Алматы облысында көшкін түсті
Екі жеке тұрғын үйді лай көшкіні басып қалды
Сурет: gov.kz
Қонаев. 28 ақпан. KAZAKHSTAN TODAY - Алматы облысы Талғар ауданы Бесағаш ауылында орналасқан "Бурабай" коттедж қалашығында топырақ көшкіні болды. Құрбандар мен зардап шеккендер жоқ.
Оның видеосы әлеуметтік желіде тарады.
Алматы облысы Төтенше жағдайлар департаментінің мәліметінше, кезекші пультіне 27 ақпан күні сағат 09:50-де Талғар ауданы Бесағаш ауылының "Бурабай" коттедж қалашығында топырақ көшкіні түскені туралы хабар түсті.
25-26 ақпан аралығында қар аралас жаңбыр жауып топырақ батпақтанып, нәтижесінде тау баурайынан Баянауыл көшесіндегі екі жеке тұрғын үйді лай көшкіні басып қалды.Топырақ үйлердің бірінің терезесіне зақым келтіріп, ішкі бөлмелерге кірді. Екінші үйдің қабырғаларында жарықтар пайда болды. Құрбандар мен зардап шеккендер жоқ. Оқиға орнына Төтенше жағдайлар департаменті, "Қазселденқорғау" ММ, Жергілікті атқарушы органдардың қызметкерлері жіберілді. Оқиғаның нақты себебін және келтірілген залалды анықтау жөніндегі комиссия құрылды", - деп хабарлады ведомстводан.
Түскен топырақтың болжамды көлемі 360 текше метр.
Бұған дейін хабарланғандай, алматылықтар Кеңсай ықшамауданындағы тау кесіндісіне байланысты көшкіннен қауіптеніп отыр.
Бұған дейін Алматы тау бөктерінің тұрғындары көшкін қаупіне байланысты үйлерінің жанында тұрғын үй кешендерін салуға тыйым салуды талап еткен болатын.
Ақпарат көзі: inform.kz
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Абай ауданында ірі орман өрті сөндіріліп жатыр
Сурет: Gov.kz
ТЖ министрі Абай облысы Бабаев орманшылығының аумағындағы өртті сөндіруге жұмылдырылған күштер мен құралдардың тобын күшейтуді тапсырды, деп хабарлады ҚР ТЖМ баспасөз қызметінен.
Қазіргі уақытта өртті сөндіру жұмыстары жалғасуда. Өртті жоюға төтенше жағдайлар министрлігінің бөлімшелерінен, орман шаруашылығы комитетінен, жергілікті атқарушы органдардан және Қорғаныс министрлігінен 167 адам, 47 бірлік техника, оның ішінде 3 тікұшақ жұмылдырылды.
Елді мекендерге қауіп жоқ. ТЖ министрлігі мен Абай облысы Төтенше жағдайлар департаментінің базасында жедел штабтар құрылды.
ТЖ министрі Юрий Ильиннің өкіміне сәйкес өрт орнына Шығыс Қазақстан, Қарағанды облыстарының, Астана қаласының Төтенше жағдайлар департаменттерінен қосымша күштер мен құралдар жіберілді.
Қазіргі уақытта аумағы шамамен 2000 га құрайтын 8 квартал өртеніп жатыр.
Өрт орнына ТЖМ Өртке қарсы қызмет комитетінің төрағасы Нұрболат Дербісов жіберілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Жетісу облысының тауларында хабар-ошарсыз кеткен тик-токер іздестіріліп жатыр
Сурет: Polisia.kz
Жетісу облысының тауларында хабар-ошарсыз кеткен тик-токер іздестіріліп жатыр, деп хабарлайды Polisia.kz
36 жастағы алматылық Дамир Кушеев Текелі қаласының маңындағы тауларда хабар-ошарсыз жоғалып кетті. Ол 7 маусым Қора шатқалындағы Бұрқан бұлақ сарқырамасына спорт велосипедімен барып, бөгеттің жанында тұрып соңғы эфирге шыққан, жергілікті жердің қорықшысы шәй беріп, дәм ауыз тигізген.
Байланыс үзілгеннен кейін Кушеевтің жұбайы оны табуға көмектесу туралы Төтенше жағдайлар департаментіне өтініш білдірген. Арызды Ескелді ауданының полицейлері де тіркеп, жедел іздестіру шараларына кірісті. Қазір таулы аймақта полицейлер мен ТЖД-нің қызметкерлері, кинологтар іздестіру иттерімен ер адамды іздеп жатыр.
Дамир Кушеев түрлі көрікті жерлерге велосипедпен баруды ұнатады. TikTok желісінде өзінің жеке парақшасы бар. Ескелді ауданындағы туыстарында қонақта болған.
Жоғалып кеткен ер адамның орналасқан жері туралы ақпараты бар кез келген адамға мына телефондар арқылы хабарлауды сұраймыз: 8 747 558 1508, 708 252 2008, 102 немесе 112
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.