Астанада Ат спортының конкур түрінен Еуразия Лигасы Әлем Кубогының кезеңі басталып, бірінші күні аяқталды, деп хабарлайды елорда әкімдігінің ресми сайты.
Жарыс FEI (Халықаралық ат спорты федерациясы) аясында өтіп жатыр. Халықаралық деңгейдегі бұл турнирге Қазақстан, Қырғызстан, Өзбекстан, Армения және Грузия елдерінен келген шабандоздар қатысып жатыр.
Жарыстың салтанатты ашылу рәсіміне Қазақстан Республикасы Премьер-министрінің орынбасары Ермек Көшербаев қатысып, ресми түрде турнирдің басталғанын жариялады. Сонымен қатар, шараға спорт саласының танымал тұлғалары мен халықаралық төрешілер де қатысты.
Конкур - ат спортының техникалық жағынан ең күрделі әрі тартысты түрі. Бұл жарыста шабандоз бен ат түрлі биіктіктегі кедергілерден белгіленген ретпен секіріп, дистанцияны мүмкіндігінше тез және қателіксіз өтуі қажет. Сайыс жылдамдық пен дәлдікті, атпен үйлесімді жұмысты талап етеді.
Аталған жарыстың Астанада өтуі де ерекше мәнге ие. Елордалық көрермендер үшін бұл - тарихи сәт. Себебі конкур сайысы Астанада соңғы 10 жылда алғаш рет ұйымдастырылып отыр.
Бірінші күннің қорытындысы бойынша үш жарыс өтті:
Еуразия Лигасы Әлем Кубогы, конкур 125 см
Жеңімпаздар:
1 орын - Андрей Тряпицын (Қырғызстан);
2 орын - Хуршидбек Алимджанов (Өзбекстан);
3 орын - Даяна Оңаева (Қазақстан).
Maxima Masters Eurasia шағын кубогы - конкур 125 см Жеңімпаздар:
1 орын - Бекжан Байжанұлы (Қазақстан);
2 орын - Андрей Тряпицын (Қырғызстан);
3 орын - Хуршидбек Алимджанов (Өзбекстан).
Еуразия Лигасы Әлем Кубогы, конкур 140 см
Жеңімпаздар:
1 орын - Хуршидбек Алимджанов (Өзбекстан);
2 орын - Акбар Шарипов (Өзбекстан);
3 орын - Бекзод Курбанов (Өзбекстан).
Турнир 1 маусымға дейін жалғасады. Жарыстар Астанадағы "Арғымақ" ат спорт кешенінде өтіп жатыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.