік келісімге қол қоюға дайындалуда. Бұл мәселе Қазақстан Республикасы Энергетика вице-министрі Санжар Жаркешов Корея Республикасының Қазақстандағы Төтенше және Өкілетті Елшісі Чжон Кихонмен кездесуі барысында талқыланды, деп хабарлайды ҚР Энергетика министрлігінен.
Құжатқа ағымдағы жылдың қыркүйегінде Қазақстан Республикасы Президентінің Корея Республикасына жоспарланған мемлекеттік сапары аясында қол қою көзделіп отыр.
Сондай-ақ кореялық компаниялардың Қазақстанның энергетикалық инфрақұрылымын жаңғыртуға қатысу перспективалары талқыланды. Энергетика министрлігі кореялық компанияларды 2035 жылға дейінгі электр энергетикасы саласын дамыту жоспары аясында жұмыс істеп тұрған энергетикалық нысандарды жаңғырту және жаңа генерациялау қуаттарын салу жобаларына инвесторлар және EPC-мердігерлер ретінде қатысуға шақырды.
Кездесу барысында Түркістан облысындағы бу-газ электр станциясының құрылысы жобасының іске асырылу барысы қаралды. Құрылыс-монтаж жұмыстарының жалғасып жатқаны, негізгі технологиялық жабдықтарды жеткізу толық аяқталғаны және құрылыс алаңында 2 100-ден астам маманның еңбек етіп жатқаны атап өтілді.
Кездесу қорытындысы бойынша тараптар стратегиялық әріптестікті одан әрі дамытуға, бірлескен инвестициялық жобаларды іске асыруға және энергетика саласындағы технологиялық ынтымақтастықты кеңейтуге өзара мүдделі екенін растады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ТШО 2026 жылы 40 млн тонна мұнай өндіруді жоспарлап отыр
Теңіз кен орнын кеңейтудің ең ірі кезеңі аяқталғаннан кейін "Теңізшевройл" ЖШС (ТШО) жобалық өндірістік қуатына шықты. Тәуліктік мұнай өндіру көлемі шамамен 120 мың тоннаға жетті. Компания 2026 жылдың қорытындысы бойынша 40 млн тоннаға дейін мұнай өндіруді жоспарлап отыр, деп хабарлайды ҚР Энергетика министрлігінің баспасөз қызметінен.
Қазіргі уақытта кеңейту жұмыстары толық аяқталып, жаңа өндірістік қуаттар жоспарланған деңгейге шықты. 2026 жылдың алғашқы жартыжылдығында ТШО 16,6 млн тонна мұнай өндірді. Жыл қорытындысы бойынша компания өндіріс көлемін 40 млн тоннаға дейін жеткізуді жоспарлап отыр",- деп айтылған хабарламада.
ТШО жобасы тәуелсіз Қазақстан тарихындағы ең ірі инвестициялық жобалардың бірі саналады. Бұл жобалардың іске асырылуы кен орнының өндірістік мүмкіндіктерін кеңейтіп, мұнай өндіру көлемін едәуір арттыруға мүмкіндік берді", - деп түсіндіреді министрліктен.
Кеңейту жобасы аясында 2024-2025 жылдары жаңа өндірістік нысандар пайдалануға беріліп, 2025 жылғы қаңтарда Үшінші буын зауытында алғашқы мұнай өндірілді. Қазіргі уақытта кеңейту жұмыстары толық аяқталып, жаңа өндірістік қуаттар жоспарланған деңгейге шыққан.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Кения шай-кофе хабын құру мәселесін талқылады
Сурет: ҚР СІМ
Қазақстанның Кениядағы Елшісі Барлыбай Садықовтың Кенияның Инвестициялар, сауда және өнеркәсіп министрі Ли Киньянджуимен кездесуі барысында Қазақстан мен Кения бірлескен шай-кофе хабын құру және көлік-логистика саласындағы ынтымақтастықты дамыту мәселелерін талқылады, деп хабарлайды ҚР Сыртқы істер министрлігінің баспасөз қызметінен.
Тараптар 2026 жылғы мамырда Кения Президенті Уильям Рутоның Қазақстанға жасаған мемлекеттік сапары барысында қол жеткізілген келісімдердің іске асырылу барысын да талқылады.
Келіссөздерде тау-кен өнеркәсібі, банк саласы, көлік-логистика, туризм, инвестициялар және ауыл шаруашылығы бағыттарындағы екіжақты ынтымақтастықты жандандыру мәселелері қарастырылды. Өзара тиімді бірлескен кәсіпорындар құру мүмкіндіктеріне және қазақстандық өнімнің Кения нарығына шығуына қолдау көрсету мәселелеріне ерекше назар аударылды.
Сонымен қатар, қазақстандық делегация үшін Момбаса теңіз портына, Кенияның негізгі "құрлық порты" саналатын Найроби ішкі контейнерлік терминалына, сондай-ақ шай және кофе плантацияларына таныстыру сапарлары ұйымдастырылды. Шай-кофе хабын құру жөніндегі уағдаластықтарды іске асыру және Қазақстан тарапының Кенияның порттық инфрақұрылымын пайдалану мәселелері де талқыланды.
Кездесулер қорытындысы бойынша тараптар өзара қызығушылық тудыратын жобалар бойынша техникалық-экономикалық негіздемелер әзірлеу, жоғары деңгейде қол жеткізілген келісімдерді іске асыру жөніндегі жол карталарын дайындау, сондай-ақ сарапшылар деңгейіндегі өзара сапарларды ұйымдастыруды қоса алғанда, басым бағыттардың барлық спектрі бойынша ынтымақтастықты нығайтуға уағдаласты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда тағы үш шетелдік автокөлік өндірісі іске қосылады
Сурет: Ақорда
Қазақстанда 2028 жылға дейін жеңіл және коммерциялық автокөліктер өндірісін кеңейтуге, автокомпоненттер шығаруды ұлғайтуға және өнеркәсіптік кооперацияны дамытуға бағытталған жаңа жобаларды іске асыру жоспарланып отыр, деп хабарлайды ҚР Өнеркәсіп және құрылыс министрі Ерсайын Нағаспаев.
Мемлекет басшысының Қытайға мемлекеттік сапары барысында автокөлік жасау саласында бірқатар маңызды келісімдерге қол жеткізілген. Атап айтқанда, Li Auto, OMODA және JAECOO маркалы автокөліктерді, SITRAK маркалы жүргізушісіз тартқыштарды өндіру, сондай-ақ BYD компаниясымен бірлесіп жоғары жылдамдықты қуаттау станцияларының желісін дамыту жоспарланып отыр", - деді ол.
Сондай-ақ, автокомпоненттер өндірісін ұлғайту негізгі басымдықтардың бірі болып қала береді. Қазақстандық кәсіпорындар бүгінде дөңгелектер, қозғалтқыш бөлшектері, аккумуляторлар, автобустарға арналған металл бөлшектер, орындықтар мен мультимедиялық жүйелер шығарады.
Бұдан бөлек, бамперлер, электр сымдары, доңғалақ дискілері және лак-бояу материалдарын өндіру жобалары жүзеге асырылып жатыр.
Саланы одан әрі дамыту мақсатында машина жасау және көлік мәселелері жөніндегі заң қабылданып, онда "өнеркәсіптік кластер" ұғымы енгізілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
КҚК-дағы танкерге дрон шабуыл жасады: зардап шеккендер мен мұнайдың төгілу факті жоқ
Сурет: Depositphotos
Ведомствоның мәліметінше, 19 шілдеден 20 шілдеге қараған түні Каспий құбыр консорциумы (КҚК) теңіз терминалында жүк тиеп тұрған NELSA танкеріне ұшқышсыз ұшу аппараты шабуыл жасаған, деп хабарлайды Қазақстан Республикасы Энергетика министрлігінің баспасөз қызметінен.
Оқиға салдарынан өрт шығып, ол жедел түрде сөндірілді. Зардап шеккендер жоқ, мұнайдың төгілуіне жол берілген жоқ", - делінген министрлік хабарламасында.
Энергетика министрлігінің мәліметінше, қазіргі уақытта кеменің техникалық жай-күйі мен оқиғаның салдарына бағалау жұмыстары жүргізіліп жатыр.
Қазақстан Республикасының Энергетика министрлігі Каспий құбыр консорциумымен тұрақты байланыста", - деп мәлімдеді ведомствоның баспасөз қызметі.
Естеріңізге сала кетсек, 17 және 19 шілдеде КҚК теңіз терминалы акваториясында Қазақстан мен Америка Құрама Штаттарының жүк жөнелтушілеріне тиесілі мұнайды тиеу кезінде азаматтық теңіз танкерлеріне шабуыл жасалған болатын. 19 шілдедегі оқиғадан кейін терминалда мұнай тиеу уақытша тоқтатылып, жексенбі күні кешке қайта жанданды.
Бұл шабуылдарды Қазақстанның Сыртқы істер министрлігі мен Энергетика министрлігі қатаң айыптап, мұндай әрекеттер елдің экономикалық мүдделеріне зиян келтіріп, халықаралық энергетикалық қауіпсіздікке қатер төндіретінін мәлімдеген еді.
20 шілдеде Каспий құбыр консорциумының теңіз терминалында азаматтық танкерге тағы бір шабуыл жасалып, соның салдарынан мұнай тиеу жұмыстары қайтадан тоқтатылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.